ខេត្តកំពង់ចាម ៖ ក្នុងពិធីបុណ្យរុក្ខទិវា ៩កក្កដា នាព្រឹកថ្ងៃទី១៨ ខែកក្កដា ឆ្នាំ ២០១៩នេះ ឯកឧត្តម អ៊ុន ចាន់ដា អភិបាល នៃគណៈ អភិបាល ខេត្តកំពង់ចាម បានថ្លែងជំរុញដល់អាជ្ញាធរ ត្រូវសហការជាមួយ សមត្ថកិច្ចជំនាញពាក់ព័ន្ធ ទាំងក្នុងនិងក្រៅខេត្ត ដើម្បីរួមគ្នាទប់ស្កាត់បទល្មើសព្រៃឈេី ព្រោះព្រៃឈើពិតជាផ្តល់នូវអត្ថប្រយោជន៍ និងសារៈសំខាន់ណាស់ សម្រាប់សង្គម មនុស្ស និងសត្វ ហេីយវាក៏អាចស្រូបយកឧស្ម័នការបូនិច្ច និងបញ្ចេញមកវិញនូវឧស្ម័នអុកស៊ីសែន កាត់បន្ថយកំដៅ ផ្តល់នូវទីជម្រក សម្រាប់មនុស្ស និងសត្វ ជួយបង្កើននូវជីវជាតិដី ទប់ទល់ការហូរច្រោះនិយ័តកម្ម ផ្តល់នូវប្រភពទឹក និងជារបាំងការពារខ្យល់ព្យុះទៀតផង។ មិនតែប៉ុណ្ណោះ ព្រៃឈើក៏បានរួមចំណែកដល់អេកូទេសចរណ៍ ដែលបង្កើតការងារ និងជាប្រភពចំណូលដ៏សំខាន់សម្រាប់សហគមន៍មូលដ្ឋាន តាមរយៈការទាក់ទាញភ្ញៀវទេសចរជាតិ-អន្តរជាតិ មកទស្សនាកម្សាន្តផងដែរ ។
កម្មវិធីនេះប្រព្រឹត្តទៅ នៅវិទ្យាល័យ ហ៊ុន សែន ព្រៃទទឹង ស្ថិតក្នុងភូមិព្រៃទទឹង ឃុំជ្រៃវៀន ស្រុកព្រៃឈរ ខេត្តកំពង់ចាម ។
ឯកឧត្តម អភិបាលខេត្ត បានបញ្ជាក់ថា បុណ្យរុក្ខទិវា គឺជាពិធីដ៏សំខាន់ និងមានប្រយោជន៍ សម្រាប់ដាស់ស្មារតីដល់ប្រជាពលរដ្ឋ ឲ្យចេះស្រឡាញ់ព្រៃឈើ និងថែរក្សាព្រៃឈើ ហើយពិធីបុណ្យរុក្ខទិវានេះ ត្រូវបានបង្កើតឡើងដោយសម្តេចព្រះបរមរតនកោដ្ឋ ដែលរហូតមកដល់បច្ចុប្បន្ន រាជរដ្ឋាភិបាលកម្ពុជា បានប្រារព្ធធ្វើជារៀងរាល់ឆ្នាំ មិនដែលអាក់ខានឡើយ ។
ឆ្លៀតក្នុងឱកាសនោះដែរ ឯកឧត្តម អភិបាលខេត្ត បានអំពាវនាវដល់បងប្អូនប្រជាពលរដ្ឋទាំងអស់ រួមទាំងព្រះសង្ឃ មន្ត្រីរាជការ សិស្ស និស្សិត យកចិត្តទុកដាក់ដាំដើមឈើគ្រប់ប្រភេទ ឲ្យបានច្រើនជាអតិបរិមា នៅតាមវត្តអារាម ភូមិដ្ឋាន ទីសាធារណៈ តាមប្រព័ន្ធទំនប់ប្រឡាយ តាមដងផ្លូវនានា ហើយខិតខំថែរក្សារុក្ខជាតិទាំងអស់នេះឲ្យបានល្អ ដើម្បីជាផលប្រយោជន៍ដល់ខ្លួនឯងផ្ទាល់ ក៏ដូចជាមនុស្សជាតិទាំងមូល ។
