ភ្នំពេញ ៖ លោក សុខ បញ្ញា នាយរងផ្នែកសន្តិសុខ ដឹកនាំសហការជា មួយកម្លាំងអន្តរាគមន៍ពិសេស នៃអធិការដ្ឋាននគរបាលខណ្ឌ ពោធិ៍សែនជ័យ ក្រោមការបញ្ជាផ្ទាល់ពី លោក យឹម សារ៉ាន់ បានបើកប្រតិបត្តិការ ស្រាវជ្រាវរហូតកំណត់មុខសញ្ញា បង្ក្រាបករណីជួញដូរគ្រឿងញៀនចំនួន៣ករណីផ្សេងគ្នាក្នុងពេលតែមួយ ដោយឃាត់ខ្លួនជនសង្ស័យចំនួន៣នាក់ ជាក់ស្តែងដែលកំពុងលក់ និងចែកចាយ ដោយកំលាំងរបស់លោកបានដកហូតបានថ្នាំញៀន៥៣កញ្ចប់។
លោកអធិការ យឹម សារ៉ាន់ បានអោយសារព័ត៍មានយើងដឹងថា នៅវេលាម៉ោង១០៖៣០នាទីព្រឹកថ្ងៃទី ១៣ ខែមករា ឆ្នាំ២០១៨ ស្ថិតនៅភូមិថ្មគោល១ សង្កាត់ចោមចៅទី២ ខណ្ឌពោធិ៍សែនជ័យ កម្លាំងរបស់លោកបានបើកប្រតិបត្តិការមួយករណី ដោយឃាត់ខ្លួនជនសង្ស័យម្នាក់ ឈ្មោះ ឌី វ៉ាន់លូ អាយុ១៨ឆ្នាំ មុខរបរមិនពិត ស្នាក់នៅភូមិកើតហេតុខាងលើ ដែលកំពុងឈរលក់ថ្នាំញៀន និងដកហូតថ្នាំញៀនចំនួន២៥កញ្ចប់។
លុះនៅវេលាម៉ោង០៤៖២០នាទីល្ងាចកម្លាំងរបស់លោកបន្តប្រតិបត្តិការនៅចំណុចភូមិថ្មគោល១ សង្កាត់ចោមចៅទី២ ខណ្ឌពោធិ៍សែនជ័យដដែល ដោយជនសង្ស័យម្នាក់ទៀតជា «អនិតិជន» ប្រគល់ទៅឲ្យខាងសង្កាត់យកទៅអប់រំកែប្រែ និងដកហូតបានថ្នាំ១១កញ្ចប់។
នៅវេលាម៉ោង០៥៖០០នាទីល្ងាច ស្ថិតនៅភូមិត្រពាំងថ្លឹង ច្រកឌឿងហែម ខាងក្រោយផ្ទះល្វែងខាងលិចរោងចក្រ៦ជាន់ សង្កាត់ចោមចៅទី១ ខណ្ឌពោធិ៍សែនជ័យ កម្លាំងរបស់លោកបានបន្តប្រតិបត្តិការ បានបន្តឃាត់ខ្លួនជនសង្ស័យម្នាក់ទៀត ដែលកំពុងឈរលក់ថ្នាំញៀនយ៉ាងសកម្ម ជនសង្ស័យខាងនេះឈ្មោះ ឃុត ទី អាយុ១៩ឆ្នាំ មុខរបរមិនពិត ស្នាក់នៅភូមិកើតហេតុ ដោយដកហូតថ្នាំម៉ាទឹកកក បានចំនួន១៦កញ្ចប់។
បច្ចុប្បន្ន ជនសង្ស័យខាងលើ ត្រូវបានបញ្ចូនមកកាន់ផ្នែកជំនាញគ្រឿងញៀន នៃអធិការនគរបាលខណ្ឌពោធិ៍សែនជ័យ ដើម្បីចាត់ការទៅតាមផ្លូវច្បាប់ ៕
