ខេត្តរតនគិរី ៖ ប្រជាពលរដ្ឋ និងមន្ត្រីរាជការ ដែលមានឋាន:តូចតាចក្នុងខេត្ត បានស្នើដល់ ឯកឧត្តម ថង សាវុន អភិបាលខេត្តរតនគិរី គួរតែពិនិត្យ និងមានចំណាត់ការ លើ សកម្មភាពប្រព្រឹត្តបទល្មើសព្រៃឈើ ដឹកជញ្ជូនតាមម៉ូតូ និងរថយន្តតូច ធំ ជារៀងរាល់ថ្ងៃ រាល់យប់ ចេញពីតាមបណ្តាស្រុកមួយចំនួន ដូចជាស្រុកវើនសៃ ស្រុកតាវែង និងស្រុកអូរជុំ ឆ្ពោះចូលមកក្រុងបានលុង ដើម្បីយកមករក្សាទុកតាមលំនៅរបស់ក្រុមឈ្មួញ រងចាំឱកាសល្អនិងដឹកបន្តទៅប្រទេសវៀតណាម។
ដោយឡែកឈ្មួញដែលដឹកជញ្ជូនឈើយ៉ាងសកម្មនេះ ត្រូវបានគេដឹងថា ឈ្មោះ ជា តែងបានដឹកឈើតាមរថយន្តសាំយ៉ុង ចាប់ពី៣ ទៅ៤គ្រឿងក្នុង១យប់ ចេញដំណើរពីចំណុចក្នុងក្រុងបានលុង ខេត្តរតនគិរី ឆ្លងកាត់ស្រុកចំនួន២ គឺស្រុកបរកែវ និងស្រុកអូរយ៉ាដាវ យ៉ាងតឹងរឹងបំផុត ឆ្ពោះទៅកាន់ច្រកទ្វារអន្តជាតិអូរយ៉ាដាវ បានយ៉ាងរលូន។
សេចក្តីរាយការណ៍បានឲ្យដឹងថា៖ ក្រៅពីមេឈ្មួញឈ្មោះ ជា ក៏នៅមានឈ្មួញជាច្រើននាក់ទៀត កំពុងផ្គើននិងអនុវត្តច្បាប់ របស់គណ:កម្មាការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ជាពិសេសនោះ គឺកំពុងតែផ្គើននឹង បទបញ្ជារបស់ប្រមុខរាជរដ្ឋាភិបាលកម្ពុជាផងដែរ។
សកម្មភាពរបស់ឈ្មួញខាងលើនេះក៏តម្រូវឲ្យថ្នាក់ដឹកនាំខេត្ត ឬសមត្ថកិច្ចគ្រប់ជាន់ថ្នាក់ ដែលមានតួនាទី បង្ក្រាបបទល្មើសធនធានធម្មជាតិ គួរតែធ្វើការត្រួតពិនិត្យ និងមានចំណាត់ការ លើករណីនេះផងទាន៕
ដោយ ៖ វិបុល
