ទីក្រុងកង់បេរ៉ា (ប្រទេសអូស្ត្រាលី) ៖ សម្តេចអគ្គមហាពញាចក្រី ហេង សំរិន ប្រធានរដ្ឋភា និងគណៈប្រតិភូជាន់ខ្ពស់សភាកម្ពុជា បានអញ្ជើញដល់ទីក្រុងកង់បេរ៉ា ប្រទេសអូស្ត្រាលី ដោយសុវត្ថិភាព នារសៀលថ្ងៃទី១២ ខែមករានេះ ដើម្បីចូលរួមកិច្ចប្រជុំប្រចាំឆ្នាំលើកទី២៨ នៃវេទិកាសភាអាស៊ី-ប៉ាស៊ីហ្វិក ហៅកាត់ថា(APPF) តបតាមការអញ្ជើញពីថ្នាក់ដឹកនាំស្ថាប័ននីតិប្បញ្ញត្តិប្រទេសអូស្ត្រាលី។ យោងតាមហ្វេសប៊ុកផ្លូវការរបស់សម្តេចអគ្គមហាពញាចក្រី ហេង សំរិន នារសៀលថ្ងៃទី១២ ខែមករា ឆ្នាំ២០២០។
សភាប្រទេសអូស្ត្រាលី រួមជាមួយស្ថានទូតព្រះរាជាណាចក្រកម្ពុជាប្រចាំនៅអូស្ត្រាលី និងប្រជាពលរដ្ឋខ្មែរ រស់នៅទីក្រុងកង់បេរ៉ា ជាច្រើនបានអញ្ជើញមកទទួលស្វាគមន៍ សម្តេចប្រធានរដ្ឋសភាដល់ព្រលានយន្តហោះដោយក្តីគោរពស្រឡាញ់និងនឹករលឹកជាខ្លាំង។
សភាប្រទេសអូស្ត្រាលីទទួលធ្វើជាម្ចាស់ផ្ទះកិច្ចប្រជុំប្រចាំឆ្នាំ APPF លើកទី២៨ នៅពេលនេះគឺបន្តពីរដ្ឋសភាកម្ពុជា ដែលបានធ្វើម្ចាស់ផ្ទះកិច្ចប្រជុំAPPF លើកទី២៧ កាលពីដើមឆ្នាំ២០១៩ នៅខេត្តសៀមរាប។ កិច្ចប្រជុំប្រចាំឆ្នាំAPPF លើកទី២៨នឹងប្រារព្ធពិធីបើកជាផ្លូវការនៅព្រឹកថ្ងៃ ទី១៣ មករា ស្អែកនាវិមានរដ្ឋសភាអូស្ត្រាលី ក្រោមអធិបតីភាព ឯកឧត្តម ដាវិត ហ្គ័រលី អគ្គទេសាភិបាលអូស្ត្រាលី និងឯកឧត្តម តូនី ស្មីត ប្រធានរដ្ឋសភាអូស្ត្រាលី និងជាប្រធាន APPF លើកទី២៨ ក្រោមមូលបទ «ភាពជាដៃគូសភាសម្រាប់ឆ្នាំ២០២០និងឆ្នំាបន្តបន្ទាប់»។
ក្នុងនាមប្រធានAPPF លើកទី២៧ សម្តេចអគ្គមហាពញាចក្រី ហេង សំរិន នឹងអញ្ជើញឡើងថ្លែងសុន្ទរកថាក្នុងពិធី បើកកិច្ចប្រជុំផ្លូវការលើកទី២៨នេះ។ បន្ថែមពីនេះ សភាអូស្ត្រាលី បានអញ្ជើញសភាកម្ពុជា ចែករំលែកបទពិសោធន៍ពីការដឹកនាំនិងរៀបចំកិច្ចប្រជុំ APPFលើកទី២៧ នៅក្នុងកិច្ចប្រជុំគណៈកម្មាធិការប្រតិបត្តិទៀតផង៕
ដោយ ៖ វិបុល
