ភ្នំពេញ ៖ នៅរសៀលថ្ងៃអាទិត្យ ១២កើត ខែមាឃ ឆ្នាំរកា ព.ស ២៥៦១ ត្រូវនឹងថ្ងៃទី២៨ ខែមករា ឆ្នាំ២០១៨ នៅទីស្តីការក្រសួងមហាផ្ទៃ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញចូលរួមដ៏ខ្ពង់ខ្ពស់ ក្នុងពិធីចុះហត្ថ លេខាផែនការសហប្រតិបត្តិការឆ្នាំ២០១៨ រវាងក្រសួងមហាផ្ទៃ នៃព្រះរាជាណាចក្រកម្ពុជា ជាមួយនិងក្រសួងនគរបាល នៃសាធារណរដ្ឋសង្គមនិយមវៀតណាម។
ក្នុងឱកាសនោះដែរ រវាងប្រទេសទាំងពីរ បានពិភាក្សាផ្តោតទៅលើចំណុចសំខាន់ៗ មួយចំនួនដូចខាងក្រោម៖
១. ការត្រួតពិនិត្យ វាយតម្លៃ អំពីសភាពការណ៍សន្តិសុខ និងកិច្ចសហប្រតិបត្តិការរក្សាសន្តិសុខ សណ្តាប់ធ្នាប់រវាងប្រទេសទាំងពីរ
២. វាយតម្លៃអំពីកិច្ចសហប្រតិបត្តិការរវាងកងកម្លាំងនគរបាលទាំងពីររយៈពេល០១ឆ្នាំកន្លងមកនេះ
៣. វាយតម្លៃអំពីការអនុវត្តផែនការឆ្នាំទៅ ទាក់ទងនិងការបំពាក់បំប៉ន បណ្តុះបណ្តាលមន្ត្រី ពាក់ព័ន្ធនិងការផ្លាស់ប្តូរប្រតិភូ ការព្យាបាលជម្ងឺ និងពាក់ព័ន្ធដល់ការផ្តល់ជំនួយបច្ចេកទេស ព្រមទាំងពិភាក្សាគ្នាដើម្បីកំណត់ទិសដៅសំខាន់ៗនៃកិច្ចសហប្រតិបត្តិការឆ្នាំ២០១៨នេះ។
ចុងក្រោយក្រសួងទាំងពីរក៏បានឯកភាពគ្នាចុះហត្ថលេខាលើ ផែនការសម្រាប់កិច្ចសហប្រតិបត្តិការឆ្នាំ២០១៨ ដើម្បីជាសាក្ខីភាពនៃការអនុវត្តផែនការបន្តទៀត៕
ប្រភព ក្រសួងមហាផ្ទៃ
