ពលរដ្ឋ ចំនួន៤៥គ្រួសារ ស្នើនឹង៤៥ខ្នងផ្ទះ បានសង់លំនៅឋានខុសច្បាប់តាមចិញ្ចើមផ្លូវ នៅចំណុចស្ពានឆេះជាច្រើនឆ្នាំ​មកហើយ ទើបតែពេលនេះរាជរដ្ឋាភិបាល បានដោះស្រាយដោយផ្ដល់គោលនយោបាយដីសង្គមកិច្ចជូនពួកគាត់ សម្រាប់​សង់លំនៅឋានថ្មីការរស់នៅប្រចាំថ្ងៃ។លោក គួច ចំរើន អភិបាលខេត្តព្រះសីហនុ បានបញ្ជាក់ថាក្រោយ ពីយល់ព្រម​ដោយ​ស្ម័គ្រចិត្តពីបងប្អូនប្រជាពលរដ្ឋ ទាំង៤៥គ្រួសារ ពីគោលនយោបាយរាជរដ្ឋាភិបាលនោះ អាជ្ញាធរខេត្ត អាជ្ញាធរក្រុង កម្លាំង​សមត្ថកិច្ច និងប្រជាការពារបានជួយរុះរើលំនៅឋានរបស់ពួកគាត់ ចេញពីទីតាំងចាស់ ឆ្ពោះទៅទីតាំងថ្មី រួមជាមួយការផ្ដល់​ស័ង្កី តង់ សម្ភារប្រើប្រាស់មួយចំនួន និងថវិកាខ្លះផងដែរ។លោកអភិបាលខេត្ត ក៏បានថ្លែងអំណរគុណដល់នាយឧត្តម​សេ​នីយ៍​សន្ដិបណ្ឌិត ហ៊ីង ប៊ុនហៀង មេបញ្ជាការ បញ្ជាការដ្ឋានអង្គរក្ស ដែលបានផ្ដល់តង់ធំ និងតង់តូច សម្រាប់សាង​សង់​បណ្ដោះ​អាសន្ន ជូនប្រជាពលរដ្ឋ ដើម្បីបាំងភ្លៀងទម្រាំពួកគាត់ បានសង់លំនៅឋានសម្រាប់ស្នាក់នៅរួចរាល់នោះ។លោក គួច ចំរើន បានអះអាងទៀតថា តាមរយៈគោល នយោ បាយផ្ដល់ដីសម្បទានសង្គមកិច្ចពីរាជរដ្ឋាភិបាល បងប្អូនទាំង​អស់មានចិត្តសប្បាយរីករាយ និងទទួលដោយស្ម័គ្រចិត្ត រួមចំណែកជាមួយ រាជរដ្ឋាភិបាល ពាក់ព័ន្ធការសង់សំណង់ខុស​ច្បាប់​នៅលើចិញ្ចើមផ្លូវ ដែលប្រឈមបញ្ហាជាច្រើន ក្នុងនោះអាចប្រឈមខ្លាំងលើគ្រោះថ្នាក់ចរាចរណ៍ជាដើម៕ដោយ ៖ សុភា