ខេត្តព្រៃវែង ៖ ដោយអនុវត្តតាមការណែនាំសេចក្តីប្រកាសរបស់រាជរដ្ឋាភិបាលក៏ដូចជាចូលរួមទប់ស្កាត់ការរីករាលដាលនូវឆ្លងនូវជម្ងឺ Covid19 កម្មករ កម្មការនីរោងចក្រនៅខេត្តព្រៃវែងទាំងអស់បានប្ដេជ្ញាចូលធ្វើការជាធម្មតា ដោយមិនមានការឈប់សម្រាកនោះទេ។
កម្មការិនី ឡូន ស្រីនាង ដែលជាប្រធានក្រុម C12 នៃរោងចក្រ ថប់ ស៊ី លី វើ លីមិតធិត បានលើកឡើងថា នឹងសហការចូលរួមជាមួយសេចក្តីប្រកាសរបស់រាជរដ្ឋាភិបាល និងក្រសួងសុខាភិបាលដើម្បីទប់ស្កាត់ជម្ងឺ Covid 19 ដោយនៅធ្វើការធម្មតាទោះបីជាថ្ងៃចូលឆ្នាំក៏ដោយ។
កម្មការិនីរូបនេះក៏បានបន្តទៀតថា ទោះបីជាចូលឆ្នាំថ្មីឆ្នាំនេះមានតែម្ដងក៏ពិតមែន ក៏ប៉ុន្តែបើយើងឆ្លងជម្ងឺ Covid19 នេះ យើងនឹងខាតបង់នូវប្រាក់ចំណូល ខាតបង់ពេលវេលា ហើយការសម្រេចចិត្តរបស់កម្មករកម្មការិនីទាំងអស់នេះ គឺដើម្បីបញ្ចៀសខ្លួនរបស់ពួកគាត់ ពីការជូបជុំ ដោយយើងមិនដឹងថានរណាម្នាក់ផ្ទុកនូវជម្ងឺ Covid19 នោះទេ។ ដូច្នេះ កុំឱ្យមានការឆ្លង នៅជម្ងឺ Covid19 មកដល់ខ្លួនគាត់ ក្រុមគ្រួសាររបស់គាត់ និងនៅក្នុងសហគមន៍របស់គាត់ គឺគាត់សម្រេចចិត្តនៅធ្វើការជាធម្មតា។
នៅក្នុងនោះបងប្អូនកម្មករកម្មការិនីបានបន្តទៀតថានៅក្នុងរោងចក្រនីមួយៗនៅក្នុងខេត្តព្រៃវែង គឺបានអនុវត្តយ៉ាងត្រឹមត្រូវតាមការណែនាំរបស់ក្រសួងសុខាភិបាលដោយមានការបាញ់កម្តៅ លាងដៃនិងទឹកអាកុលជាប្រចាំ ។
លោក ណុប សាវ៉ាត ដែលជាប្រធានមន្ទីរ ការងារ បណ្តុះបណ្តាលវិជាជីវៈ ខេត្តព្រៃវែង បានគាំទ្រនូវសកម្មភាព និងការយល់ដឹងរបស់កម្មករ កម្មការិនី ទាំងអស់ ដែលបានអនុវត្តតាមសេចក្តីប្រកាសរបស់រាជរដ្ឋាភិបាល ដោយនៅតែខិតខំបំពេញការងារ ដែលជាប្រភពប្រាក់ចំណូលសម្រាប់ចិញ្ចឹមជីវភាពរបស់គាត់ ហើយក៏ជាការកាត់បន្ថយការជួបជុំគ្នាក្នុងឱកាសចូលឆ្នាំថ្មីនេះ កុំឱ្យមានការឆ្លងរីករាលដាលនូវជម្ងឺ Covid 19 នេះពីម្នាក់ ទៅម្នាក់ ពីគ្រួសារ ទៅគ្រួសារ និងដើម្បីប្រទេសកម្ពុជាយើងជាសផុតពីជម្ងឺដ៏កាចសាហាវមួយនេះ។
លោកប្រធានមន្ទីរក៏បានលើកឡើងដែរថានៅក្នុងខេត្តព្រៃវែងមានរោងចក្រធំៗចំនួន ៣ ដែលមានកម្មករកម្មការិនីចំនួន ២,៦៥០ នោះផងដែ។
ដោយ ៖ វិបុល
