សម្តេច​អគ្គ​មហា​ព​ញា​ចក្រី ​ហេង ​សំរិន​ ជួប​ពិ​ភាក្សា​ការ​ងារ​ទ្វេ​ភា​គី​ជា​មួយ​ឯក​ឧត្តម​ តូនី ​ស្មីត​ ប្រ​ធាន​រដ្ឋ​សភា​អូស្ត្រា​លី ​ដើម្បី​ពង្រឹង​កិច្ច​ស​ហ​ប្រ​តិ​បត្តិ​ការ​សភា​ប្រ​ទេស​ទំាង​ពីរ

ឯកឧត្តមប្រធានរដ្ឋសភាអូស្រ្តាលី បានថ្លែងអំណរគុណយ៉ាងជ្រាលជ្រៅចំពោះសម្តេចប្រធានរដ្ឋដែលបាន ដឹកនាំគណៈប្រតិភូសភាកម្ពុជាមក ចូល រួមកិច្ចប្រជុំAPPF ក្នុងប្រទេសអូស្រ្តាលី នាពេលនេះ។ អូស្រ្តាលី បានសិក្សានិងដកស្រង់ពិសោធន៍ជាច្រើនពីសភាកម្ពុជា ដែលរៀបចំកិច្ចប្រជុំAPPF លើកទី២៧ កាលពីឆ្នាំ២០១៩ មុនសភាអូស្រ្តាលី។

សម្តេចអគ្គមហាពញាចក្រី ហេង សំរិន បានលើកឡើងពីសារៈសំខាន់របស់សភាអូស្រ្តាលីនៅក្នុងវេទិកាអន្តរសភាក្នុងតំបន់ និង សកលលោក។ សម្តេចបានកោតសរសើរ និងវាយតម្លៃខ្ពស់ចំពោះការៀបចំកិច្ចប្រជុំ APPF លើកទី២៨នេះ ប្របកដោយខ្លឹមសារបង្ហាញសារៈសំខាន់ ពីកិច្ចសហប្រតិ បត្តិការល្អនូវសមាជិកAPPF ដើម្បីវិបុលភាពរបស់ប្រជាពលរដ្ឋ។

សម្តេចប្រធានរដ្ឋសភា បានថ្លែងអំណរគុណរដ្ឋាភិបាលនិងប្រជាជនអូស្រ្តាលី ដែលបានរួមវិភាគទានយ៉ាងធំធេង ក្នុងដំណាក់កាលស្វែងរកសន្តិភាព និងក៏ដូចជាការអភិវឌ្ឍន៍នៅកម្ពុជា។ បច្ចុប្បន្នអូស្រ្តាលី ជាដៃគូអភិវឌ្ឍដ៏សំខាន់របស់កម្ពុជា ស្ទើរគ្រប់វិស័យ។

ឆ្លៀតឱកាសនេះ សម្តេចបានស្នើសភា និងរដ្ឋាភិបាល អូស្ត្រាលី បន្តគាំទ្រកម្ពុជាជាបន្តទៀត ជាពិសេសជួយជម្រុញវិនិយោគ និងទេសចរណ៍ពី អូស្ត្រាលី ទៅកម្ពុជា និងជួយបណ្តុះបណ្តាលធនធានមនុស្សដល់កម្ពុជានិងបង្កើនចំនួនអាហារូបករណ៍ដល់និស្សិត កម្ពុជាមកសិក្សានៅអូស្រ្តាលី ពីព្រោះការអភិវឌ្ឍន៍ នៅកម្ពុជាសព្វថ្ងៃ ត្រូវការធនធានមនុស្ស ជាចាំបាច់ ។

សម្តេចអគ្គមហាពញាចក្រី បានគោរពអញ្ជើញ ឯកឧត្តម តូនី ស្មីត បំពេញទស្សនកិច្ចផ្លូវការនិងមិត្តភាពនៅកម្ពុជា និងចូលរួម កិច្ចប្រជុំភាពជាដៃ គូសភា អាស៊ី – អ៊ឺរ៉ុប លើកទី១១ ដែលសភាកម្ពុជាធ្វើជាម្ចាស់ផ្ទះនៅចុងឆ្នាំ២០២០ខាងមុខនេះ។

ឯកឧត្តម តូនី ស្មីត ប្រធានរដ្ឋសភាអូស្រ្តាលី បានទទួលយកសំណើនិងការលើកឡើងរបស់សម្តេចប្រធានរដ្ឋសភា។ ឯកឧត្តមមានក្តីរីករាយ ចំពោះ ចំណងមិត្តភាពនិងកិច្ចសហប្រតិបត្តិការរវាងសភាប្រទេសទំាងពីរមានការរីកចម្រើនជាលំដាប់។

សូមជម្រាបថានៅក្នុងកំឡុងពេលចូលរួមកិច្ចប្រជុំ APPF នាទីក្រុងកង់បេរ៉ា នេះ សម្តេចប្រធានរដ្ឋសភា បានទទួលជួបពិភាក្សាការងារផ្លូវការនិងក្រៅ ផ្លូវការជាប្រតិភូសភា ដែលជាសមាជិក APPF និងអន្តរសភាអាស៊ាន មួយចំនួនទៀតផងដែរ ក្នុងការពង្រឹងពង្រីកកិច្ចសហប្រតិបត្តិការ រវាងសភា កម្ពុជានិងបណ្តាប្រទេសជាមិត្ត៕

ដោយ ៖ វិបុល