ខេត្តកំពង់ចាម ៖ ឯកឧត្តម អ៊ុន ចាន់ដា អភិបាលនៃគណៈអភិបាល ខេត្តកំពង់ចាម ដើម្បីចូលរួមចំណែកលើការចំណាយរបស់មាតា បិតា ឬអាណាព្យាបាលសិស្សនៅតាមបណ្តាស្រុកនានា ដែលមានជីវភាពខ្វះខាត រដ្ឋបាលខេត្តកំពង់ចាម បានរៀបចំក្រុមការងារពិនិត្យលទ្ធភាព និងរៀបចំកន្លែងស្នាក់នៅដោយឥតគិតថ្លៃ សំរាប់សិស្សានុសិស្ស ដែលមកពីតាមបណ្តាស្រុកនានា ក្នុងខេត្តកំពង់ ចាម ដើម្បីមកចូលរួមប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា ដែលនឹងប្រព្រឹត្តទៅនៅថ្ងៃទី ១៩ ខែសីហា ឆ្នាំ២០១៩ ឆាប់ៗខាងមុខនេះ។
បន្ទាប់ពីឯកឧត្តម អ៊ុន ចាន់ដា ឡើងកាន់តំណែងជាអភិបាលនៃគណៈអភិបាលខេត្តកំពង់ចាម ឯកឧត្តមបានដឹកនាំមន្ត្រីក្រោមឱវាទចុះពិនិត្យស្ថានភាពស្រូវរដូវវស្សា និងអន្តរាគមន៍បូមទឹកដាក់ស្រែជូនប្រជាពលរដ្ឋ ដែលកំពុងរងគ្រោះដោយភាពរាំងស្ងួត នៅឃុំសំពងជ័យ ស្រុកជើងព្រៃ ខេត្តកំពង់ចាម ។
ក្នុងរយៈពេលកន្លងមក ឯកឧត្តម អ៊ុន ចាន់ដា អភិបាលនៃគណៈអភិបាល ខេត្តកំពង់ចាម នៅបានដឹកនាំមន្ទីរអង្គភាពពាក់ព័ន្ធ និងអាជ្ញាធរមូលដ្ឋាន ចុះពិនិត្យស្ថានភាព ច្រាំងទន្លេ ដែលកំពុងរងការគម្រាមកំហែងដោយសារគ្រោះធម្មជាតិ បាក់ស្រុតចូលទន្លេ ស្ថិតនៅចំណុចឃុំពាមកោះស្នា និងឃុំព្រះអណ្ដូង នៃស្រុកស្ទឹងត្រង់ ខេត្តកំពង់ចាម ដែលបច្ចុប្បន្ននេះ គ្រោះធម្មជាតិ បានគម្រាមកំហែង និងធ្វើឲ្យបាក់ស្រុតច្រាំង កាន់តែខ្លាំងឡើងថែមទៀត ។
ឯកឧត្តម អ៊ុន ចាន់ដា អភិបាលនៃគណៈអភិបាល ខេត្តកំពង់ចាម បានស្តារឡើងវិញនូវសួនច្បារមាត់ទន្លេមេគង្គដើម្បីលំអរសោភ័ណ្ឌភាពក្រុងកំពង់ចាម នៅដើមឆ្នាំ២០២០ បន្ទាប់ពីរងគ្រោះបាក់ស្រុតច្រាំងទន្លេក្នុងរយ:កាលកន្លងមក ដើម្បីបម្រើជូនប្រជាពលរដ្ឋដើរកំសាន្ត និងហាត់ប្រាណដើម្បីសុខភាព៕
ដោយ ៖ សុភា
