រាជធានីភ្នំពេញ ៖ នាយឧត្ដមសេនីយ៍ វង្ស ពិសេន អគ្គមេបញ្ជា ការកងយោធពលខេមរភូមិន្ទ បានចេញបញ្ជាថ្មី មិនឲ្យយកកម្លាំង ឬមធ្យោបាយកងទ័ពទៅបម្រើការងារ ឬយាមការពារក្រុមហ៊ុន រោងចក្រ សហគ្រាសឯកជន និងស្លៀកពាក់ឯកសណ្ឋានចូលហាង ឬក្លឹបកម្សាន្តឡើយ នេះបើតាមបញ្ជាចុះថ្ងៃទី០៣ ខែកញ្ញា ឆ្នាំ២០១៩។
តាមបញ្ជា ស្តីពីការមិនអនុញ្ញាតឲ្យយកកងកម្លាំង និងមធ្យោបាយប្រើប្រាស់របស់កងយោធពលខេមរភូមិន្ទ ទៅបម្រើឲ្យវិស័យឯកជន ចុះហត្ថលេខាដោយនាយឧត្ដមសេនីយ៍ វង្ស ពិសេន ហើយដែលអង្គភាពគេហទំព័រ www.rskynews.com យើងទើបទទួលបាននូវបទបញ្ជានោះមាន៣ចំណុច គឺ ៖
ទី១- មេបញ្ជាការប្រភេទទ័ព និងទ័ពជំនាញ នាយកស្ថាប័ន និងសាលាចំណុះអគ្គបញ្ជាការដ្ឋាន នៃកងយោធពលខេមរភូមិន្ទ ត្រូវគ្រប់គ្រងទ័ពរបស់ខ្លួនជាប់ជាប្រចាំ ក្តាប់នូវវត្តមាន អវត្តមាន និងមិនអនុញ្ញាតឲ្យយកកម្លាំងមធ្យោបាយរបស់កងទ័ពទៅបម្រើការងារ ឬយាមការពារក្រុមហ៊ុន រោងចក្រ សហគ្រាសឯកជន និងបម្រើការងារបុគ្គលឯកជនឡើយ។
ទី២-ហាមស្លៀកពាក់ឯកសណ្ឋាន និងយកអាវុធចូលភោជនីយ ដ្ឋាន អគារលក់ទំនិញ ដែលប្រមូលផ្ដុំមហាជនប្រជាជនច្រើន និងក្លឹបកំសាន្ត ដែលនាំឱ្យបាត់សណ្តាប់ធ្នាប់ និងវិន័យកងយោធពលខេមរភូមិន្ទ លើកលែងពេលប្រតិបត្តិការ។
ទី៣- នាយកខុទ្ទកាល័យអគ្គបញ្ជាការដ្ឋាន មេបញ្ជាការប្រភេទទ័ព និងទ័ពជំនាញ នាយកស្ថាប័ន និងសាលាចំណុះអគ្គបញ្ជាការដ្ឋាន ត្រូវចាត់តាំងអនុវត្តបទបញ្ជានេះឲ្យមានប្រសិទ្ធភាពខ្ពស់។
សូមបញ្ជាក់ថា បទបញ្ជានេះ ធ្វើឡើងដោយយោងទៅលើ រដ្ឋធម្មនុញ្ញនៃព្រះរាជាណាចក្រកម្ពុជា, ព្រះរាជក្រឹត្យចុះថ្ងៃទី៦ ខែកញ្ញា ឆ្នាំ២០១៨ ស្តីពីការតែងតាំងរាជរដ្ឋាភិបាល នៃព្រះរាជាណាចក្រកម្ពុជា, ព្រះរាជក្រឹត្យចុះថ្ងៃទី២១ ខែធ្នូ ឆ្នាំ១៩៩៤ ស្តីពីការបង្កើតអគ្គបញ្ជាការដ្ឋាន នៃកងយោធពលខេមរភូមិន្ទ, ព្រះរាជក្រឹត្យចុះថ្ងៃទី១៨ ខែកក្កដា ឆ្នាំ២០០១ ស្តីពីការកែសម្រួលតួនាទីភារកិច្ច និងរចនាសម្ព័ន្ធចាត់តាំងអគ្គបញ្ជាការដ្ឋាននៃកងយោធពលខេមរភូមិន្ទ និងព្រះរាជក្រឹត្យចុះថ្ងៃទី៦ ខែកញ្ញា ឆ្នាំ២០១៨ ស្តីពីការតែងតាំងមុខងារ អគ្គមេបញ្ជាការ នៃកងយោធពលខេមរភូមិន្ទ។
ជាការកត់សំគាល់ បទបញ្ជាបែបនេះ មិនមែនជាលើកទីមួយទេ ដែលស្ថាប័នកងទ័ពបានធ្វើឡើងដើម្បីពង្រឹងវិន័យកងទ័ព ប៉ុន្តែជារឿយៗគេនៅតែឃើញសម្ភារៈរបស់ស្ថាប័នកងទ័ព ត្រូវបានយកទៅបម្រើការងារឯកជន ហើយអាវុធត្រូវបានយកចូលហាង ក្លឹបកម្សាន្ត បង្កបញ្ហាបាញ់បោះជាបន្តបន្ទាប់៕
ដោយ ៖ សុភា
