ខេត្តត្បូងឃ្មុំ ៖ នៅថ្ងៃច័ន្ទ ០៣រោច ខែជេស្ឋ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី០៨ ខែមិថុនា ឆ្នាំ២០២០ នៅវេលាម៉ោង ៤និង១០ នាទីកម្លាំងប៉ុស្តិ៍នគរបាលរដ្ឋបាលវិហារលួងចំនួន០៣នាក់ កម្លាំងប្រជាការពារភូមិចំនួន០៣នាក់ ក្រោមការចង្អុល បង្ហាញ និងបញ្ជាដោយផ្ទាល់ពីលោកវរៈសេនីយន៍ឯក ឈន សុធន់ អធិការ នៃអធិការនគរបាលក្រុងសួង បានចុះបង្រ្កាបសង្វៀនជល់មាន់សិ្ថតនៅចំនុចចំការស្វាយចន្នីខាងជើងភូមិថ្មី សង្កាត់វិហារលួង ក្រុងសួង ខេត្តត្បូងឃ្មុំ ។
ប្រភពពីសមត្ថកិច្ច ក្នុងប្រតិបត្តិការបង្ក្រាបកម្លាំងបានចាប់យកវត្ថុតាំងដូចជា :
១-ម៉ូតូចំនួន ០២ គ្រឿង
២-មាន់ចំនួន ០២ ក្បាល
៣-ទ្រុងចំនួន ០៣ ទ្រុង និង
សម្ភារៈមួយចំនួនទៀត ដុតកំទេចចោល នៅនឹងកន្លែងសង្វៀនជល់មាន់ ដោយឡែកពួកអ្នកញៀនល្បែងជល់មាន់ និងអាប៉ោងហាក់បីដូចដឹងមុនរត់ចែកជើងគ្នាសព្រាត។
ប្រជាពលរដ្ឋក្នុងក្រុងសួងបានអបអរសាទរអរគុណចំពោះការយកចិត្តទុកដាក់បង្ក្រាបបទល្មើសគ្រប់ប្រភេទ របស់លោក វរៈសេនីយន៍ឯក ឈន សុធន់ អធិការនគរបាលក្រុងសួង ជាពិសេសការបំផ្លាញលើទីតាំង មាន់ជល់ ដុះស្លែរដែល បានបើក លេងជាយូរឆ្នាំមកហើយ៕
ដោយ ៖ វិបុល
