ភ្នំពេញ ៖ ក្រោយគេចខ្លួនបានមួយដង្ហើមចង្រិតមកស្រ្តីជើងខ្លាំងម្នាក់ ឈ្មោះ កែវ រតនៈ ហៅ ហ្គិច បន្ទាប់ពីធ្វើសកម្មភាព យកសាំងចាក់ដុត រោងចក្រកែឆ្នៃឈើកៅស៊ូ មួយកន្លែង ស្ថិតនៅឃុំពើក ស្រុកអង្គស្នួល ខេត្តកណ្តាល នាវេលាម៉ោងជាង១០ព្រឹកថ្ងៃទី១៦ ខែមេសា ឆ្នាំ២០១៨នេះ ត្រូវបានកម្លាំងអាវុធហត្ថក្រុងភ្នំពេញធ្វើការឃាត់ រួចបញ្ជូនទៅឲ្យសមត្ថកិច្ចខេត្តកណ្តាល ចាត់ការបន្ត។
ប្រភពបានអោយដឹងថានៅវេលាម៉ោងប្រហែល១០ព្រឹក ថ្ងៃទី១៦ ខែមេសា ឆ្នាំ២០១៨ មានហេតុការណ៍អគ្គិភ័យមួយបានកើតឡើង នៅរោងចក្រផលិតកែឆ្នៃគ្រឿងសង្ហារឹម ស្ថិតនៅក្នុងឃុំពើក ស្រុកអង្គស្នួល ខេត្តកណ្តាល។
តាមប្រភពព័តមាន ពីកន្លែងកើតហេតុ បានឲ្យដឹងថា អគ្គិភ័យដ៏សន្ធោសន្ធៅនេះ ផ្តើមឡើងដោយស្រ្តីម្នាក់ឈ្មោះ កែវ រតនៈ ហៅហ្គិច ប្រើធុងសាំងចាក់ដុតបំផ្លាញតែម្តង ដោយមិនបានដឹងពីមូលហេតុអ្វីនោះទេ។
ក្រោយបង្កហេតុរួច ស្រ្តីជើងខ្លាំងខាងខាងលើ បានចូលបើករថយន្ត Lexus 570 ពណ៌ ខ្មៅ ពាក់ស្លាកលេខ ខម 02 6762 ធ្វើសកម្មភាពគេច ហើយត្រូវបានសមត្ថកិច្ចកងរាជអាវុធហត្ថរាជធានីភ្នំពេញ ឃាត់ចាប់បាននៅចំនុចសង្កាត់ទឹកល្អក់៣ ខណ្ឌទួលគោក រួចបញ្ជូនទៅបញ្ជាការដ្ឋាន កងរាជអាវុធហត្ថរាជធានីភ្នំពេញ ចាត់ការតាមនីតិវិធី។
សូមបញ្ជាក់ថា ឈ្មោះ កែវ រតន: ហៅ ហ្គិច ខាងលើនេះ ធ្លាប់ប្រព្រឹត្តបទល្មើសជាច្រើនសារមកហើយ ដោយកាលពីដប់ឆ្នាំមុខ ធ្លាប់បានតុលាការផ្តន្ទាទោសពីបទ បាញ់បោះសេរី និងប្រើប្រាស់អាវុធខុសច្បាប់ និងក្រោយមកចុងឆ្នាំ២០១៦កន្លងទៅ បើកបរក្រោមឥទ្ធិពលគ្រឿងស្រវឹង បង្កគ្រោះថ្នាក់ធ្ងន់ធ្ងរដល់យុវជន២រូប ត្រូវបានតុលាការសម្រេចឃុំ ខ្លួនដាក់ពន្ធនាគារផងដែរ៕
ដោយ ៖ សុភាព
