ខេត្តកំពង់ឆ្នាំង ៖ ក្រោមការសម្របសម្រួលតាមផ្លូវច្បាប់ពីលោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង ក្នុងរយៈពេល ២ថ្ងៃគឺពីថ្ងៃទី ២០ដល់ថ្ងៃទី២២ កម្លាំងប្រឆាំងបទល្មើសគ្រឿងញៀន នៃស្នងការដ្ឋាននគរបាល ខេត្តកំពង់ឆ្នាំង ចុះបង្ក្រាបនិងឃាត់ខ្លួនអ្នកប្រើប្រាស់ និងអ្នកជួញដូរគ្រឿងញៀន ក្នុងស្រុកសាមគ្គឺមានជ័យបានចំនួន២០ នាក់ ក្នុងនោះចាប់តាមដីកានិងបទល្មើសជាក់ស្ដែង ។
ក្នុងប្រតិបត្តការបង្ក្រាបកម្លាំងជំនាញបានរឹបអូសយកវត្ថុតាងរួមមានម៉ូតូ១៣គ្រឿង, មនុស្សចំនួន២០នាក់,ឧបករណ៍ប្រើប្រាស់គ្រឿងញៀន រួមទាំងគ្រឿងញៀនមួយចំនួនទៀតផង។
ក្នុងករណីបង្ក្រាបការជួញដូរគ្រឿងញៀននេះ មហាជននៅក្នុងខេត្តកំពង់ឆ្នាំង បានសាទរ ចំពោះលោក អិុត សុធា ព្រះរាជអាជ្ញាអយ្យការ អមសាលាដំបូងខេត្តកំពង់ឆ្នាំង និងលោកស្នងការ នគរបាលខេត្តកំពង់ឆ្នាំង បានសហការ ដឹកនាំបង្ក្រាបគ្រឿងញៀន រួមទាំងបទល្មើសមួយចំនួនទៀត នៅក្នុងខេត្តកំពង់ឆ្នាំង ឲ្យមានការថយចុះ គួរឲ្យកត់សម្គាល់។
ទន្ទឹមនោះផងដែរ លោក អិុត សុធា ព្រះរាជអាជ្ញាខេត្ត បានកោតសរសើរដល់លោកស្នងការ នគរបាលខេត្តកំពង់ឆ្នាំង និងលោកស្នងការរងទទួលបន្ទុក ប្រយុទ្ធប្រឆាំងគ្រឿងញៀន គ្រប់ស្ថាប័ន ពាក់ព័ន្ធដែលបានសហការបង្រ្កាបបទល្មើស គ្រឿងញៀនបានល្អប្រសើរ ។
បន្ថែមលើនោះលោកសូមអំពាវនាវ ដល់បងប្អូនប្រជាពលរដ្ឋ នៅក្នុងសហគមន៍ សិស្សានុសិស្ស រួមទាំងក្រុមយុវជនទាំងឡាយ ឲ្យជៀសឆ្ងាយពីគ្រឿងញៀន ព្រោះគ្រឿងញៀន ជាអាវុធបំផ្លាញអនាគត បំផ្លាញប្រទេសជាតិ និងគ្រួសារខ្លួនឯង។
បច្ចុប្បន្នកម្លាំងជំនាញកំពុងធ្វើការសាកសួរជនសង្ស័យទាំងនៅស្នងការនគរបាលខេត្តមុននឹងបន្តបញូនទៅកាន់តុលាការចាត់ការតាមនីតិវិធីច្បាប់៕
ដោយ ៖ វិបុល
