ខេត្តឧត្ដរមានជ័យ ៖ មិនដឹងថាលោក ជុំ សំនិត អតីតប្រធានសាខាពន្ធដារខេត្តឧត្ដរមានជ័យអស់ប្រាក់ប៉ុន្មានហើយនោះទេក្នុងការរត់ការចូលកាន់មុខតំណែងចាស់វិញ ក្រោយពេលអគ្គបណ្ឌិតសភាចារ្យ អូន ព័ន្ធមុនីរ័ត្ន រដ្ឋមន្រ្ដីក្រសួងសេដ្ឋកិច្ច និងហិរញ្ញវត្ថុ ដាក់ឱ្យស្ថិតនៅក្នុងភាពទំនេរអត់ប្រាក់បៀវត្សចាប់ពីថ្ងៃទី១ ខែមិថុនា ឆ្នាំ២០២០ កន្លងទៅថ្មីៗនេះដើម្បីទុកឲតុលាការចាត់ការតាមនីតិវិធីច្បាប់ជាធរមាន។
សេចក្តីរាយការណ៍មកថា លោក ជុំ សំនិត ត្រូវបានពលរដ្ឋខេត្តឧត្ដរមានជ័យ ប្ដឹងទៅតុលាការ និងប្ដឹងទៅក្រសួងសេដ្ឋកិច្ច និងហិរញ្ញវត្ថុ ជុំវិញរឿងអាស្រូវដែលប្រើតួនាទី និងអំណាចគាបសង្កត់យកប្រាក់ ហើយមិនបានបំពេញកាតព្វកិច្ច។
លោក ជុំ សំនិត មិនត្រូវបានពលរដ្ឋស្វាគមន៍ឱ្យវិលត្រឡប់មកបម្រើការក្នុងខេត្តឧត្ដរមានជ័យ តទៅទៀតទេ ព្រោះលោកបានកាន់តំណែងជាប្រធានសាខាពន្ធដារខេត្តឧត្ដរមានជ័យ ជាង១៥ឆ្នាំ មកនេះ បានធ្វើឱ្យពលរដ្ឋរងគ្រោះដោយសារតែការគាបសង្កត់ច្រើនករណីណាស់ ទើបពួកគាត់ប្ដឹងករណីនេះទៅថ្នាក់លើ។
សូមបញ្ជាក់ថា លោក ជុំ សំនិត ធ្លាប់មានរឿងអាស្រូវយកស្រ្ដីជាមន្រ្ដីជាប់កិច្ចសន្យាធ្វើជាកំណាន់ចិត្តក្បត់ភរិយា បញ្ចូលឈ្មោះកូនស្រីរបស់ខ្លួនជាមន្រ្ដីជាប់កិច្ចសន្យាតែមិនចូលបម្រើការងារទេ គឺបើកយកតែប្រាក់បៀវត្ស (ប្រាក់រដ្ឋរាប់ឆ្នាំ) និងដឹកនាំទំនិញឆ្លងដែនកម្ពុជា-ថៃ តាមច្រកទ្វារអន្តរជាតិអូរស្មាច់ជាច្រើនឆ្នាំ ដូចជា ទឹកសុទ្ធ ស្រា និងស្រាបៀរយកទៅលក់នៅទីក្រុងភ្នំពេញគ្មានបង់ពន្ធជូនរដ្ឋ និងយករថយន្ដអង្គភាពដឹកជញ្ជូនទំនិញអត់ពន្ធ។
ករណីនេះ ធ្វើឱ្យពលរដ្ឋអស់ជំនឿអស់ទំនុកចិត្ដ មានការព្រួយបារម្ភ និងភ័យខ្លាចយ៉ាងខ្លាំង។ ពលរដ្ឋនៅខេត្តឧត្ដរមានជ័យ សូមអំពាវនាវ និងសង្ឃឹមយ៉ាងមុតមាំថា បណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្រ្ដីក្រសួងសេដ្ឋកិច្ច និងហិរញ្ញវត្ថុ ជួយសម្រួលដកមុខងារលោក ជុំ សំនិត ទៅកន្លែងផ្សេងវិញផង។ ព្រោះថានៅខេត្តឧត្ដរមានជ័យ ពលរដ្ឋរងគ្រោះច្រើនណាស់ដោយសារលោក ជុំ សំនិត។
ជំុវិញករណីការចោទប្រកាន់ខាងលើនេះអង្គភាពគេហទំព័រ www.rskynews.com យើងមិនអាចស្នើសុំការបកស្រាយពីលោក ជុំ សំនិត បានទេដោយគ្មានលេខទូរស័ព្ទ៕
ដោយ : វិបុល
