រាជធានីភ្នំពេញ ៖ នៅរសៀលថ្ងៃទី១៣ ខែសីហា ឆ្នាំ២០២១នេះ អាជ្ញាធរខណ្ឌដូនពេញបានបើកប្រតិបត្តិការចុះបង្ក្រាបទីតាំងល្បែងដុសស្លែរជាយូរមកហើយ (ទីតាំងនេះមានអ្នកបើកបរឡានឲ្យជំទាវម្នាក់ដែលមានឥទ្ធិពលជាអ្នកកាងទីតាងល្បែងនោះ) មានលេងដូចជា អាប៉ោង និងមាន់ជល់អនឡាញ ជាដើម ស្ថិតនៅសង្កាត់វត្តភ្នំ ខណ្ឌដូនពេញ ចំកណ្តាលរាជធានីភ្នំពេញ ដោយឃាត់ខ្លួនមនុស្សចំនួន៣២នាក់ និងដកហូតម៉ូតូចំនួន១៤គ្រឿង ព្រមទាំងវត្ថុតាងមួយចំនួនទៀត។
ប្រតិបត្តិការបង្ក្រាបល្បែងស៊ីសងខាងលើនេះ ធ្វើឡើងក្រោមបទបញ្ជា និងដឹកនាំផ្ទាល់ពីលោក សុខ ពេញវុធ អភិបាលខណ្ឌដូនពេញ លោក ទៀង ចាន់សារ អធិការនគរបាលខណ្ឌ និងនាយករដ្ឋបាលខណ្ឌ លោក ចាប ឌីណា ព្រមទាំងកងកម្លាំងសមត្ថកិច្ច និងប្រជាការពារជាច្រើននាក់ផងដែរ។
លោក សុខ ពេញវុធ បានបញ្ជាក់ថា ក្រោយទទួលបានព័ត៌មានសំងាត់ស្តីពីល្បែងស៊ីសងខាងលើនេះ លោកបានសុំគោលការណ៍ពីអភិបាលរាជធានីភ្នំពេញ រួចដឹកនាំកម្លាំងចុះមកបង្ក្រាបតែម្តង ដោយឃាត់ខ្លួនមនុស្សជាក់ស្តែង ចំនួន៣២នាក់ ដកហូតម៉ូតូជាង១០គ្រឿង និងវត្ថុតាងមួយចំនួនទៀត។
លោកអភិបាលខណ្ឌបានបន្តថា សម្រាប់មនុស្សទាំងនេះ និងវត្ថុតាងត្រូវបានបញ្ជូនទៅកាន់អធិការដ្ឋាននគរបាលខណ្ឌដូនពេញ ដើម្បីធ្វើការសួរនាំ និងញែកឲ្យឃើញថាតើនរណាខ្លះជាម្ចាស់ទីតាំង និងអ្នកលេង រួចបន្តចាត់ការតាមច្បាប់មិនលើកលែងឲ្យឡើយ។
លោកថា ការលួចបើកបនល្បែងខុសច្បាប់ទាំងនេះ គឺបានបំពានវិធានការសុខាភិបាលក្នុងការប្រយុទ្ធប្រឆាំងជំងឺកូវីដ១៩ ដែលរាជរដ្ឋាភិបាល និងអាជ្ញាធរគ្រប់លំដាប់ថ្នាក់កំពុងតែប្រឹងប្រែង និងមួយទៀតបានធ្វើឲ្យប៉ះពាល់ដល់ ក្រុមយុវជនជំនាន់ក្រោយ ដែលជាទំពាំងស្នងឬស្សី។ សម្រាប់មនុស្សទាំងនេះ នឹងត្រូវធ្វើតេស្តរកកូវីដ ហើយបើករកឃើញវិជ្ជមានត្រូវបញ្ជូនទៅមណ្ឌលចត្តាឡីស័ក រួចពេលចប់នឹងចាត់ការបន្តតាមផ្លូវច្បាប់។
រដ្ឋបាលខណ្ឌដូនពេញ នៅតែបន្ដលើកទឹកចិត្តដល់បងប្អូនប្រជាពលរដ្ឋទូទៅឲ្យបន្ដរាយការណ៍មករដ្ឋបាលខណ្ឌ ឬអាជ្ញាធរមូលដ្ឋាន អំពីសភាពការណ៍បទល្មើសនានាដែលកើតមានក្នុងសហគមន៍ ដើម្បីឈានដល់ការបង្រ្កាប ទប់ស្កាត់ឲ្យបានទាន់ពេលវេលា សំដៅចូលរួមអនុវត្តគោលនយោបាយភូមិ-សង្កាត់ មានសុវត្ថិភាព របស់យើងផងដែរ។
ប្រជាពលរដ្ឋអាចទាក់ទងមកលេខទូរសព្ទរបស់លោកចំនួន២ខ្សែ រួមមាន៖ 012 25 68 68 និង 097 7 256 789 ដើម្បីចុះទៅបង្ក្រាបភ្លាមៗ៕
ដោយ ៖ សម្បត្តិ
