ខេត្តក្រចេះ ៖ នាព្រឹក ថ្ងៃទី០៤ ខែកញ្ញា ឆ្នាំ២០១៩ នេះឯកឧត្តម ទេសរដ្ឋមន្ត្រី គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា និង ឯកឧត្ដម អ៊ុន ចាន់ដា អភិបាល នៃគណអភិបាលខេត្តកំពង់ចាម ព្រមទាំងថ្នាក់ដឹកនាំ ស.អ.ក ខេត្តផងដែរ បានអញ្ជើញទៅប្រគល់ផ្ទះអំណោយ របស់សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងជាប្រធានសមាគមអតីតយុទ្ធជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនអតីតយុទ្ធជន ដែលមានជីវភាពលំបាកមកពីខេត្តកំពង់ចាម ដែលស្ម័គ្រ ចិត្តមករស់នៅក្នុងខេត្តក្រចេះ ចំនួន៤៧ខ្នងផ្ទះ ស្មេីនឹង៤៧គ្រួសារ ដែលស្ថិតនៅភូមិសំបូសែនជ័យ ឃុំស្វាយជ្រះ ស្រុកស្នួល ខេត្តក្រចេះ។
ឯកឧត្តមទេសរដ្ឋមន្ដ្រី បានអំពាវនាវដល់សមាជិកសមាគមអតីតយុទ្ធជនតាមបណ្ដាខេត្តទាំងអស់ ដែលមិនមានផ្ទះ និងដីពិតប្រាកដ ត្រូវដាក់ពាក្យស្នើសុំមកគណៈកម្មការ សមាគមអតីតយុទ្ធជនកម្ពុជា ដើម្បីរៀបចំធ្វើការបែងចែក និងប្រគល់ដី និងផ្ទះសម្រាប់ស្នាក់នៅ ដើម្បីជាការតបស្នងនូវអ្វីដែលអតីតយុទ្ធជនបានពលីជូនជាតិមាតុភូមិ៕
ដោយ ៖ សុភា