ក្នុងនោះដែរ ឯកឧត្តម អភិបាលខេត្ត ក៏បានចែកកូនឈើចម្រុះជូនប្រជាពលរដ្ឋ ចំនួន២០០០ដេីម សម្រាប់យកទៅដាំតាមលំនៅដ្ឋាន និងចូលរួមដាំកូនឈើមានតម្លៃចម្រុះចំនួន២៥០០ដេីម នៅវិទ្យា ល័យ ហ៊ុន សែន ព្រៃទទឹង ក្នុងគោលបំណង សំដៅប្រែក្លាយតំបន់នេះ ឲ្យពោរពេញទៅដោយព្រៃឈើសំបូរបែប ដែលអាចបង្កើតជាគំរបពណ៌បៃតងខួបប្រាំង ខួបវស្សា និងធ្វើឲ្យប្រសើរឡើង នូវសោភណ្ឌភាពធម្មជាតិពិតៗ ស្រស់បំព្រងផងដែរ ។
បើយោងតាមរបាយការណ៍របស់ លោក គឹម សាវឿន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ចាម បានឲ្យដឹងថា ខេត្តកំពង់ចាម បានប្រារព្ធពិធីបុណ្យរុក្ខទិវា ចំនួន២៥លើកមកហើយ ដោយដាំឈើចម្រុះប្រភេទ បានចំនួនសរុប៥៨ហិកតា ដោយមានការណែនាំពីថ្នាក់ដឹកនាំខេត្ត មកដល់ពេលនេះ ខណ្ឌរដ្ឋបាលព្រៃឈើខេត្តកំពង់ចាម បានបង្កើតសួនអនុស្សាវរីយ៍ និងសួនអាពាហ៍ពិពាហ៍ បានចំនួន២កន្លែង ដោយ១កន្លែង នៅភូមិថ្មី ឃុំក្រូច ស្រុកព្រៃឈរ និង១កន្លែងទៀត ស្ថិតនៅក្នុងវត្តនគរបាជ័យ ស្រុកកំពង់សៀម សម្រាប់ផ្តល់ជូនថ្នាក់ដឹកនាំ និងជាឱកាសដល់គូរស្រកថ្មី ដាំដើមឈើទុកជាអនុស្សាវរីយ៍ ។
ដោយឡែក សម្រាប់ឆ្នាំ២០១៩នេះ ខណ្ឌរដ្ឋបាលព្រៃឈើខេត្តកំពង់ចាម មានថ្នាលបណ្តុះកូនឈើចំនួន៧កន្លែង ក្នុងនោះមានសួនបណ្តុះកូនឈើសម្តេចតេជោ ហ៊ុន សែន ព្រៃកុង(ស្គន់) ថ្នាលបណ្តុះកូនឈើ ឯកឧត្តមឧបនាយករដ្ឋមន្ត្រី យឹម ឆៃលី សួនបណ្តុះកូនឈើ ឯកឧត្តម ហ៊ុន ណេង ភ្នំប្រុស ថ្នាលបណ្តុះកូនឈើខណ្ឌរដ្ឋបាលព្រៃឈើកំពង់ចាម (ក្រុងកំពង់ចាម) ថ្នាលបណ្តុះកូនឈើសង្កាត់រដ្ឋបាលព្រៃឈើស្រីសន្ធរ (ស្រុកស្រីសន្ធរ)ថ្នាលបណ្តុះកូនឈើសង្កាត់រដ្ឋបាលព្រៃឈើស្ទឹងត្រង់ (ស្រុកស្ទឹងត្រង់) និងថ្នាលបណ្តុះកូនឈើសង្កាត់រដ្ឋបាលព្រៃឈើកងមាស(ស្រុកព្រៃឈរ) ផងដែរ ៕
ដោយ ៖ សុភា
