រាជធានីភ្នំពេញ ៖ អង្គភាពប្រឆាំងអំពើពុករលួយ (ACU) រកឃើញថា លោក លឹម ហាក់ ប៉េអឹមខេត្តកំពង់ឆ្នាំង ពិតជាមានការជំរិតទារប្រាក់ដូចការផ្សព្វផ្សាយមែន ពាក់ព័ន្ធការដោះលែងឡានអត់ពន្ធមួយគ្រឿងជាថ្នូរនឹងប្រាក់ចំនួន៥០០០$ (ប្រាំពាន់ដុល្លារអាមេរិក) ។
យោងតាមចំណុចទី៧ នៃសេចក្តីជូនដំណឹង ស្តីពីកិច្ចប្រជុំលើកទី៥១ អាណត្តិទី២ នៃក្រុមប្រឹក្សាជាតិប្រឆាំងអំពើពុករលួយ កាលពីថ្ងៃទី២៨ ខែតុលា ឆ្នាំ២០១៩ ដែល rskynews.com ទើបទទួលបាននៅថ្ងៃទី៣០ ខែតុលា នេះ ៖ អង្គភាពប្រឆាំងអំពើពុករលួយ បញ្ជាក់ថា “ការស្រាវជ្រាវបង្ហាញថា ពិតជាមានការទារ-ការទទួលប្រាក់ដូចការផ្សព្វផ្សាយមែន។ អង្គភាពប្រឆាំងអំពើពុករលួយ នៅត្រូវការពេលវេលាបន្តិចទៀតដើម្បីវាយតម្លៃថា ការទារប្រាក់-ការទទួលប្រាក់នេះយ៉ាងដូចម្តេចខ្លះដើម្បីមានមូលដ្ឋានបន្តនីតិវិធីបើក ឬ មិនបើកការស៊ើបអង្កេតករណីនេះ” ។
សូមបញ្ជាក់ថា ប្រភពព័ត៌មានច្បាស់ការណ៍មួយ ថ្លែងប្រាប់សារព័ត៌មានក្នុងស្រុកថា លោក លឹម ហាក់ មន្ត្រីប៉េអឹមខេត្តកំពង់ឆ្នាំង បានពឹងពាក់ស្ត្រីម្នាក់ដែលស្និតស្នាលជាមួយលោក ឈុន ឈីវជាតិ ខំជិះម៉ូតូពីចម្ងាយមកដល់ផ្ទះ ព្យាយាមសម្រប សម្រួលសងសំណងចំនួន៥ពាន់ដុល្លារ ជាថ្នូរនឹងការដកពាក្យបណ្តឹង តែត្រូវរងការអាម៉ាស់ ព្រោះដើមបណ្តឹងបដិសេធមិនទទួលយកឡើយ ។
ដើមបណ្តឹងក្នុងសំណុំរឿងនេះ គឺ លោក ឈុន ឈីវជាតិ ថ្លែងប្រាប់ rskynews.com នាព្រឹកថ្ងៃទី៣០ ខែតុលា ឆ្នាំ២០១៩ ថាភាគីមន្ត្រីប៉េអឹម បានព្យាយាមសម្របសម្រួលជាមួយលោក ដើម្បីបញ្ចប់រឿង។ ប៉ុន្តែយ៉ាងណាក៏ដោយ លោកនៅតែប្រកាន់ជំហរប្តឹងមន្ត្រីខិលខូតទាំងនេះ ដោយពុំត្រូវការសំណងអ្វីឡើយ ។
លោក ឈុន ឈីវជាតិ អះអាងថា លោកចង់អោយច្បាប់អនុវត្តទៅលើមន្ត្រីខិលខូច ដោយមានប្រជាពលរដ្ឋច្រើននាក់ណាស់ ប្រាប់លោក ថា បានរងគ្រោះដូចគ្នា ដោយសារមន្ត្រីប៉អឹមទាំងនេះ។ ដើមបណ្តឹងរូបនេះ បន្តថា លោកមានភស្តុតាងគ្រប់គ្រាន់ដើម្បីដាក់ជូនតុលាការ ហើយសង្ឃឹមថា