ខេត្តតាកែវ ៖ ដោយអនុវត្តតាមបទបញ្ជាយ៉ាងម៉ឺងម៉ាត់ពីសំណាក់ ឯកឧត្តម ឧត្តមសេនីយ៍ទោ សុខ សំណាង ស្នងការនៃស្នងការដ្ឋាននគរបាលខេត្តតាកែវ នៅថ្ងៃពុធ ១១រោចខែកត្តិក ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី១១ ខែវិច្ឆិកា ឆ្នាំ២០២០ វេលាម៉ោង១៣និង៤០នាទី លោកវរសេនីយ៍ឯក យ៉ុង ប៊ុនយ៉ុន អធិការនគរបាលស្រុកអង្គរបូរី បានដឹកនាំបញ្ជាកម្លាំងជំនាញអធិការដ្ឋាននគរបាលស្រុកអង្គរបូរី សហការជាមួយកម្លាំងប៉ុស្តិ៍នគរបាលរដ្ឋបាលពន្លៃ ចុះបង្ក្រាបករណីជួញដូរនិងចែកចាយសាធាតុញៀនខុសច្បាប់មួយករណីនៅចំណុចព្រែក៩០ ស្ថិតក្នុងភូមិអំពិល ឃុំពន្លៃ ស្រុកអង្គរបូរី ខេត្តតាកែវ។
ក្នុងប្រតិបត្តការបង្ក្រាបលោកវរសេនីយ៍ឯក យ៉ុង ប៊ុនយ៉ុន អធិការនគរបាលស្រុកអង្គរបូរី បានអោយប្រាប់អង្គភាពគេហទំព័រយើងថា ៖ សមត្ថកិច្ចរបស់លោកបានឃាត់ខ្លួនជនសង្ស័យជាមុខសញ្ញា ០១នាក់ ឈ្មោះ មាន ជឿន ភេទប្រុស អាយុ ៣៨ឆ្នាំ មុខរបរមិនពិតប្រាកដ (ជាមុខសញ្ញាចែកចាយយ៉ាងសកម្ម) មានទីលំនៅភូមិអំពិល ឃុំពន្លៃ ស្រុកអង្គរបូរី ខេត្តតាកែវ ព្រមទាំងដកហូតបានៈ
-ម្សៅក្រាមពណ៌សថ្លាចំនួន ០៣កញ្ចប់តូច
-ម៉ូតូមួយគ្រឿងម៉ាកSuzuki ផ្លាកលេខ តាកែវ 1A-9357
-ទូរស័ព្ទដៃចំនួន ០១គ្រឿងម៉ាកNokia ពណ៌ខ្មៅ
បច្ចុប្បន្នជនសង្ស័យនិងវត្ថុតាង ត្រូវបានកម្លាំងជំនាញកំពុងធ្វើការសាកសួរ និងកសាងសំណុំរឿងបញ្ជូនទៅស្នងការដ្ឋាននគរបាលខេត្តតាកែវចាត់ការតាមនិតិវិធី៕
ដោយ ៖ គង់ សឿន
