រាជធានីភំ្នពេញ ៖ នៅថ្ងៃទី១៣ ខែសីហា ឆ្នាំ២០១៩ នៅសាលាខណ្ឌជ្រោយចង្វារ សាខាកាកបាទក្រហមកម្ពុជា រាជធានីភ្នំពេញ បានរៀបចំពិធីបើកវគ្គបណ្តុះបណ្តាលជាមូលដ្ឋាន រយៈពេល១ថ្ងៃ ដល់អ្នកស្ម័គ្រចិត្តកាកបាទក្រហមកម្ពុជា ប្រចាំខណ្ឌដែលបានជ្រើសរើសមកពីបណ្តាសង្កាត់ចំនួន៥ សរុបចំនួន៦៦នាក់ (ស្រី១៩នាក់) ក្រោមអធិបតីភាព លោក ជិន ប៊ុនធឿន នាយកប្រតិបត្តិសាខា ។
មានប្រសាសន៍ក្នុងឱកាសនោះ ក្នុងនាមឯកឧត្តម ឃួង ស្រេង ប្រធានគណៈកម្មាធិការសាខា លោកនាយកប្រតិបត្តិសាខា បានពាំនាំមកនូវការផ្តាំផ្ញើសាកសួរសុខទុកពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់បងប្អូនជាអ្នកស្ម័គ្រចិត្តទាំងអស់ដោយក្តីនឹករលឹក ព្រមទាំងគូស បញ្ជាក់ថា គោលបំណងនៃវគ្គបណ្តុះបណ្តាលនេះ គឺដើម្បីអោយបងប្អូនជាសិក្ខាកាមទាំងអស់បានដឹងពី ៖
១- ប្រវត្តិចលនាកាកបាទក្រហម អឌ្ឍចន្ទក្រហម បដិរូប និងគោលការណ៍គ្រឹះ។
២- គោលនយោបាយ តួនាទីរបស់ អ្នកស្ម័គ្រចិត្តកាកបាទក្រហមកម្ពុជា។
៣- សុវត្ថិភាពចរាចរណ៍ផ្លូវគោក។
៤-ការគ្រប់គ្រងគ្រោះមហន្តរាយ និងការគ្រប់គ្រងអគ្គីភ័យ ។
៥-វិជ្ជាសង្គ្រោះបឋម។
លោកនាយកប្រតិបត្តិសាខា បានគូសបញ្ជាក់បន្ថែមថា ចាប់តាំងពីមុនមករហូតមកដល់បច្ចុប្បន្ននេះ អ្នកស្ម័គ្រចិត្ត គឺពិតជាបានដើរតួនាទីយ៉ាងសំខាន់ណាស់ ក្នុងការចូលរួមការងារមនុស្សធម៍ ដោយមិនចង់បានអ្វី តបស្នងមកវិញ គឺចូលរួមដោយស្មោះស្ម័គ្រ គឺគ្មានប្រាក់បៀវត្សន៍ ឬប្រាក់ជួយឧបត្ថម្ភទាំងអស់ គឺទាំងគ្នាបានបូជាកម្លាំងកាយចិត្ត ពេលវេលាដ៏មានតំលៃអ្វីទ្បើយ គឺលះបង់ពេល វេលាចូលរួមផ្សព្វផ្សាយអប់រំតម្លៃមនុស្សធម៌ ជាអ្នកជួយសង្គ្រោះ និងជាអ្នកផ្តល់ព័ត៌មានអំពីគ្រោះមហន្តរាយផ្សេងៗរបស់ជនរង គ្រោះ និងជនងាយរងគ្រោះបានទាន់ពេលវេលានៅតាមខណ្ឌ សង្កាត់ ភូមិ របស់ខ្លួនតាមរយះខ្សែស្របរបស់ខ្លួន។
ជាទីបញ្ចប់លោកនាយកប្រតិបត្តិសាខា ក៏សូមអោយបងប្អូនសិក្ខា កាមទាំងអស់ ខិតខំយកចិត្តទុកដាក់ ក្រេបជញ្ជក់ចំណេះដឹងពីគ្រូ បង្ហាត់ឲ្យបានល្អ ដើម្បីចូលរួមក្នុងសកម្មភាពមនុស្សធម៌ឲ្យកាន់តែល្អបន្ថែមទៀត ។ តាមពាក្យស្លោក (កាកបាទក្រហមកម្ពុជា មានគ្រប់ទីកន្លែងសម្រាប់គ្រប់ៗគ្នា ដោយមិនទុកនរណាម្នាក់ចោល) និងធ្វើការផ្សព្វផ្សាយបន្តទៅដល់ក្រុមគ្រួសារ មិត្តភក្តិ និងសហ គមន៍ ហើយអាចយកចំណេះដឹងនេះទៅជួយប្រជាពលរដ្ឋដែលជួបបញ្ហាគ្រោះថ្នាក់ភ្លាមៗបានទាន់ពេលវេលា៕
ដោយ ៖ សុភា