តុលាការនឹងអនុវត្តច្បាប់ដោយតម្លាភាព ។យោងពាក្យបណ្តឹងកាលពីថ្ងៃទី១០ ខែតុលា លោក ឈុន ឈីវជាតិ រៀបរាប់ថា កាលពីព្រឹកថ្ងៃទី២៨ ខែកញ្ញា ឆ្នាំ២០១៩ ខណៈដែលខ្ញុំបាទកំពុងតែបើករថយន្តទៅចាក់សាំងតែម្នាក់ឯង ស្រាប់តែមានកងរាជអាវុធហត្ថ២រូប បានឃាត់ចាប់រថយន្តរបស់ខ្ញុំបាទហើយថាមេគាត់ចង់ជួបខ្ញុំក៏បានទៅជាមួយពួកគាត់ ។
ពេលដល់សាលាក្រុងកំពង់ឆ្នាំងបានជួបឈ្មោះ លឹម ហាក់ ហើយគាត់ថាខ្ញុំប្រើឡានអត់ពន្ធ ហើយគាត់ថាមេរបស់គាត់អោយយករថយន្តទៅប៉េអឹមក្រុងដល់ពេលប៉េអឹមក្រុងពួកគេបានឃុំខ្ញុំក្នុងបន្ទប់ឃុំឃាំងរហូតដល់ម៉ោង១២ថ្ងៃត្រង់ ទើបឈ្មោះ លឹម ហាក់ ត្រឡប់មកវិញរួចកុហកប្រាប់ខ្ញុំថាគាត់បានរាយការណ៍ជូនលោកព្រះរាជអាជ្ញា ហើយដោយព្រះរាជអាជ្ញាបញ្ជាអោយគាត់ឃាត់ឡាន និងមនុស្សពីបទប្រើប្រាស់ឡានអត់ពន្ធ និង បានអោយខ្ញុំបាទទាក់ទងបងប្អូនសាច់ញាតិដើម្បីយកប្រាក់ចំនួន៥ពាន់ដុល្លារ ទើបគេព្រមដោះលែងខ្ញុំបាទ និងរថយន្តវិញ គាត់នឹងជួយនិយាយអោយព្រោះរាប់អានគ្នា ។
ដើមបណ្តឹង អះអាងទៀតថា គាត់បានទាក់ទងក្រុមគ្រួសារខ្ញុំដើម្បីរកប្រាក់មកលោះខ្ញុំគេបន្តឃុំខ្លួនខ្ញុំរហូតដល់ម៉ោង៤រសៀលគ្រួសារបានទាក់ទងមកខ្ញុំបាទដោយបាននិយាយថាគាត់ខ្ចីគេបានតែ ៣,៥០០ដុល្លារទេ ដោយយកប្រាក់នេះ អោយឈ្មោះ ឡុន ឡន ហៅឡុង ជាអ្នកយកលុយអោយឈ្មោះ លឹម ហាក់ តែឈ្មោះ លឹម ហាក់ មិនព្រមទេ គឺត្រូវការ ៥ពាន់ដុល្លារ ។
រហូតដល់ម៉ោង៨ យប់គ្រួសារខ្ញុំបានខ្ចីប្រាក់គេគ្រប់ចំនួន និងបានយកមកអោយមន្ត្រីកងរាជអាវុធហត្ថខាងលើនេះ ហើយពួកគេបានអោយខ្ញុំ ធ្វើកិច្ចសន្យាថានឹងមិនប្រើប្រាស់រថយន្តអត់ពន្ធទៀត និងបានដោះលែងខ្ញុំអោយត្រឡប់មកផ្ទះវិញ។ ក្នុងពេលដែលពួកគាត់និយាយគំរាមខ្ញុំបាទអោយរកប្រាក់អោយពួកគាត់នោះខ្ញុំបាទបានលួចថតវីដេអូទុកជាភស្តុតាងស្រាប់។
