ខេត្តសៀមរាប ៖ យោងសេចក្តីរាយការណ៍ពីប្រជាពលរដ្ឋបានអោយដឹងថា នាព្រឹកថ្ងៃទី២០ធ្នូ២០១៩ នេះ មានករណីបាក់ថ្មភ្នំជាច្រើនដុំ សង្កត់លើរថយន្តកងវិស្វកម្មរបស់លោក សៀង ណាំ ដែលកំពុងតែយកគ្រឿងចក្រជីកបុកបំផ្លាញភ្នំយកថ្ម ស្ថិតនៅភ្នំទ្រង់បាត ក្នុងភូមិកំពង់ថ្កូវ ក្នុងស្រុកក្រឡាញ់ ខេត្តសៀមរាប។
ទោះយ៉ាងណាហេតុការណ៍នេះ គេមិនត្រូវបានដឹងថាអ្នកបើកបររថយន្តស្លាប់ឬរស់យ៉ាងណានោះទេ ខណ:ដែលកម្លាំងខាងកងវិស្វកម្មរបស់លោក សៀង ណាំ បានយកតង់មកគ្របជិតពីលើកាប៊ីនរថយន្ត ដែលកំពិតខ្ទេចមិនអោយឃើញនោះឡើយ ករណីនេះអ្នកព័ត៌មានត្រូវបានគេរារាំងមិនអោយថតយកទិដ្ឋភាពនោះទេ។
ប្រជាពលរដ្ឋបានលើកឡើងថា ជឿឬក៏មិនជឿនោះ ដែលពួកគេសង្ស័យ អ្នកតាភ្នំទ្រង់បាត ទំនងជាខឹងសម្បារ សម្តែងរិទ្ធ មិនចង់អោយមានការ បំផ្លាញសម្បត្តិធម្មជាតិបន្តទៀតនោះ ទើបសម្តែងរិទ្ធិអោយបាក់ថ្មជាច្រើនផ្ទាំងមកលើរថយន្តដែលកំពុងធ្វើសកម្ម ភាពដឹកជញ្ជូនអស់ថ្មភ្នំ ពួកគាត់មានជំនឿថានេះពិតជាកម្មពារហើយ ទើបបណ្តាលទៅជាយ៉ាងហ្នឹង។
មហាជនបានលើកឡើងថាភ្នំទ្រង់បាត ជាសម្បត្តិធម្មជាតិ ដែលគួរបានអភិរក្ស ប៉ុន្តែបច្ចុប្បន្នកំពុងរងនូវការបំផ្លិចបំផ្លាញ ដោយមានសុទ្ធតែគ្រឿងចក្រធំៗ បុកគាស់ក៏កកាយ និងវាយបំផ្លាញ ទ្រង់ ទ្រាយដើមស្ទើរទាំងស្រុង ខណៈអាជ្ញាធរមិនបានយកចិត្តទុកដាក់ ក្នុងការថែរក្សា ភ្នំទ្រង់បាតនេះឡើយ ។
ពាក់ព័ន្ធនឹងមតិរិះគន់ខាងលើ អង្គភាព www.rskynews.com យើងមិនទាន់អាចទំនាក់ទំនងសុំការបំភ្លឺណាមួយបានឡើយពីលោក សៀង ណាំ នារសៀលថ្ងៃទី ២០ ខែធ្នូ ឆ្នាំ២០១៩នេះ ។ បើទោះយ៉ាងណាអង្គភាពសារព័ត៌មានយើង រងចាំទទួលស្វាគមន៍រាល់ការបកស្រាយគ្រប់ពេលវេលា៕
ដោយ ៖ កូឡាប
