ខេត្តសៀមរាប៖ ប្រជាពលរដ្ឋដែលប្រកបរបរកដឹងអុសនិងធ្យូង រួមទាំងអ្នកធ្វើដំណើរឆ្លងកាត់តាមស្រុកស្វាយលើ បានចោទប្រកាន់លោក សំ សៅ ប្រធានស្នាក់ការ អង្គការការពារបរិស្ថាននិងសិទ្ធិពលរដ្ឋកម្ពុជា ប្រចាំស្រុកស្វាយលើ ថាបានដាក់កុងត្រូល និងដេញស្ទាក់ឡានពួកគាត់ដើម្បីទារប្រាក់ ដែលជាដើមហេតុបង្កអោយមានការភ័យខ្លាចជាដើមក្នុងការធ្វើដំណើរតាមដងផ្លូវ។ យោងតាមហ្វេសប៊ុកឈ្មោះ Phykim Sey ចុះថ្ងៃទី ០៥ ខែមករា ឆ្នាំ២០២០។
តាមប្រភពពីប្រជាពលរដ្ឋដឹកអុសម្នាក់បានប្រាប់ថាជារៀងរាល់ថ្ងៃគាត់ឃើញមានរថយន្ត និងម៉ូតូបានបើកចេញពីទីស្នាក់ការអង្គការខាងលើនោះប្រដេញតាមឡានឬគោយន្តឆ្នៃដែលបានដឹកអុសនិងឈើកែច្នៃ នៅលើដងផ្លូវនៃស្រុកស្វាយលើ ដើម្បីទារលុយពីអ្នកដឹកអុស ដឹកធ្យូង និង រថយន្តឈ្នួលដឹកមនុស្សជាដើម ។
ចំណែកអ្នករត់តាក់ស៊ីប្រភេទសាំយុងម្នាក់ទៀត ក៍បានផ្តល់ព័ត៍មានថា ខ្លួនធ្លាប់បានទទួលរងការប្រដេញស្ទាក់ ដោយក្រុមរបស់លោកប្រធាន អង្គការបរិស្ថានខាងលើនោះច្រើនដងមកហើយ។ រាល់ពេលឃាត់រថយន្តរបស់ខ្លួន គឺមានមនុស្ស៣ទៅ៤នាក់ ដែលប្រើប្រាស់ឯកសណ្ឋានស្រដៀងមេព្រៃនិងស៊ីវិល ដោយចោទសួរគាត់ថាមានដឹកឈើដែរឬអត់?។ ប្រភពបន្តថាការប្រដេញស្ទាក់រថយន្តនេះ មិនថាពេលថ្ងៃឬយប់ទេ ដោយធ្វើអោយអ្នកជិះក្នុងរថយន្តមានភ័យខ្លាចយ៉ាងខ្លាំងរហូតដោយចោទសំណួរថា ៖ ទី១ បើមានការគ្រោះថ្នាក់តើនណាជាអ្នកទទួលខុសត្រូវ, ទី២ បើមិនមែនជាសមត្ថកិច្ចជំនាញពិតប្រាកដ អាចជាក្រុមចោរប្លន់ក៍ថាបាន។ ជាមួយគ្នានោះ បុរសខាងលើ ក៍បានទទូចសុំអោយអាជ្ញធរមានសមត្ថកិច្ច ពិនិត្យ ហើយបើសិនជាអាច គួរបញ្ឈប់ការដាក់កុងត្រូលរបស់អង្គការការពារបរិស្ថាននិងសិទ្ធិពលរដ្ឋកម្ពុជា ប្រចាំស្រុកស្វាយលើ ដែលសម្រាប់ចាំប្រដេញស្ទាក់រថយន្តបែបនេះទេ។
