ខេត្តមណ្ឌលគិរី ៖ ជនសង្ស័យ៣នាក់ក្នុងចំណោម ៥នាក់ ត្រូវកម្លាំងកងរាជអាវុធហត្ថខេត្តមណ្ឌលគិរីឃាត់ខ្លួន បន្ទាប់ពីលើកគ្នាទៅរំដោះជនត្រូវចោទ ឈ្មោះ ទួច ហឿន ក្នុងសំណុំរឿងព្រហ្មទណ្ឌ «ប្រើប្រាស់ហិង្សាលើអ្នកកាន់កាប់អចលនវត្ថុ » ដល់តុលាការខេត្តមណ្ឌលគិរី ។
លោកឧត្តមសេនីយ៍ត្រី ហែម បូណារ៉ែល មេបញ្ជាការកងរាជអាវុធហត្ថខេត្តមណ្ឌលគិរី បានឲ្យអង្គភាពគេហទំព័រ www.rskynews.com ដឹងតាមទូរស័ព្ទនារសៀលថ្ងៃទី០៦ ខែមេសា ឆ្នាំ២០២០ ថាពិតជាមានករណីឃាត់ខ្លួនមនុស្ស៣នាក់មែនខណៈពួកគាត់បាននាំគ្នាទៅរំដោះជនត្រូវចោទដល់តុលាការកាលពីវេលាម៉ោង៨និង១០នាទីយប់ថ្ងៃទី០៥ ខែមេសា ឆ្នាំ២០២០។ លោកបន្តថា ក្នុងនោះឃាត់ខ្លួនបាន៣នាក់រួមមាន៖ ស្ត្រីជាម្តាយ ប្រពន្ធ និងបងប្រុសបង្កើត របស់ជនត្រូវចោទ ហើយ២នាក់ទៀតរត់គេចខ្លួន ក្នុងនោះមានឪពុកជនត្រូវចោទម្នាក់ផងដែរ។ បច្ចុប្បន្នជនសង្ស័យទាំង៣នាក់ កំពុងត្រូវបានសាកសួរដោយសមត្ថកិច្ចអាវុធហត្ថខេត្តដើម្បីបញ្ជូនទៅតំណាងអយ្យការបន្ត ។
សូមបញ្ជាក់ថា ឈ្មួញរកសុីដីម្នាក់ត្រូវកម្លាំងរាជអាវុធហត្ថខេត្តមណ្ឌលគិរីចាប់វាយខ្នោះ បន្ទាប់ពីទទួលពាក្យបណ្តឹងពាក់ព័ន្ធរឿងប្រើប្រាស់ហិង្សាលើអ្នកកាន់កាប់អចលនវត្ថុ ហើយលួចបន្លំលក់ដីថ្នាក់លើៗថែមទៀត។ តាមសេចក្តីរាយការណ៍បានឲ្យដឹងថា ជនត្រូវចោទឈ្មោះ ទួច ហឿន អតីតជាគ្រូបង្រៀន ហើយបច្ចុប្បន្នជាឈ្មួញរកសុីដីមានឥទ្ធិពលម្នាក់ ត្រូវបានកម្លាំងកងរាជអាវុធហត្ថខេត្តមណ្ឌលគិរីឃាត់ខ្លួន កាលពីនាវេលារសៀលថ្ងៃទី០៣ ខែមេសា ឆ្នាំ២០២០ ដោយអនុវត្តតាមដីកាចាត់ឲ្យស៊ើបសួរជំនួសរបស់តុលាការពាក់ព័ន្ធនិងករណីប្រើប្រាស់ហិង្សាលើអ្នកកាន់កាប់អចលនវត្ថុតាមមាត្រា២៤៨ នៃច្បាប់ភូមិបាល ៕
ដោយ ៖ វិបុល
