ខេត្តកំពង់ធំ ៖ នៅថ្ងៃ ពុធ ៧រោចខែ ពិសាខ ឆ្នាំជូត ទោស័ក ព.ស២៥៦៤ត្រូវនឹងថ្ងៃទី ១៣ ខែ ឧសភា ឆ្នាំ២០២០ វេលាម៉ោង ១១ និង ៤០នាទី ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ និងដោយមានការសម្របសម្រួលនីតិវិធីពីលោក ស៊ិន វិរ: ព្រះរាជអាជ្ញាអមសាលាដំបូងខេត្តកំពង់ធំ កម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តកំពង់ធំ បានសហការជាមួយកម្លាំងអធិការដ្ឋាននគរបាលស្រុកសណ្ដាន់ បង្ក្រាបបទល្មើសគ្រឿងញៀន០១ករណី ស្ថិតក្នុងភូមិឈើទាល ឃុំឈើទាល ស្រុកសណ្តាន់ ខេត្តកំពង់ធំ ឃាត់ខ្លួនជនសង្ស័យចំនួន០៣ នាក់ និងដកហូតបានម្សៅក្រាមពណ៍ សថ្លា សង្ស័យជាសារធាតុញៀនខុសច្បាប់ចំនួន ០៤ កញ្ចប់ និងទូរស័ព្ទដៃចំនួន ០២ គ្រឿង និងឃាត់់ខ្លួន :
១-ឈ្មោះ គង់ ណាង ភេទ ប្រុស អាយុ ៣៩ ឆ្នាំមុខរបរ លក់ដូរ រស់នៅភូមិ ឈើទាល ឃុំឈើទាល ស្រុកសណ្ដាន់ ខេត្តកំពង់ធំ ។
២-ឈ្មោះ ជា សុជាតិ ភេទ ប្រុស អាយុ ៣២ ឆ្នាំ មុខរបរជាងម៉ូតូ រស់នៅភូមិសណ្ដាន់ ឃុំសណ្ដាន់ ស្រុកសណ្ដាន់ ខេត្តកំពង់ធំ ។
៣-ឈ្មោះ ណាំង គឹមឈឿង ភេទ ប្រុស អាយុ ៣២ ឆ្នាំ មុខរបរ ស្រែចំការ រស់នៅភូមិសណ្ដាន់ ឃុំសណ្ដាន់ ស្រុកសណ្តាន់ ខេត្តកំពង់ធំ ។
ករណីខាងនេះសមត្ថភាពជំនាញ បាននាំខ្លួនជនសង្ស័យ និងវត្ថុតាង មកកាន់ការិយាល័យប្រឆាំងគ្រឿងញៀង នៃស្នងការដ្ឋាននគរបាលខេត្តកំពង់ធំ ដើម្បីកសាងនីតិវិធី ចាត់ការបន្ត ។
សូមបញ្ជាក់ថាជានិច្ចកាល លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ តែងតែសំណូមដល់មហាជនទូទៅ ត្រូវចាត់ទុកការងារប្រយុទ្ធ ប្រឆាំងបទល្មើសគ្រឿងញៀន ជាកិច្ចការងាររួមសម្រាប់ យើងទាំងអស់គ្នា ពោលគឺចូលរួមសហការ ជាមួយកម្លាំងសមត្ថកិច្ច ដើម្បើឈានទៅទប់ស្កាត់ លុបបំបាត់ បទល្មើស គ្រឿងញៀន ចេញពីមូលដ្ឋានរបស់បងប្អូន ៕
ដោយ : វិបុល
