ខេត្តកំពត ៖ រាជរដ្ឋាភិបាលកម្ពុជាបានកំណត់យកថ្ងៃទី២០-២១- ២២ ខែធ្នូ ឆ្នាំ២០១៩ រៀបចំពិធីបុណ្យសមុទ្រលើកទី៨ ជុំទី២ នៅខេត្តកំពត ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។
យោងតាមគេហទំព័រហ្វេសប៊ុក របស់ក្រសួងទេសចរណ៍ នៅថ្ងៃទី២២ ខែកក្កដា ឆ្នាំ២០១៩ បានឲ្យដឹងថា ដើម្បីត្រៀមរៀបចំ ព្រឹត្តិការណ៍ទេសចរណ៍ធំប្រចាំឆ្នាំនេះ ប្រកបដោយភាពជោគ ជ័យ ក្រសួងទេសចរណ៍ រដ្ឋបាលខេត្តកំពត មន្ទីរអង្គភាពពាក់ព័ន្ធជុំវិញខេត្ត បានជួបប្រជុំជាមួយគ្នាជារឿយៗផងដែរ។
លោក ថោង ខុន រដ្ឋមន្ត្រីក្រសួងទេសចរណ៍ បានលើកឡើងពីការងារមួយចំនួន ដែលត្រូវរួមគ្នាអនុវត្តបន្ត ក្នុងនោះរួមមាន៖
ទី១. កំណត់យកខេត្តកំពត ជាខេត្តគំរូក្នុងការរៀបចំឲ្យមាន “វិថីម្ហូបអាហារ ឬហៅថា Street Food” ឲ្យបានលេចធ្លោរឡើង។
ទី២. ជំរុញឲ្យមានការផ្សព្វផ្សាយ ពីគោលដៅទេសចរណ៍នានា នៅខេត្តកំពតឲ្យបានទូលំទូលាយ ពិសេស រមណីយដ្ឋានឋានសួគ៌បូកគោ តំបន់កសិទេសចរណ៍កូនសត្វ ចម្ការម្រេច និងផលិផលម្រេចកំពត ភ្នំកំពង់ត្រាច រមណីយដ្ឋានទឹកឈូ និងរមណីយដ្ឋាន ទេសចរណ៍ជាច្រើនទៀត។
ទី៣. ត្រៀមរៀបចំពិព័រណ៍ផលិតផលក្នុងស្រុក ដែលជាផលិត ផលកសិកម្មនាំចេញនៅនឹងកន្លែង ដូចជា៖ ធូរេន ចេក សាវម៉ាវ ដូង ស្រកានាគជាដើម។
ទី៤. ត្រៀមរៀបចំព្រឹត្តិការណ៍សិល្បៈ ទស្សនីយភាព របាំ តន្ត្រី និងត្រូវអញ្ជើញក្រុមសិល្បៈរបស់ប្រទេសជិតខាង និងខេត្តដែលជាសម្ព័ន្ធមេត្រីរបស់ខេត្តកំពត ឲ្យចូលរួមក្នុងព្រឹត្តិការណ៍ខាងមុខនោះ។
ទី៥. ជំរុញឲ្យរដ្ឋបាលខេត្តកំពត គប្បីរៀបចំឆ្នេរខ្សាច់ថ្មីទៀត ដើម្បីបង្កើតជាផលិតផលទេសចរណ៍ទាក់ទាញបន្ថែម។
ទី៦. ស្នើឲ្យក្រុមហ៊ុនសុខាបូកគោ គប្បីរៀបចំព្រឹត្តិការណ៍កម្សាន្តផ្សេងៗ តាមដែលអាចធ្វើទៅបាន ដើម្បីរួមចំណែក ក្នុងការទាក់ទាញភ្ញៀវទេសចរ បន្ថែមក្នុងព្រឹត្តិការណ៍ធំនេះ ដូចជាព្រឹត្តិការណ៍ ដើរកម្សាន្តក្នុងព្រៃ រត់ម៉ារ៉ាតុន ប្រណាំងកង់ ប្រណាំងទូក និងទស្សនាកម្សាន្តនៅតាមតំបន់ ទាក់ទាញមួយចំនួនទៀត នៅលើភ្នំបូកគោ។
ទី៧. លោករដ្ឋមន្ត្រី បានគាំទ្រឲ្យមានព្រឹត្តិការណ៍កីឡាឲ្យបានច្រើន ពិសេស ប្រភេទកីឡាដែលនឹងត្រូវដាក់ក្នុងការប្រកួតកីឡាស៊ីហ្គេម មកចូលរួមប្រកួត ក្នុងព្រឹត្តិការណ៍បុណ្យសមុទ្រ ឲ្យបានច្រើនតាមដែលអាចធ្វើទៅបាន ដូចជា ជិះកង់ រត់ប្រណាំង កីឡាលើទឹក លើឆ្នេរ និងលើគោក។
ទី៨. ជំរុញឲ្យយកចិត្តទុកដាក់ ពង្រឹងគុណភាព សេវាកម្ម អនាម័យចំណីអាហារ ត្រូវបានបដិសណ្ឋារកិច្ចល្អ ត្រូវមានឯកសណ្ឋាន ឲ្យបានត្រឹមត្រូវ និងត្រូវមានការលើកទឹកចិត្តចំពោះមូលដ្ឋានអាជីវកម្មណាដែលអនុវត្តបានត្រឹមត្រូវតាមនីតិវិធី នៃការត្រួតពិនិត្យ វាយតម្លៃរបស់ក្រសួងទេសចរណ៍។
ទី៩. ចំពោះការងារពាក់ព័ន្ធនឹងសហគមន៍ទេសចរណ៍ និងរមណី យដ្ឋាននានា នៅខេត្តកំពត កែប និងខេត្តព្រះសីហនុ ត្រូវយកចិត្តទុកដាក់លើការពង្រឹងគុណភាព សេវាកម្មអនាម័យ ចំណីអាហារ សុវត្ថិភាពភ្ញៀវទេសចរ ពិសេស ត្រូវផ្សព្វផ្សាយឲ្យបានឆាប់ រហ័ស អំពីកញ្ចប់ទស្សនកិច្ចទេសចរណ៍មកកាន់ខេត្តកំពត និងតំបន់ឆ្នេរសមុទ្រ នៃប្រទេសកម្ពុជាទាំងមូលតាមរយៈកម្មវិធីនៅលើទូរស័ព្ទវៃឆ្លាត (Mobile App)។
ទី១០. ត្រូវរៀបចំការតុបតែងលម្អឲ្យមានសោភ័ណភាពល្អ ពិសេស គឺការចូលរួមពីសំណាក់ប្រជាពលរដ្ឋ ធ្វើយ៉ាងណាឲ្យទូទាំងខេត្ត និងក្រុងកំពតមានភាពស្អាត និងត្រូវមានបង្គន់អនាម័យឲ្យបានគ្រប់គ្រាន់ ត្រូវធ្វើឲ្យមានការប្រែប្រួលគួរជាទីមោទនៈ។ រីឯបង្គន់អនាម័យ និងបន្ទប់ទឹក នៅតាមភោជនីយដ្ឋាន អាហារដ្ឋាន ផ្ទះសំណាក់ សណ្ឋាគារ ស្ថានីយប្រេងឥន្ទនៈ ទីសាធារណៈទៀតសោត ក៏ត្រូវតែស្អាតជានិច្ច៕
ដោយ ៖ សុភា
