ខេត្តឧត្តរមានជ័យ ៖ តាមប្រភពព័ត៍មានពីប្រជាពលរដ្ឋដែលរស់នៅភូមិសាមគ្គីប្រកបរបរកសិកម្ម ស្ថិតនៅជើងភ្នំដើមត្រាង ក្នុងភូមិ សាមគ្គី ឃុំត្រពាំងប្រិយ ស្រុកអន្លង់វែង ខេត្តឧត្តរមានជ័យ បានអោយគេហទំព័រយើងដឹងថា លោក គង់ សារ៉េត នាយសង្កាត់រដ្ឋបាលព្រៃឈើ អន្លង់វែងនិងបក្ខពួកប្រមាណជិត១០នាក់ បានទៅធ្វើសកម្មភាពជំរិតទារប្រាក់ ពីម្ចាស់គ្រឿងចក្រកាយព្រៃសំអាតដីចំការ ពីប្រជាជនចំនួន១.៥០០ដុល្លារ (មួយពាន់ប្រាំរយដុល្លារ) ជាថ្នូរមិនហាមឃាត់ រារាំងនិងចាប់ចង ដោយផ្តល់ឱកាសឲ្យធ្វើសកម្មភាពសំអាតដីបន្តទៀត ។
ករណីនេះបានទំលាយអោយដឹងកាលពីថ្ងៃអាទិត្យ ១៣រោច ខែបុស្ស ឆ្នាំរកា ព.ស. ២៥៦១ ត្រូវនឹងថ្ងៃទី១៤ ខែមករា ឆ្នាំ២០១៨ ស្ថិតនៅជើងភ្នំចំណុចដើមត្រាងក្នុងភូមិសាមគ្គី ឃុំត្រពាំងប្រិយ ស្រុកអន្លង់វែង ខេត្តឧត្តរមានជ័យ។
តាមប្រសាសន៏អ្នកស្រី មូល ណេន ជាមេភូមិសាមគ្គី បានប្រាប់ថាពិតជាមានករណី គំរាមកំហែងជំរិតទារ ប្រាក់១.៥០០ដុល្លា ពីសំណាក់ក្រុមលោក គង់ សារ៉េត នាយសង្កាត់រដ្ឋបាលព្រៃឈើអន្លង់វែង ក្នុងការគំរាមកំហែង ពិតប្រាកដមែន ជាថ្នូរមិនហាមឃាត់រារាំងចាប់ចង និងរឹបអូសយកគ្រឿងចក្រឡើយ។
អ្នកស្រីបានបន្ថែមថា ប្រជាជននៅក្នុងភូមិរបស់គាត់ភាគច្រើន មានដីស្រែចំការ ដើម្បីអាស្រ័យផលបន្តិចបន្តួច
ក្នុងមួយគ្រួរសារៗមានមួយហិកតាកន្លះ និងអ្នកខ្លះទៀតមាន២ហិកតា ហើយដីភាគច្រើនស្ថិតនៅជិតជើងភ្នំ វាតែងតែប៉ះពាល់ព្រៃឈើបន្តិចបន្តួច វាមិនអត់ទេ ដោយពួកគាត់បានខ្ចីចងការប្រាក់ពីគ្រឹះស្ថានហិរញ្ញាវត្ថុ និងធនាគារ យកមកសំអាតដីកសិកម្ម ទុកបង្កបង្កើនផល ដើម្បីផ្គត់ផ្គង់ជីវភាពគ្រួសារ កុំឲ្យធ្វើចំណាកស្រុក បែរជាលោក គង់ សារ៉េត នាយសង្កាត់រដ្ឋបាលព្រៃឈើ និងបក្ខពួកចំនួន១០នាក់ អាងតួនាទីជាអ្នកការពារព្រៃឈើមកធ្វើបាបប្រជាជនស្លូតត្រង់ មករារាំងមិនឲ្យគ្រឿងចក្រ ចូលសំអាតដីស្រែចំការរបស់ខ្លួន។
លោកស្រីមេភូមិ និងប្រជាពលរដ្ឋក្នុងមូលដ្ឋានសូមអំពាវនាវដល់ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រម៉ាញ់ និងនេសាទ មេត្តាពិនិត្យមើលឥរិយាបទ និងទង្វើរបស់លោក គង់ សារ៉េត នាយសង្កាត់រដ្ឋបាលព្រៃឈើ
អន្លង់វែង កុំអោយប្រើតួនាទីរបស់ខ្លួនគៀប សង្កាត់ ប្រជាជនស្លូតត្រង់ប្រកបរបរសុខចរិតបែបនេះ បើពូកែណាស់សូមទប់ស្កាត់ការកាប់បំផ្លាញ់ព្រៃឈើ និងការដឹកជញ្ជូនជារៀងរាល់យប់ផង។
គេហទំព័ររស្មីក្រុងយើង មិនអាចសុំការទំនាក់ទំនងស្រាយបំភ្លឺពីលោក គង់ សារ៉េត នាយសង្កាត់រដ្ឋាលព្រៃឈើបាននៅឡើយទេចំពោះការចោទប្រកាន់ខាងលើនេះ ៕
ដោយ ៖ វិបុល
លោក គង់ សារ៉េត នាយរដ្ឋបាលព្រៃឈើស្រុកអន្លង់វែង ខេត្តឧត្តរមានជ័យ
ប្រជាពលរដ្ឋនៅភូមិសាមគ្គី ឃុំត្រពាំងប្រិយ ស្រុកអន្លង់វែង
ទិដ្ឋភាពឈូសឆាយដីព្រៃ ដើម្បីធ្វើស្រែចំការ