ទោះបីយ៉ាងណា ថ្មីៗនេះ អ្នកនាំពាក្យកងរាជអាវុធហត្ថលើផ្ទៃប្រទេស បានឃើញព័ត៌មានផ្សាយនូវអត្ថបទមានចំណងជើងថា “បែកធ្លាយវីដេអូ ប៉េអឹមខេត្តកំពង់ឆ្នាំងជំរឹតយកលុយគេ មន្ត្រីកងរាជអាវុធហត្ថខេត្តកំពង់ឆ្នាំង ចាប់ឡានអត់ពន្ធជំរឹតយកលុយគេ ៥០០០ដុល្លារ ទើបដោះលែង មានវីដេអូប្រគល់ទទួលលុយ” និងមានអត្ថបទមួយចំនួនទៀតដែលពាក់ព័ន្ធនឹងករណីនេះ នាពេលកន្លងទៅ។
លោកស្រីឧត្តមសេនីយ៍ត្រី ប្រាក់ ប៉ុណ្ណោះ អ្នកនាំពាក្យរង កងរាជអាវុធហត្ថលើផ្ទៃប្រទេសសូមជម្រាបជូនសាធារណជន និងអ្នកសារព័ត៌មានជ្រាបថា នៅថ្ងៃទី២៨ ខែកញ្ញា ឆ្នាំ២០១៩វេលាម៉ោង៨៖៣០នាទី នៅលើផ្លូវជាតិលេខ៥ ស្ថិតក្នុងភូមិស្រែព្រីង សង្កាត់កំពង់ឆ្នាំងក្រុងកំពង់ឆ្នាំង ខេត្តកំពង់ឆ្នាំង កម្លាំងកងរាជអាវុធហត្ថ បានធ្វើការត្រួតពិនិត្យ និងឈានដល់ឃាត់រថយន្តម៉ាក LEXUS RX330 ពាក់ស្លាកលេខក្លែងក្លាយ ភ្នំពេញ 2AD 0356 និងម្ចាស់រថយន្តមកកាន់អង្គភាពកងរាជអាវុធហត្ថ ដើម្បីធ្វើការស្តាប់ចម្លើយតាមនីតិវិធី។
ក្រោយពីធ្វើការស្តាប់ចម្លើយ បុគ្គលដែលជាម្ចាស់រថយន្តឈ្មោះ ឈុន ឈីវជាតិ ភេទប្រុស អាយុ៣៧ឆ្នាំ ជនជាតិខ្មែរ សញ្ជាតិខ្មែរ ទីកន្លែងកំណើតភូមិរតនៈ សង្កាត់ស្វាយប៉ោ៣ ខេត្តបាត់ដំបង រួចមក និងដោយពិនិត្យឃើញថា បុគ្គលឈ្មោះ ឈុន ឈីវជាតិ ពុំពាក់ព័ន្ធនឹងការប្រព្រឹត្តបទល្មើសដែលជាសមត្ថកិច្ចរបស់កងរាជអាវុធហត្ថ ទើបបានធ្វើកិច្ចសន្យាចំពោះមុខសមត្ថកិច្ចកងរាជអាវុធហត្ថដូចតទៅ ៖
១-ឈប់ជិះរថយន្តពាក់ស្លាកលេខភ្លេងនិងអត់ពន្ធតទៅទៀត
២-ចូលខ្លួនគ្រប់ពេលវេលា នៅពេលមានការកោះហៅរបស់សមត្ថកិច្ច។
ចំណែកឯរថយន្តម៉ាក LEXUS RX330 ពាក់ស្លាកលេខក្លែងក្លាយ ភ្នំពេញ 2AD 0356 និងបុគ្គលឈ្មោះ ឈុន ឈីវជាតិ ត្រូវបានឈ្មោះ ម៉ី ស៊ីណារ៉ា អាយុ៣៦ឆ្នាំ ជនជាតិខ្មែរ សញ្ជាតិខ្មែរ ត្រូវជាប្រពន្ធរបស់បុគ្គលឈ្មោះ ឈុន ឈីវជាតិ ធានា និងបានអនុញ្ញាតឱ្យវិលទៅលំនៅឋានវិញ។ កងរាជអាវុធហត្ថ បានកសាងសំណុំរឿងនេះ បញ្ជូនទៅតុលាការតាមនីតិវិធី រីឯរូបភាពបុគ្គលឈ្មោះ លន់ ឡន ដែលទទួលយកលុយ បានបង្ហោះក្នុងឃ្លីបវីដេអូនោះ មិនមែនជាមន្ត្រីកងរាជអាវុធហត្ថទេ ៕
ដោយ ៖ កូឡាប
