រាជធានីភ្នំពេញ ៖ ណិតយឺហោ 336 NET ដែលមានកុំព្យួទ័ចំនួន១៦គ្រឿងតំរៀបលើតុសំរាប់ដាក់អោយភ្ញៀវញៀនល្បែងចូលលេង មានទីតាំងតាមបណ្ដោយផ្លូវ៣៣៦ សង្កាត់បឹងសា ឡាង ខណ្ឌទួលគោក សង្ស័យបង្កប់ល្បែងភ្នាល់បាល់ ឡូតូ និង Jocker ព្រមទាំងអាចមានចែកចាយ និងប្រើប្រាស់គ្រឿងញៀនខុសច្បាប់ទៀតផង តែអាជ្ញាធរនិងសមត្ថកិច្ចខណ្ឌទួលគោក មិនហានបង្ក្រាបដោយថាចំណេះ ដឹងបច្ចេកវិទ្យានៅខ្សោយ តាមការបញ្ជាក់ពីលោក គឹម កូលីដូ នាយប៉ុស្តិនគរបាលរដ្ឋបាលបឹងសាឡាង អោយគេហទំព័រ www.rskynews.com ដឹងនៅល្ងាចថ្ងៃទី០៨ ០៨ ២០១៩ ។
ទោះជាយ៉ាងណាមហាជនបានដាក់ការសង្ស័យថា ហេតុអីអាជ្ញាធរថ្នាក់ក្រោមបើមិនមានជំនាញទេ គួរតែធ្វើរបាយការណ៏ជូនថ្នាក់លើរបស់ខ្លួន ដែលមានជំនាញគ្រប់គ្រាន់ និងធនធាន មនុស្សសំបូរបែបអោយចុះមកបង្ក្រាប។
កាលពីពេលថ្មីកន្លងទៅនេះ លោកឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញ ចេញបទបញ្ជាតឹងរឹងឲ្យ មន្ត្រីក្រោមឱវាទ ចាត់ការល្បែងស៊ីសងគ្រប់ប្រភេទ បែរជាអាជ្ញាធរ និងសមត្ថកិច្ចខណ្ឌទួលគោក មិនខ្វល់ចំពោះការ បង្ក្រាបនោះទេ។
សូមបញ្ជាក់ថា ៖ សម្ដេច ក្រឡា ហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ លោក ឃួង ស្រេង អភិបាលរាជធានីភ្នំពេញបានដាក់ និងលោក ស ថេត ស្នងការនគរបាលរាជធានីភ្នំពេញ សុទ្ធតែធ្លាប់បានចេញបទបញ្ជាឲ្យមន្ត្រីថ្នាក់ ក្រោម បង្ក្រាបទីតាំងល្បែងស៊ីសងគ្រប់ប្រភេទ ក្នុងរាជធានីភ្នំពេញ ព្រោះវាជាមូលហេតុនាំឲ្យមានសកម្មភាពចោរឆក់ចោរប្លន់។
មហាជននឹងរង់ចាំមើលថា តើលោកឯក ឃុនឌឿន អភិបាលខណ្ឌទួលគោក និងលោកសុខ ហេង អធិការនគរបាលខណ្ឌទួលគោក ហ៊ានបង្ក្រាបទីតាំងល្បែងខាងលើនេះដែរឬទេ? ៕
ដោយ ៖ វិបុល
