ខេត្តកំពង់ធំ ៖ ឈើល្មើសច្បាប់ប្រភេទឈើឆ្លិចកំពុងតែហៀរចេញពីដេប៉ូរអ្នកស្រី ឡេង ធារ៉ា ដែលគេស្គាល់ថាជាម្ចាស់ដេប៉ូដ៏ធំមួយប្រចាំខេត្តព្រះវិហារ ដែលកំពុងតែហូរចូលមកក្នុងទឹកដីខេត្តកំពង់ធំ គឺចូលក្នុងដេប៉ូចែ អូន ដែលគេដឹងថាជាឈ្មួញរកស៊ីឈើជើងចាស់វស្សាម្នាក់ប្រចាំខេត្តកំពង់ធំ ។
រូបភាពរថយន្តវេអង និងរថយន្ដយីឌុប ដែលថតពីលើត្រូននេះ គឺថតនៅថ្ងៃទី១៦ ខែសីហាឆ្នាំ២០២១ វេលាម៉ោង៣រសៀល
គឺដេប៉ូរថ្មីដែលមានហ៊ុំព័ទ្ធស័ង្កសីស្ថិតនៅក្នុងភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។ ឈើឆ្លិចទាំងអស់ ដែលកំពុងតែស្ទូចឡើងឡានវេអងនិងឡានយីឌុប គឺឈើដែលដឹកចេញពីដេប៉ូ របស់អ្នកស្រីឡេងធារ៉ាមកពីខេត្តព្រះវិហារ ។
បើតាមការពិតអ្នកស្រីទាំងពីរនាក់បានធ្វើការសហការគ្នាបានល្អប្រសើរ នៅក្នុងអាជីពបំផ្លាញព្រៃឈើដើម្បីធ្វើមានបានសម្រាប់ក្រុមគ្រួសារនិងបក្ខពួកខ្លួនមិនខ្វល់ពីទ្រព្យសម្បត្តិដែលជាកេរ្តិ៍ដំណែលពីដូនតាខ្មែរឡើយ មិនតែប៉ុណ្ណោះមេខ្មូត
ឈើទាំងពីរនាក់នេះចេះមន្តអាគមន៏អាចអូសទាញទឹកចិត្តជំនាញរដ្ឋបាលព្រៃឈើប្រចាំខេត្តព្រះវិហារ និងខេត្តកំពង់ធំ អោយជួយមើលការខុសត្រូវនៅក្នុងការកាប់បំផ្លាញទ្រព្យសម្បត្តិជាតិនេះផងដែរ ពិតជាមិនធម្មតាទេ។
ហេតុនេះហើយបានជាអ្នកស្រីជើងខ្លាំងទាំងពីរនាក់នេះហ៊ានស៊ីគឺហ៊ានសង ក៏ប៉ុន្តែអ្វីដែលពលរដ្ឋចោទជាសំនួរផ្ដោតខ្លាំងជាងគេសំដៅទៅលើលោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ និងលោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ មិនហ៊ានបើកភ្នែកមើលទេ ព្រោះអីអ្នកស្រីដែលជាជើងខ្លាំងទាំងពីរនាក់នោះបានបបួលមកដើរផ្លូវមួយទាំងអស់គ្នាទៅហើយ។
បើឃើញមេៗជាប់ស្នេហ៏មេខ្មូតស៊ីឈើទាំងពីរនេះហើយ ចាំអីទៀតលោក នួន សុខុម នាយខណ្ឌរដ្ឋបាលព្រៃឈើខេត្តព្រះវិហារ និង លោក ប៊ុន សុធី នាយខណ្ឌរដ្ឋបាលព្រៃឈើខេត្តកំពង់ធំ បានគៀងចូលក្នុងស៊ង រួចស្រាច់អស់ហើយ មិនខ្វល់ពីផលប្រយោជន៍ជាតិជារួមទេ សំខាន់បំពេញសេចក្តីស្រេចឃ្លានរបស់ខ្លួនឯងសិន។
អង្គភាពយើងខ្ញុំបានស្វះស្វែងរកការបំភ្លឺពីសំណាក់ប្រធានមន្ទីរកសិកម្ម និងនាយខណ្ឌរដ្ឋបាលព្រៃឈើនៃខេត្តទាំងពីរដែរ តែពុំអាចទំនាក់ទំនងបាន(ដោយគ្មានលេខទូរស័ព្ទ)។ អង្គភាពយើងខ្ញុំរីករាយនឹងរងចាំការបំភ្លឺពីសំណាក់សាមុីជន និងអង្គភាពពាក់ព័ន្ធរាងរាល់ម៉ោងធ្វើការ។
មហាជនសំណូមពរដល់ឯកឧត្តម វែង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មេត្តាចាត់តាំងមន្ត្រីជំនាញចុះស៊ើបអង្គេតករណីខាងលើ ជាពិសេសឯកឧត្តមនាយឧត្តមសេនីយន៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិ ទប់ស្កាត់ និងបង្ក្រាបបទល្មើសធនធានធម្មជាតិ មេត្តាចុះពិនិត្យទៅលើសកម្មភាពមេឈ្មួញឈើស្រ្តីជើងខ្លាំង២រូបខាងរកស៊ីបំផ្លាញធនធានព្រៃឈើប្រចាំដែនដីនៃអាណាចក្រទឹកដីខេត្តកំពង់ធំ និងខេត្តព្រះវិហារ៕
ដោយ ៖ វិបុល
