រាជធានីភ្នំពេញ ៖ សម្ដេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា នៅរាត្រីថ្ងៃទី១១ ខែមករា ឆ្នាំ២០២០នេះ បានដឹកនាំគណៈប្រតិភូជាន់ខ្ពស់សភាកម្ពុជា ចូលរួមកិច្ចប្រជុំប្រចាំឆ្នាំលើក ទី២៨ នៃវេទិកាសភាអាស៊ី-ប៉ាស៊ីហ្វិក ដែលហៅកាត់ថាAPPF នៅទីក្រុងកង់បេរ៉ា ប្រទេសអូស្ត្រាលី តបតាមការអញ្ជើញប្រធានស្ថាប័ននីតិប្បញ្ញត្តិប្រទេសអូស្ត្រាលី។ យោងតាមហ្វេសប៊ុកផ្លូវការរបស់សម្ដេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា
ក្នុងកិច្ចប្រជុំវេទិកាសភាដែលមានសមាជិក២៧ប្រទេសនឹងដំណើរការក្រោមមូលបទ «ភាពជាដៃគូសភាសម្រាប់ឆ្នាំ២០២០និង ឆ្នាំបន្តបន្ទាប់»។ សម្តេចអគ្គមហាពញាចក្រី ហេង សំរិន នឹងអញ្ជើញថ្លែងសន្ទរកថាក្នុងពិធីបើកកិច្ចប្រជុំផ្លូវការ ក្នុងនាមសម្តេចជាប្រធានAPPF លើក ទី២៧ ដែលសភាកម្ពុជា បានធ្វើជាម្ចាស់ផ្ទះកិច្ចប្រជុំ កាលពីដើម ឆ្នាំ២០១៩ ហើយសភាកម្ពុជា នឹងចែករំលែក បទពិសោធន៍ពីការដឹកនាំនិងការរៀបចំកិច្ចប្រជុំ APPFលើក ទី២៧ នៅក្នុងកិច្ចប្រជុំគណៈកម្មាធិការប្រតិបត្តិ ទៀតផង។
កំឡុងពេលចូលរួមកិច្ចប្រជុំប្រចាំ APPF លើកទី ២៨ នេះ សម្តេចប្រធានរដ្ឋសភា គ្រោងជួបពិភាក្សាការងារទ្វេភាគី ជាមួយសមភាគីប្រធានរដ្ឋសភាប្រទេសអូស្ត្រាលី និងទទួលជូបសវនាការជាមួយថ្នាក់ដឹកនាំសភាប្រទេសជាមិត្តមួយចំនូនទៀត ដើម្បីពង្រឹងពង្រីកចំណងមិត្តភាព កិច្ចសហប្រតិបត្តិការវិស័យការទូត សភាកម្ពុជានៅលើឆាកអន្តរជាតិទាំងក្របខ័ណ្ឌពហុភាគីនិងទ្វេភាគី។
ក្រៅពីនោះសម្តេចអគ្គមហាពញាចក្រី ហេង សំរិន ប្រធានរដ្ឋសភា គ្រោងទទួលជួបសំណេះសំណាលជាមួយប្រជាពលរដ្ឋនិងនិស្សិតខ្មែរ កំពុងរស់នៅ និងសិក្សាក្នុងទីក្រុងកង់បេរ៉ា ប្រទេសអូស្ត្រាលី ផងដែរ៕
ដោយ ៖ កូឡាប
