ខេត្តកំពង់ធំ ៖ នៅព្រឹកថ្ងៃទី២២ ខែកញ្ញា ឆ្នាំ២០១៩នេះ សមត្ថកិច្ចបង្ក្រាបរថយន្ដក្រុងមួយគ្រឿងរបស់ក្រុមហ៊ុនបូព៌ាអាស៊ី ពាក់ព័ន្ធនិងការដឹកជញ្ជូនសត្វព្រៃដោយខុសច្បាប់ នៅចំណុចភូមិស្លាកក្រាញ់ ឃុំសំព្រោជ ស្រុកស្ទោង។
របាយការណ៍ពីសមត្ថកិច្ច បង្ហាញថា ប្រតិបត្តិការនេះ ក្រោមការ សម្របសម្រួលពី លោក អ៉ិត សុធា ព្រះរាជអាជ្ញាអមសាលាដំបូងខេត្តកំពង់ធំ និងមានការចូលរួមពី កម្លាំងកងរាជអាវុធហត្ថជាច្រើននាក់ ដឹកនាំដោយលោកវរសេនីយ៍ទោ ឃុន ប៊ុនហូ មេបញ្ជាការរងកងរាជអាវុធហត្ថខេត្ត។
លទ្ធផលនៃការបង្ក្រាប សមត្ថកិច្ចបានឃាត់ខ្លួនជនសង្ស័យម្នាក់ ឈ្មោះ ងន វុនរ៉ា អាយុ២៧ឆ្នាំ (ជាអ្នកបើកបររថយន្ដ) មានទីលំនៅភូមិប្រម៉ោយ ឃុំប្រម៉ោយ ស្រុកវាលវែង ខេត្តពោធិសាត់ និងរថយន្តក្រុងមួយគ្រឿងម៉ាក KIA ពណ៌ស្លាទុំលាយសរ ពាក់ស្លាកលេខភ្នំពេញ3D-2417 ជាកម្មសិទ្ធរបស់ក្រុមហ៊ុនបូព៌ាអាស៊ី ដឹកអ្នកដំណើរ ។
សមត្ថកិច្ចបានបង្រ្កាបនិងដកហូតបានសត្វព្រៃដូចជា ៖
១ ,អណ្តើកសកល២៨ក្បាល ស្មើនឹង១៧៩គីឡូក្រាម
២ ,ពស់ចាន់ល្មម៨២ក្បាល ស្មើនឹង៤៥គីឡូក្រាម
៣, អន្សង៤ក្បាល ស្មើនឹង៨គីឡូក្រាម។
បច្ចុប្បន្នវត្ថុតាងបានប្រគល់ជូននាយសង្កាត់រដ្ឋបាលព្រៃឈើស្ទោង ដើម្បីចាត់ការទៅតាមនីតិវិធីច្បាប់៕
ដោយ ៖ សុភា
