ខេត្តក្រចេះ ៖ យោងតាមសេចក្តីរាយការណ៏យ៉ាងច្បាស់បានឲ្យដឹងថា នៅថ្ងៃទី១៨ ខែមីនាឆ្នាំ២០២០មេឈ្មួញឈើដុះស្លែរឈ្មោះចាន់ ម៉េងហាំង (ហៅចាន់) បានកេណ្ឌគរបក្ខពួករបស់ខ្លួនធ្វើការជញ្ជូនឈើចេញពីតបន់ព្រៃឡង់ដឹកតាមរ៉ឺម៉ក និងគោយន្តនិងរថយន្តសាំយ៉ុងរួចបន្តដឹកតាមទូកធ្វើការចែកចាយទៅតាមបណ្តាស្រុកនិងខេត្តមួយចំនួនយ៉ាងអាណាធិបតេយ្យដោយមិនរំខានដំណេកមន្ត្រីជំនាញជាពិសេសលោក វ៉ា ថន អភិបាលខេត្តក្រចេះតែម្តង ដោយសម្ងំរក្សាភាពស្ងៀមស្ងាត់ទុកឲ្យឈ្មួញឈើឈ្មោះចាន់ ម៉េងហាំងហៅចាន់ដឹកជញ្ជូនឈើយ៉ាងអាណាធិបតេយ្យ។
តាមប្រភពបានអោយដឹងថា បានជាមេឈ្មួញឈើឈ្មោះចាន់ ម៉េងហាំងហៅចាន់ហ៊ានធ្វើអ្វីៗបានតាមអំពើចិត្តគឺដោយសារមានខ្នងបង្អែកមេប៉េអុឹមរងខេត្តមួយរូបជាអ្នកចាត់ចែងនិងសំរួលផ្លូវអោយឈ្មោះចាន់ដឹកជញ្ជូនឈើទើបបានជាលោកឧត្តមសេនីយ៏ត្រី សាន្ត ប៊ុនថាន មេបញ្ចាការអាវុធហត្ថខេត្តក្រចេះមិនហ៊ានបង្ក្រាបដោយទើសទាល់ថ្នាក់ក្រោមរបស់ខ្លួន។
សេចក្តីរាយការណ៏ដដែលបានបន្តថាមួយរយះនេះ មេឈ្មួញឈើដ៏សកម្មនិងលេចធ្លោប្រចាំអាណាចក្រខេត្តក្រចេះឈ្មោះចាន់ ម៉េងហាំង ហៅចាន់ អាចចូលដឹកនិងជញ្ជូនឈើចេញពីតំបន់ព្រៃឡង់បានតាមអំពើចិត្តគឺដោយមានការត្រូវរ៉ូវគ្នាជាមួយសមត្តកិច្ចឈរជើងនៅតំបន់នោះនិងនៅតាមផ្លូវទើបទៅរួច? ហើយបានជាព្រៃឡង់រងនូវការកាប់បំផ្លាញស្ទើរគ្មានសល់។
ប្រភពដដែលបានបន្តថាមេឈ្មួញឈើឈ្មោះចាន់ ម៉េងហាំងហៅចាន់អាចដឹកឈើក្នុងព្រៃឡង់បានប្រជាពលរដ្ធដាក់ការសង្ស័យទៅលើមន្ត្រីជំនាញពាក់ពន្ធ័និងអាជ្ញាធរជាអ្នកផ្តល់ភ្លើងខៀវអោយមេឈ្មួញរូបនេះជាពិសេសលោក វ៉ា ថន អភិបាលខេត្តក្រចេះតែម្តងមិនមានវិធានការបង្ក្រាបនិងទប់ស្កាត់ការចរាចរណ៏ឈើនៅក្នុងដែនខ្លួនគ្រប់គ្រងអោយមានប្រសិទ្ធភាពឡើយ?
តាមការអោយដឹងពីសកម្មជនការពារព្រៃឡង់បានអោយដឹងថាព្រៃឡង់សព្វថ្ងៃរងនូវការកាប់បំផ្លាញពីសំណាក់ជនមួយចំនួនបានឃុបឃិតគ្នាមួយនិងឈ្មួញឈើនិងសមត្តកិច្ចគ្រប់លំដាប់ថ្នាក់ជាអ្នកបើកដៃអោយឈ្មួញចូលកាប់និងដឹកឈើចេញជាថ្នូរមិនបង្ក្រាប? សកម្មជនដដែលបានបន្តថាព្រៃឡង់ដែលលាតសន្ធឺងនិងគ្របដណ្តប់៤ខេត្តដូចជាខេត្តក្រចេះ ខេត្តកំពង់ធំ ខេត្តព្រះវិហារ និងខេត្តស្ទឹងត្រែង រងនូវការទន្ទ្រាននិងកាប់ស្ទើគ្មានសល់។
ប្រជាពលរដ្ឋសំណូមពរយ៉ាងទទូចសុំអោយលោក សាន្ត ប៊ុនថាន មេអាវុធហត្ថខេត្តក្រចេះ និងលោកលន់ សុផាត ស្នងការនគរបាលខេត្តជាពិសេស លោក វ៉ា ថន គណះនៃគណះអភិបាលខេត្តក្រចេះ គួរមានវិធានការបង្ក្រាបនិងទប់ស្កាត់ការដឹកជញ្ជូនឈើអោយមានប្រសិទ្ធភាពដើម្បីរក្សានិងការពារធនធានធម្មជាតិដែលនៅសេសសល់បន្តិចបន្តួចអោយនៅគង់វង្សដើម្បីមនុស្សជាតិទាំងមូលជាពិសេសព្រៃឈើនៅតំបន់ព្រៃឡង់សុឹងក្លាយជាព្រៃរហោឋានអស់ទៅហើយ។
ករណីការដឹកជញ្ជូនឈើរបស់មេឈ្មួញឈើឈ្មោះចាន់ ម៉េងហាំងហៅចាន់ខាងលើ គេហទំព័រ www.rskynews.com មិនអាចសុំការបំភ្លឺពីលោកវ៉ា ថន អភិបាលខេត្តក្រចេះបានឡើយនៅរសៀលថ្ងៃទី១៩ខែមីនាឆ្នាំ២០២០បានឡើយដោយទូរស័ព្ឌខលចូលគ្មានអ្នកទទួល។ដោយឡែកលោកទ្រី សុភក្រ្ត័ប្រធានមន្ទីរកសិកម្មរុក្ខាប្រមាញ់និងនេសាទខេត្តក្រចេះមិនលើកទូរស័ព្ទ៕
ដោយ៖ មិន ហ៊ុន
