រាជធានីហាណូយ ៖ តបតាមការអញ្ជើញរបស់ក្រសួងនគរបាលវៀតណាម និងដោយផ្អែកតាមកិច្ចសហប្រតិបត្តិការរវាងបណ្តាប្រទេសជាសមាជិកអាស៊ាន ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិកម្ពុជា បានដឹកនាំគណប្រតិភូ ចូលរួមសន្និសីទអាស៊ានណាប៉ូល លើកទី៣៩ (ASEANAPOL CONFERENCE 39th) ក្រោមប្រធានបទ «ការលើកកម្ពស់ភាពជាដៃគូរក្សាបាននូវចំណងសាមគ្គីភាព» នៅរដ្ឋធានី ហាណូយ សាធារណរដ្ឋសង្គមនិយមវៀតណាម។
សន្និសីទអាស៊ានណាប៉ូល លើកទី៣៩ ត្រូវបានប្រារព្ធបើកនៅព្រឹកថ្ងៃទី១៨ ខែកញ្ញ ឆ្នាំ២០១៩នេះ ក្រោមអធិបតីភាព ឯកឧត្តម តូ ឡឹម រដ្ឋមន្ត្រីក្រសួងនគរបាល នៃសាធារណរដ្ឋសង្គមនិយមវៀតណាម និងមានការចូលរួមពីបណ្តាប្រទេសជាសមាជិកចំនួន១០, ដៃគូពិភាក្សាចំនួន១០ និងអ្នកសង្កេតការណ៍ចំនួន៦។
កិច្ចប្រជុំនេះ ក៏បានជ្រើសតាំង ឯកឧត្តម ត្រាន់ វ៉ាន់វ៉េ ជាប្រធានសន្និសីទ និងឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន ជាអនុប្រធានសន្និសីទ។
បន្ទាប់ពីបើកសន្និសីទ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន ក្នុងនាមជាអនុប្រធានសន្និសីទ បានចូលរួមកិច្ចប្រជុំពេញអង្គលើកទី១, កិច្ចប្រជុំពិភាក្សាប្រធានប្រតិភូ និងវេទិកាពិភាក្សាប្រធានប្រតិភូជាមួយដៃគូពិភាក្សាផងដែរ៕
ដោយ ៖ វិបុល
