កំពង់ធំ ៖ ដោយអនុវត្តន៍តាមបទបញ្ជរបស់ ឯកឧត្ដមនាយឧត្តមសេនីយ៍ គន់ គីម អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ អគ្គលេខាធិការសមាគមអតីតយុទ្ធជនកម្ពុជា ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករង
កំពង់ធំ បានដឹកនាំសហការី អញ្ជើញចុះទៅប្រគល់ខ្នងផ្ទះទី៦២ ជូនអតីតយុទ្ធជន នៅឃុំឈូកខ្សាច់ ស្រុកបារាយណ៍ ខេត្តកំពង់ធំ ។
ខ្នងផ្ទះទី៦២ នេះដែលមានទំហំ (៤មx៦ម) សាងសង់ពីឈើខ្ពស់ពីដី ដំបូលនិងជញ្ជាំងស័ង្កសី ក្រាលក្តារដែលត្រូវចំណាយថវិកាក្នុងការសាងសង់អស់ទឹកប្រាក់ ៦,៣២០,០០០ រៀល (គិតទាំងថ្លៃឈ្នួលជាង) ត្រូវបានសាងសង់រួចរាល់ ហើយបានប្រគល់ជូនលោកពលបាលទោ សំ វុទ្ធី អាយុ ៥៨ ឆ្នាំ បានចូលបម្រើក្នុងជួរកងទ័ពនៅឆ្នាំ១៩៩០ នៅអង្គភាពវរសេនាតូចលេខ១ នៃយោធាខេត្តកំពង់ចាម នៅល្ងាចថ្ងៃទី១៦ ខែមីនា ឆ្នាំ២០១៨ ។
លោកពលបាលទោ សំ វុទ្ធី បានត្រូវរបួសជើងឆ្វេងនៅសមរភូមិខេត្តឧត្ដរមានជ័យក្នុងឆ្នាំ១៩៩៣ បច្ចុប្បន្នបានទទួលប្រាក់បៀវត្សប្រចាំខែពីរាជរដ្ឋាភិបាលផ្តល់ជូនក្នុងមួយខែចំនួន៤៣០,០០០រៀលផងដែរ ។ លោកពលបាលទោ សំ វុទ្ធី មានភរិយាឈ្មោះជៀម មាន អាយុ ៥៥ ឆ្នាំ មានកូនចំនួន៤នាក់ នៅក្នុងបន្ទុក និងបានចុះឈ្មោះបោះឆ្នោតទាំងអស់គ្នារួចហើយ បច្ចុប្បន្នរស់នៅភូមិសេរីសុខុម ឃុំឈូកខ្សាច់ ស្រុកបារាយណ៍ ខេត្តកំពង់ធំ ។
ក្នុងឱកាសសំណេះសំណាលនិងប្រគល់ផ្ទះថ្មីនៅថ្ងៃនេះ ឯកឧត្តម និងក្រុមការងារសមាគមអតីតយុទ្ធជនកម្ពុជាខេត្តកំពង់ធំ បានឧបត្ថម្ភជូនគាត់បន្ថែមទៀតមាន អង្ករចំនួន ៥០ គ.ក្រ ,មីយើងចំនួន ០២ កេស ,ទឹកត្រីទឹកស៊ីអ៉ីវ ០២ យួរ ,មុងជ្រលក់ថ្នាំចំនួន ០២ និងថវិកាចំនួន ៥០០,០០០ រៀល ។
លោកពលបាលទោ សំ វុទ្ធី និងក្រុមគ្រួសារ ព្រមទាំងប្រជាពលរដ្ឋ អាជ្ញាធរដែនដីឃុំ-ភូមិ បានអបអរសាទរ និងគោរពថ្លែងអំណរគុណចំពោះសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ព្រមទាំងបុត្រា-បុត្រី ចៅប្រុស-ចៅស្រី សូមបានជួបប្រទះតែនិងពុទ្ធពរបួនប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ហើយសូមប្តេជ្ញាគាំទ្រសម្តេចតេជោ ហ៊ុន សែន ជានាយករដ្ឋមន្ត្រីជារៀងរហូត ៕
ដោយ ៖ ប៊ុនថាន
