សមត្ថកិច្ចបង្ក្រាបទីតាំងល្បែងស៊ីសងលួចលាក់ជួញដូរនិងចែកចាយគ្រឿងញៀនឃាត់ខ្លួនមនុស្សចំនួន១៥នាក់
ចេញផ្សាយ
ថ្ងៃទី 05/10/2019
រាជធានីភ្នំពេញ ៖ កម្លាំងសមត្ថកិច្ច នៃអធិការដ្ឋាននគរបាលខណ្ឌដូនពេញ បានចុះបង្ក្រាបទីតាំងល្បែងស៊ីសងមួយកន្លែង លួចលាក់ជួញដូរ និងចែកចាយគ្រឿងញៀន និងឃាត់ខ្លួនមនុស្សប្រុសស្រី ចំនួន១៥នាក់ កាលពីវេលាម៉ោង៤និង៣០នាទីរសៀល ថ្ងៃទី០៣ ខែតុលា ឆ្នាំ ២០១៩ ស្ថិតនៅចំណុចផ្ទះលេខ៦២ ផ្លូវ៥១ ក្រុម១០ ភូមិ១០ សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ។
លោក ម៉ៅ ចាន់ថុន អធិការរងទទួលបន្ទុកផ្នែកគ្រឿងញៀន នៃអធិការដ្ឋាននគរបាលខណ្ឌដូនពេញ បានឲ្យដឹងថា ដោយអនុវត្តន៍តាមបទបញ្ជាដ៏ខ្ពង់ខ្ពស់របស់ឯកឧត្តមឧត្តមសេនីយ៍ឯក ស ថេត អគ្គស្នងការរង នឹងជាស្នងការនគរបាលរាជធានីភ្នំពេញ និងលោក សុខ ពេញវុធ អភិបាល នៃគណៈអភិបាលខណ្ឌដូនពេញ បានបើកការស្រាវជ្រាវបង្ក្រាបទីតាំងបើកល្បែងស៊ីសងមួយកន្លែង ដែលលួចលាក់ជួញដូរ និងចែកចាយសារធាតុញៀនដោយខុសច្បាប់។ជាលទ្ធផល នៃកិច្ចប្រតិបត្តិការណ៍នេះ កម្លាំងសមត្ថកិច្ចយើងបានឃាត់ខ្លួនជនសង្ស័យ ចំនួន១៥នាក់ ក្នុងនោះមាន ស្រី៧នាក់ ជនជាតិម៉ាឡេស៊ី ២នាក់ ដោយបានដកហូតម្សៅក្រាមពណ៌សរថ្លាសង្ស័យជាគ្រឿងញៀន ចំនួន១២កញ្ចប់, ដាវកែច្នៃ ចំនួនមួយដើម, ថង់សម្រាប់ច្រកគ្រឿងញៀនមួយចំនួន, ដែកកេះមួយចំនួន និងឧបករណ៍ប្រើប្រាស់មួយចំនួន។ក្រោយពីឆែកឆេររួចមក កម្លាំងសមត្ថកិច្ចយើងបាននាំខ្លួនជនសង្ស័យប្រុសស្រី ចំនួន១៥នាក់ រួមជាមួយវត្ថុតាងយកទៅអធិការខណ្ឌដូនពេញ ដើម្បីចាត់ការបន្តតាមនីតិវិធីច្បាប់៕
ដោយ ៖ សុភា
