រាជធានីភ្នំពេញ : កម្លាំងនគរបាលព្រហ្មទណ្ឌកម្រិតស្រាល ទទួលបានបទបញ្ជារពីឯកឧត្តមឧត្តសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានធ្វើការឆ្មក់បង្ក្រាបទីតាំងល្បែងជល់មាន់ខុសច្បាប់មួយកន្លែង ឃាត់បានមនុស្ស១៣នាក់ ម៉ូតូ១៣គ្រឿង មាន់៤ក្បាល។
ប្រតិបត្តិការណ៍បង្ក្រាបនេះធ្វើឡើងនៅវេលាម៉ោង១១ព្រឹក ថ្ងៃទី២៨ ខែវិច្ឆិកា ឆ្នាំ២០២០ នៅក្រោមដើមឈើគុម្ភព្រៃត្រែងច្រាំងទន្លេ ខាងជើងស្ពានបាឡេ ស្ថិតក្នុងភូមិដើមគ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
មុនឈានដល់ការចុះបង្ក្រាបខាង គឺទទួលបានបញ្ជាររបស់ឯកឧត្តមឧត្តសេនីយ៍ឯក ស ថេត ស្នងការនគរបាលរាជធានីភ្នំពេញ ដោយមានការរាយការណ៍ពីសំណាក់ប្រជាពលរដ្ឋល្អ បានផ្តល់ព័ត៌មានថា នៅចំណុចទីតាំងខាងលើមាន មានក្រុមអ្នកនិយមល្បែងជល់មាន់ យ៉ាងច្រើនកុះករ ។
ទើបនៅព្រឹកថ្ងៃទី២៨ ខែវិច្ឆិកា ឆ្នាំ២០២០ នេះ លោកវរសេនីយ៍ឯក ប៊ុត សត្យា នាយកការិយាល័យ អនុញ្ញាតឲ្យលោកវរសេនីយ៍ទោ រ៉េត ស៊ីណែត លោកវរសេនីយ៍ទោ អួត សំណាង លោកវរសេនីយ៍ទោ ភឿន សុផាត បានដឹកនាំកម្លាំងចុះបង្ក្រាបជាក់ស្តែងតែម្តង។
ប្រតិបត្តិការបង្ក្រាបខាងលើនេះ ឃាត់បានក្រុមអ្នកញៀនល្បែងជល់មាន់បាន ១៣ នាក់ ម៉ូតូ១៣គ្រឿង មាន់ជល់៤ក្បាល បញ្ចូនទៅកសាងសំណុំរឿងនៅឯការិយាល័យ ព្រហ្មទណ្ឌកម្រិតស្រាលរាជធានីភ្នំពេញដើម្បីចាត់ការតាមនិតិវិធីច្បាប់៕
ដោយ : វិបុល
