រាជធានីភ្នំពេញ៖ នៅថ្ងៃទី១១ ខែមេសា ឆ្នាំ២០២០ កម្លាំងនគរបាលព្រហ្មទណ្ឌក្រសួងមហាផ្ទៃ ដោយគោរពតាមគោលការណែនាំ និងបទបញ្ជាពីឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិកម្ពុជា និងមានការយកចិត្តទុក ដាក់ខ្ពស់លើកិច្ចការ ងារជំនាញ ឯកឧត្តម ឧត្តមសេនីយ៍ឯក ង៉េង ជួរ ប្រធាននាយកដ្ឋាននគរបាលព្រហ្មទណ្ឌ ក្រសួងមហាផ្ទៃ បានចាត់តាំង កម្លាំងក្រោមឱវាទចុះអនុវត្តដីកាបង្គាប់ឲចាប់ខ្លួនលេខ៨៩០ អ.យ.វ ចុះថ្ងៃទី០៩ ខែមីនា ឆ្នាំ២០១៨ ចេញដោយលោក រៀល សុភិន ព្រះរាជអាជ្ញារងរាជធានីភ្នំពេញ។
ដីកាបង្គាប់ចាប់ខ្លួនឈ្មោះ សំអឿន សម្បត្តិ ហៅ បារាំង ភេទប្រុស អាយុ២៨ឆ្នាំ ជនជាតិខ្មែរ ។ បទល្មើស : ហឹង្សាដោយចេតនាមានស្ថានទម្ងន់ទោស ប្រព្រឹត្តនៅភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ កាលពីថ្ងៃទី០២ ខែមីនា ឆ្នាំ២០១៥។
ក្រោយពីថ្ងៃបង្កហេតុរួចជាប់ជាបចោទបានរត់គេចខ្លួនទៅរស់នៅខេត្តបាត់ដំបងមួយរយៈ ទើបនៅថ្ងៃទី០៩ ខែមេសា ឆ្នាំ២០២០ ជនជាប់ចោទបានចូលមកលួចស្នាក់នៅភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ ។
លុះនៅវេលាម៉ោង១១.៣០នាទីព្រឹកថ្ងៃទី១១ ខែមេសាឆ្នាំ២០២០ ដើមបណ្តឹងបានឃើញហើយរាយការណ៏ជូននគរបាលព្រហ្មទណ្ឌក្រសួងមហាផ្ទៃ ការិយាល័យគ្រប់គ្រង និងអនុវត្តដីកា ដើម្បីចុះអនុវត្តដីកាបង្គាប់ចាប់ខ្លួនជនជាប់ចោទឈ្មោះ សំអឿន សម្បត្តិ ហៅ បារាំង ប្រគល់ជូនតុលាការដើម្បីអនុវត្តតាមនិតីវិធី៕
ដោយ : វិបុល
