រាជធានីភ្នំពេញ ៖ នៅព្រឹកថ្ងៃអង្គារ ៤រោច ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៧ ខែកញ្ញា ឆ្នាំ២០១៩នេះ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នង ការនគរបាលជាតិ បានអញ្ជើញជាអធិបតីភាពដឹកនាំកិច្ចប្រជុំផ្សព្វ ផ្សាយសភាពការណ៍សន្តិសុខ និងសណ្តាប់ធ្នាប់សាធារណៈ ។
កិច្ចប្រជុំនេះ បានប្រព្រឹត្តទៅនៅក្នុងបរិវេណក្រសួងមហាផ្ទៃ ដោយមានការអញ្ជើញចូលរួមពីអគ្គស្នងការរងនគរបាលជាតិ ស្នងការនគរបាលរាជធានី-ខេត្ត ប្រធាន និងអនុប្រធាននាយកដ្ឋាន អង្គភាពនិងនាយការិយាល័យចំណុះសេនាធិការទាំងអស់ សរុបប្រមាណជាង១,០០០ នាក់ ។
ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរង និងជាប្រធានសេនាធិការ នៃអគ្គស្នងការដ្ឋាននគរបាលជាតិ មាន ប្រសាសន៍ប្រាប់ក្រោយកិច្ចប្រជុំថា កិច្ចប្រជុំនេះមានគោល បំណងសំខាន់ផ្តោតលើការផ្សព្វផ្សាយសភាពការណ៍ថ្មីៗពាក់ព័ន្ធនឹងសន្តិសុខ សណ្តាប់ធ្នាប់ សុវត្ថិភាព សង្គមក្នុងប្រទេសកម្ពុជា សំខាន់គឺការពង្រឹងសមត្ថភាព គុណភាពរបស់កងកម្លាំងនគរបាលទាំងអស់ ឲ្យយកចិត្តទុកដាក់ក្នុងការធានាសន្តិសុខរបស់សង្គម ជាពិសេសការពារសន្តិភាព និងស្ថិរភាពនយោបាយ និងការពារផលប្រយោជន៍ប្រជាពលរដ្ឋ ដែលបច្ចុប្បន្ននេះប្រទេសកម្ពុជាកំពុងតែក្រាលគ្រប់ដោយសន្តិភាព មានសេរីភាព សន្តិសុខ និងសណ្តាប់ធ្នាប់ ។
ឯកឧត្តមបន្តឲ្យដឹងថា ក៏ប៉ុន្តែសភាពការណ៍ថ្មីៗនេះ មានចលនាឧទ្ទាមមានចេតនារៀបផែនការប៉ុនប៉ងបង្កអសន្តិសុខផ្តួលរំលំរាជ រដ្ឋាភិបាលស្របច្បាប់ ដែលកើតចេញពីការបោះឆ្នោតរបស់ប្រជាពលរដ្ឋ ។ ឯកឧត្តម ឧត្តមសេនីយ៍ឯក ឆាយ គឹមខឿន បានបន្តឲ្យដឹងថា ជាទិសដៅឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានសង្កត់ធ្ងន់ការងារ ចំនួនពីរ ៖ គឺទី១-ពង្រឹងសុវត្ថិភាពក្នុងការការពារបុណ្យភ្ជុំបិណ្ឌ ប្រពៃណីជាតិខ្មែរ និងទី២-ការពង្រឹងសន្តិសុខជារួម ដោយមិនអនុញ្ញាតឲ្យកម្លាំងអមិត្ត ឬពួកឧទ្ទាមណាមកបំផ្លិចបំផ្លាញសុវត្ថិភាព សន្តិសុខ និងសន្តិភាព ផលប្រយោជន៍របស់ជាតិដែលកំពុងមានសព្វថ្ងៃនេះឡើយ ៕
ប្រភព៖ ផេកនគរបាលជាតិ
