រាជធានីភ្នំពេញ ៖ ទោះបីជាមានបទបញ្ជាយ៉ាងម៉ឺងម៉ាត់ របស់ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានដាក់បទបញ្ជាឲ្យអាជ្ញាធរមានសមត្ថកិច្ចទាំង១៤ខណ្ឌ រឹតបន្តឹង នឹង បង្ក្រាបទីតាំងបង្កប់ល្បែងសុីសងគ្រប់ប្រភេទនៅក្នុងមូលដ្ឋានរបស់ខ្លួនយ៉ាងណាក៏ដោយ ក៏គេនៅសង្កេតឃើញថា មានទីតាំង ទូប៉ាញ់ត្រីដែលមានយឺហោ V កំពុងបើកដំណើរការយ៉ាងរលូន ដោយមិនរំខានដល់អាជ្ញាធរមានសមត្ថកិច្ចសង្កាត់ផ្សារថ្មី៣ ខណ្ឌដូនពេញ នោះឡើយ ដោយមន្រ្តីតូចតាចនៅក្នុងខណ្ឌបានលួចបង្ហើបប្រាប់ថា ម្ចាស់ទីតាំងខាងលើនេះយកដុល្លារចុកមាតមន្រ្តីទាំងអស់ហើយនោះទើបម្នាក់ៗជាប់ចង្កេះមិនមានចំណាត់ ការបង្ក្រាបទាល់តែសោះរហូតដល់ពេលនេះ។
ទីតាំងទូប៉ាញ់ត្រីនេះស្ថិតនៅតាមបណ្ដោយផ្លូវ៥១ សង្កាត់ផ្សារថ្មី ទី៣ ខណ្ឌដូនពេញ រាជធានីភ្នំពេញ។ ប្រជាពលរដ្ឋដែលរស់នៅក្បែរទីតាំងនេះមានការរអួររទាំងនិងភាពរញ៉េរញ៉ៃរបស់អ្នកលេងប៉ាញ់ត្រីនៅទីនេះណា ដោយទីតាំងនេះមានទាំងការប្រើប្រាស់គ្រឿងញៀនថែមទៀតផង។
សូមរំលឹកថា ឯកឧត្ដម អភិបាល រាជធានីភ្នំពេញបានថ្លែងក្នុងឱកាសប្រកាសស្តីពី ការដាក់ឱ្យដំណើរការរដ្ឋបាលខណ្ឌបឹងកេងកង នៅរសៀលថ្ងៃទី២០ ខែមិថុនា ឆ្នាំ២០១៩ ដោយឯកឧត្ដមអភិបាល បានចាត់ទុកថា ការទទួលសំណូកពីជនល្មើសទាំងនោះគឺជា ទង្វើរខុសច្បាប់ដែលមិនអាចលើកលែងឱ្យបានឡើយ ។
ឯកឧត្តម ឃួ ង ស្រេង ក៏បាន ដាក់បទបញ្ជាដល់អាជ្ញាធរមូលដ្ឋានទាំងអស់ត្រូវដោះស្រាយ បញ្ហាល្បែងស៊ីសងខុសច្បាប់នេះឱ្យខាងតែបាន ដើម្បីធានាសន្តិសុខសណ្តាប់ធ្នាប់នៅក្នុងសង្គម ។
នៅរសៀលថ្ងៃទី១៨ ខែកក្តដា ឆ្នាំ២០១៩ អង្គភាពគេហទំព័រ www.rskynews.com យើងបានទូរស័ព្ទរាយការណ៏ជូនលោក កុល ខាន់ណារ៉ា នាយប៉ុស៌្តនគរបាលសង្កាត់ផ្សារថ្មីទី៣ ទីតាំងនេះលោកបានដឹងហើយ ហើយលោកនៅតែចុះបង្ក្រាបទេពេលសុំគោលការណ៏បានពីថ្នាក់លើ។
ប្រភពពីប្រជាពលរដ្ឋបានលើកឡើងថា បើទោះជា លោក អភិបាល រាជធានីភ្នំពេញដាក់បទញ្ជាម៉ឺងម៉ាត់យ៉ាងណាក៏ដោយក៏អាជ្ញាធរមានសមត្ថកិច្ច ខណ្ឌដូនពេញ មិនអើពើទប់ស្កាត់និងបង្ក្រាបនោះឡើយ ៕
ដោយ ៖ សុភា
