លោក ផាន់ហ៊ូ ហៀវ ដែលមានឈ្មោះហៅក្រៅថា“ កណ្តុរ” គឺជាស្តេចនៅក្នុងពិភពគ្រឿងញៀន និងបក្ខពួករបស់លោក ៧នាក់ផ្សេងទៀត រួមមានបុរស ៦នាក់និងស្ត្រីម្នាក់ដែលមានអាយុចន្លោះពី ៣៨ ទៅ ៦៥ឆ្នាំត្រូវបានកាត់ទោសប្រហារជីវិតពីបទជួញដូរហេរ៉ូអ៊ីនចំនួន ១៣២ គីឡូក្រាមនិងម៉ាទឹកកក ៥៥ គីឡូក្រាម ពីប្រទេសឡាវមកកាន់ទីក្រុងហូជីមិញ។ ដោយឡែកសមាជិកម្នាក់ទៀតនៃក្រុមក្មេងទំនើងត្រូវ បានកាត់ទោសឱ្យជាប់ពន្ធនាគារអស់មួយជីវិតផងដែរ។
ក្រុមអ្នកជួញដូរគ្រឿងញៀនទាំងអស់នោះ ត្រូវបានចាប់ខ្លួនកាល ពីខែកក្កដាឆ្នាំមុន បន្ទាប់ពីមន្រ្តីប៉ូលិសបានធ្វើការបង្ក្រាបដ៏ធំមួយទៅលើ ទីតាំងផ្សេងៗគ្នានៅក្នុងទីក្រុងហាណូយ និងខេត្តប៊ិញដុង។ ពួកគេទាំងនោះ បានដឹកជញ្ជូនគ្រឿងញៀនពីប្រទេសឡាវចូលទៅក្នុងទីក្រុង ដាណាង មុនពេលចែកចាយទៅកាន់តំបន់ផ្សេងទៀត។
លោក ភុង វ៉ាន់ដាង អនុប្រធាននាយកដ្ឋាននគរបាលប្រឆាំងគ្រឿងញៀន សាយហ្គនបាននិយាយនៅក្នុងកិច្ចប្រជុំមួយកាលពីសប្តាហ៍មុន ថា ប៉ូលិសសាយហ្គនបានរឹបអូសគ្រឿងញៀនបានជាង ១,៦តោនចាប់តាំងពីដើមឆ្នាំនេះគឺច្រើនជាង ១០ ដងនៃរយៈពេលដូចគ្នាកាលពី ឆ្នាំមុន។
គួរដឹងដែរថា ប្រទេសវៀតណាមគឺជាមជ្ឈមណ្ឌលជួញដូរគ្រឿង ញៀនដ៏សំខាន់មួយនៅក្នុងនិងជុំវិញតំបន់ត្រីកោណមាស ដែលមាន ព្រំប្រទល់ជាប់ប្រទេសចិន ឡាវ ថៃ និងប្រទេសមីយ៉ាន់ម៉ា ជាតំបន់ផលិតគ្រឿងញៀនធំជាងគេទី២ នៅលើពិភពលោក៕
ដោយ ៖ សុភា