រាល់ការចោទប្រកាន់របស់ពលរដ្ឋខាងលើនេះ លោក សំ សៅ ប្រធានស្នាក់ការអង្គការការពារបរិស្ថាននិងសិទ្ធិពលរដ្ឋកម្ពុជាប្រចាំស្រុកស្វាយលី បានឆ្លើយថាក្រុមការងាររបស់លោកពិតជាបានដេញឡានមែនពេលមានគេរាយការណ៍ថាសង្ស័យឡានមានដឹកឈេឺ តែមិនបានឃាត់ទេ គ្រាន់តែពិនិត្យនិងថតយករូបភាព ឯរឿងលុយក៍យកតិចតួចប៉ុណ្ណោះ។ លោកប្រធានអង្គការខាងលើដែលជាជនជាតិវៀតណាមរូបនេះ បញ្ជាក់ថា ទោះខ្លួនជាវៀតណាមក៏ដោយ តែមិនដែលប្រកាន់ពូជសាសន៍អីទេ គឺជួយពលរដ្ឋពេលមានលំបាកដូចតែគ្នា ហើយលោកបន្ថែមថាទីស្នាក់ការ របស់លោកទោះបីទើបលើកស្លាកត្រឹមរយះពេល៥ខែ តែមាន ច្បាប់ពីក្រសួងនិងខេត្ត។
ដោយឡែកមេភូមិទឹកលិច ឃុំបឹងមាលា ស្រុកស្វាយលើ លោកស្រី អ៊ា បា បានឲ្យដឹងតាមទូរសព្ទ័ថា ករណីអង្គការខាងលើនេះ អ្នកស្រីក៍បានឃើញថាពួកគាត់ចុះមកអនុវត្តន៍ការងារនេះ វាហាក់លើសពីច្បាប់អីចឹងមែន។ ព្រោះពលរដ្ឋបានរាយការណ៍មកគាត់ថាគ្រាន់តែពលរដ្ឋដឹកអុស ក៏បើកឡានដេញកាក់យកលុយ ហើយពលរដ្ឋឲ្យលុយ១០០០០រៀល អត់យកទេ។ ក្នុងនាមអាជ្ញាធរមូលដ្ឋានអ្នកស្រីស្នើឲ្យស្ថាប័ន ពាក់ព័ន្ធមេត្តាជួយចាត់ការករណីបែបនេះផង ព្រោះអង្គការប្រភេទនេះមិនដែលមានអីជួយដល់ពលរដ្ឋនោះទេផ្ទុយទៅវិញ គឺមានតែធ្វើបាបពលរដ្ឋបន្ថែមទៀត តាមបែបប្រដេញស្ទាក់ឡានជំរិតទារប្រាក់តែប៉ុណ្ណោះ។
ចំណែកលោក អៀង ពិសិដ្ឋ អភិបាលស្រុកស្វាយលើ ក៍បានឲ្យដឹងតាមទូរស័ព្ទថា បញ្ហាកុងត្រូលជជុះនៅតាមដងផ្លូវ ក្នុងដែនសមត្ថកិច្ចរបស់ស្រុកស្វាយលើ លោកនឹងមានចំណាត់ការ តាមផ្លូវច្បាប់ជាធរមាន ដោយមិនលើកលែងបុគ្គលណាដែលធ្វើខុសច្បាប់នោះឡើយ។
ទោះជាបែបនេះក្តី ក៍ពលរដ្ឋក្នុងមូលដ្ឋាន នៃស្រុកស្វាយលើ ទទូចសុំកុំអោយអង្កការមួយនេះដាក់ឡានចាំ ប្រដេញស្ទាក់ចាប់ និងគំរាមយកលុយពីពលរដ្ឋដែលរកសុីដឹកផល់អនុផលព្រៃឈេឺបន្តិចបន្តួច។ ប្រជាពលរដ្ឋអំពាវនាវទៅ ឯកឧត្តមទៀសីហា អភិបាលនៃគណៈអភិបាលខេត្តសៀមរាបមេត្តាចុះមើលស្ថានភាពអង្គការមួយនេះផងកុំឱ្យអង្គការខាងលើមានចិត្តអំនួតអួតអាងទារប្រាក់ពីប្រជាពលរដ្ឋដឹកអុសបន្តិចបន្តួចជាលក្ខណៈគ្រួសារដើម្បីចិញ្ចឹមជីវភាពគ្រួសារផងនោះ៕
ដោយ ៖ វិបុល
