ខេត្តកណ្តាល ៖ ប្តីប្រពន្ធ២នាក់ បានជួបថ្នាក់ចរាចរណ៍នាវេលាយប់ថ្ងៃទី០៦ ខែឧសភា ឆ្នាំ២០២០ដោយរងរបួសរលាត់ដៃជើង និងមុខមាត់ ក៏បាននាំគ្នាចូលទៅលាងរបួស និងព្យួរសេរ៉ូមម្នាក់១ប្លោក នៅមន្ទីរសម្រាកព្យាបាល និងសម្ភព សុធារិទ្ធបែកចាន ស្ថិតនៅផ្ទះលេខ៤០ ផ្លូវជាតិលេខ៤ ភូមិស្វាយជ្រុំ ឃុំបែកចាន ស្រុកអង្គឈ្នួល ខេត្តកណ្តាល ហួសចិត្តពេលចេញវិក័យបត្រអស់ចំនួន៧១០ដុល្លារស្ទើរទន់ជង្គង់ដួល សន្លប់។
ប្តីប្រពន្ធជនរងគ្រោះ បានប្រាប់ឲ្យដឹងថា ក្រោយពីពួកគាត់ជួបគ្រោះថ្នាក់ចរាចរណ៍ ក៏បាននាំគ្នាមកលាងមុខរបួស រុំដៃជើង និងព្យួរសេរ៉ូមអស់ម្នាក់១ប្លោក លុះពេលខាងមន្ទីរពេទ្យចេញវិក័យបត្របង់លុយចំនួន២សន្លឹក សរុបចូលគ្នាមានចំនួនទឹក ប្រាក់ដល់៧១០ដុល្លារ ធ្វើឲ្យពួកគាត់រន្ធត់ចិត្តជាខ្លាំង ហើយពេលនេះខាងមន្ទីរពេទ្យ បានបង្ខំឲ្យពួកគាត់យកលុយមកបង់ថ្លៃពេទ្យជាបន្ទាន់ បើដោះស្រាយមិនទាន់នោះទេត្រូវទុកម៉ូតូនៅទីនោះ សិនចាំយកលុយ មកគ្រប់ចំនួនចាំដោះស្រាយគ្នា។
ដោយឡែកលោក កូ គឹមហៀក គ្រូពេទ្យព្យាបាលនៅក្នុងមន្ទីរសម្រាកព្យាបាល និងសម្ភព សុធារិទ្ធបែកចាន បានផ្តល់បទ សម្ភាសន៏ដល់អង្គភាពគេហទំព័រ www.rskynews.com យើងថា៖ ការផ្សព្វផ្សាយតាមបណ្តាញសង្គមព័ត៍មានមួយចំនួន ពីសំណាក់ប្តីប្រពន្ធខាងលើនោះគឺមិនពិតទេ ដោយមានចេតនាបំភ្លើសពីការពិតទាំងស្រុង។ លោកបានបន្ថែមថា ៖ អ្នកជម្ងឺ ទាំងពីរនាក់ប្តីប្រពន្ធនោះគឺរងគ្រោះថ្នាក់ចរាចរណ៏លក្ខណៈធ្ងន់ធ្ងរ ហើយចូលមកប្រើប្រាស់សេវានៅគ្លីនិករបស់លោក ដោយព្រមព្រៀងគ្នាមុនធ្វើការព្យាបាលជម្ងឺ សរុបអស់៧១០ដុល្លារ (ប្រសិនករណីមានការបែកបាក់ និងត្រូវបញ្ជូនទៅសង្ក្រោះនៅមន្ទីរពេទ្យ)។ ជាក់ស្តែងដោយប្តីត្រូវរបួសធ្ងន់ត្រូវព្យាបាលចំណាយអស់ចំនួន២៧០ដុល្លារ និងប្រពន្ធអស់ចំនួន១៨០ដុល្លារ សរុបរួមអស់ត្រឹម៤៥០ដុល្លារ ។ រីឯការចោទប្រកាន់ថាមន្ទីរព្យាបាលបង្ខំអោយទុកម៉ូតូជាថ្នូរនឹងការទូទាត់ប្រាក់ព្យាបាលនោះគឺមិនពិតឡើយ។
ប្តីប្រពន្ធជនរងគ្រោះ បញ្ជាក់ថា ពួកគាត់មានជីវភាពក្រីក្រណាស់ ពោលគឺរកមួយថ្ងៃសម្រាប់ហូប មួយថ្ងៃ ហើយគ្រាន់តែចូល លាងមុខរបួសរលាត់ដៃជើង និងព្យូរសេរ៉ូមម្នាក់១ប្លោកប៉ុណ្ណឹង ខាងមន្ទីរសម្រាកព្យាបាល និងសម្ភព សុធារិទ្ធបែកចាន គិតលុយថ្លៃបែបនេះ តើពួកគាត់រកប្រាក់ឯណាបានឲ្យនោះ ។ ពួកគាត់ សំណូមពរដល់ ក្រសួងសុខាភិបាលកម្ពុជា ក៏ដូច
សមត្ថកិច្ចពាក់ព័ន្ធ មេត្តាចុះត្រួតពិនិត្យមើលគ្លីនិកមួយនេះផង កុំឲ្យយកថ្លៃពេក ដែលរកស៊ីបែបនេះ មិនខុសចាប់ជំរិត យកលុយអ្នកជំងឺទេ៕
ដោយ ៖ វិបុល
