រដ្ឋប្រីសបេន (Brisbane) ៖ មានប្រជាពលដ្ឋ និងនិស្សិតខ្មែរ ដែលកំពុងរស់នៅ និងសិក្សាប្រទេសអូស្ត្រាលីជាច្រើន បានអញ្ជើញមកទទួលស្វាគមន៍ សម្តេចអគ្គមហាពញាចក្រី ហេង សំរិន ប្រធានរដ្ឋសភា ដល់ព្រលានយន្តហោះអន្តរជាតិនារដ្ឋ Brisbane នាប្រទេសអូស្ត្រាលី នាព្រឹកថ្ងៃទី១២ ខែមករា នេះ ក្នុងពេលសម្តេចប្រធានរដ្ឋសភា បានអញ្ជើញដឹកនាំគណៈប្រតិភូជាន់ខ្ពស់រដ្ឋសភា មកចូលរួមកិច្ចប្រជុំប្រចាំឆ្នាំលើក ទី២៨ នៃវេទិកា សភាអាស៊ី-ប៉ាស៊ីហ្វិក ដែលហៅកាត់ថា(APPF) នៅប្រទេសអូស្រ្តាលី ។ យោងតាមហ្វេសប៊ុកផ្លូវការរបស់សម្តេចអគ្គមហាពញាចក្រី ហេង សំរិន ផ្សព្វផ្សាយនាព្រឹកថ្ងៃអាទិត្យ ទី១២ ខែមករា ឆ្នាំ២០២០ នេះ។
ប្រជាពលរដ្ឋបានបង្ហាញការគោរព នឹករលឹក និងបានថ្លែងអំណរគុណចំពោះសម្តេចប្រធានរដ្ឋសភា រួមជាមួយឥស្សរជនថ្នាក់ដឹកនាំទាំងអស់ ដែល បានលះបង់កម្លាំងកាយ និងបញ្ញាចូលរួមរំដោះប្រទេសជាតិ ចេញពីរបបប៉ុលពត រហូតប្រទេសជាតិ បានកសាង ស្តារ និងអភិវឌ្ឍន៍រីកចម្រើន ហើយ ទទួលសាទរពីគ្រប់មជ្ឈដ្ឋានពីសុខសន្តិភាពពេញលេញ និងជីវភាពប្រជាជនសម្បូរសប្បាយដូចសព្វថ្ងៃ។
ប្រជាពលរដ្ឋរស់នៅរដ្ឋប្រីសបេន បានជម្រាបសម្តេចថាពួកគាត់មិនចង់ឱ្យប្រទេសជាតិធ្លាក់ក្នុងសង្គ្រាមទៀតឡើយ ហើយពួកគាត់សូមគាំទ្រដល់ ការដឹកនាំរបស់រាជរដ្ឋាភិបាលបច្ចុប្បន្ន ដែលកើតចេញពីប្រជាធិបតេយ្យ តាមរយៈការបោះឆ្នោត។
សម្តេចអគ្គមហាពញាចក្រី ហេង សំរិន បានរំលឹក ជម្រាប ប្រជាពលរដ្ឋពីដំណើរតស៊ូ របស់សម្តេច នៅក្នុងការរំដោះប្រទេសជាតិ ចេញពីរបបអាវខ្មៅ ប៉ុលពត តាមរយៈកម្លាំងតស៊ូ២ធ្នូ១៩៧៨ ដែលនាំមកនូវជ័យជំនះ លើពួកខ្មែរ ក្រហម នៅថ្ងៃ ៧មករា ឆ្នាំ១៩៧៩។
សូមជម្រាបថា បន្ទាប់ពីឈប់សម្រាកដើម្បីផ្លាស់ប្តូរ ជើងយន្តហោះ នៅBrisbane នេះហើយសម្តេចប្រធានរដ្ឋសភា និងបន្តដឹកនាំគណៈប្រតិភូ នឹងអញ្ជើញទៅកាន់ទីក្រុងកង់បេរ៉ា កន្លែងដែលប្រារព្ធកិច្ចវេទិកាសភាអាស៊ី-ប៉ាស៊ីហ្វិក ដែលហៅកាត់ថា(APPF) បន្តទៀត៕
ដោយ ៖ វិបុល
