រាជធានីភ្នំពេញ ៖ នៅថ្ងៃពុធ ០១ រោច ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៧ ខែកក្កដា ឆ្នាំ២០១៩ វេលាម៉ោង ១០និង ៣០ នាទី លោក ឯក ឃុនដឿន អភិបាលនៃគណៈអភិបាលខណ្ឌ ទួលគោក និងជាប្រធានគណៈបញ្ជាការឯកភាពខណ្ឌ បានដឹកនាំចង្អុលបង្ហាញអោយគណៈបញ្ជាការឯកភាពខណ្ឌរួមមានលោក ហួរ ហួត នាយករដ្ឋបាលសាលាខណ្ឌ ជាអ្នកដឹកនាំគណៈកម្មការចំរុះដែលមានលោក សូ ជា ចៅសង្កាត់រង២, លោក អ៊ិន វតន មន្រ្តីអន្តរវិស័យ, លោក លោក ផុន សារ៉ន សមាជិកក្រុមប្រឹក្សា, លោក ឈឿន សុវណ្ណ នាយរងប៉ុស្តិ និងលោក ហេង ច័ន្ទវឌ្ឍនៈ ជំនួយការរដ្ឋបាលសង្កាត់ បានចុះបង្ក្រាបជាក់ស្ដែងលើទីតាំង អ៊ីនធើណិត យឺហោ WiFi បើកល្បែងស៉ីសងតាមប្រព័ន្ធអនឡាញ (ភ្នាល់បាល់ បៀ ឡូតូ តាមអ៉ីនធើណែត) ស្ថិតនៅផ្ទះលេខ ២៨៧D ផ្លូវលេខ ១៨២ (ទេពផន) ភូមិទី១៣ សង្កាត់ទឹកល្អក់២ ខណ្ឌ ទួលគោក រាជធានីភ្នំពេញ។
ជាលទ្ធផលក្នុងប្រតិបត្តិការខាងលើនេះ គណៈបញ្ជាការឯកភាព បានណែនាំដល់អ្នកញឿននិងល្បែង២នាក់ អោយឈប់ប្រព្រឹត្ត ទៅដោយគ្មានកំណើតទេ នាំអោយបំផ្លាញទ្រព្យសម្បត្តិ និងបាត់ បង់កិត្តិយសក្នុងសង្គម អ្នកដែលឈ្នះគឺទៅលើមេ។ រីឯបុគ្គលិក២ នាក់ជាស្រ្តីប្រចាំការទីតាំងខាងលើ គណៈបញ្ជាការឯកភាពគ្រាន់តែធ្វើការណែនាំ ហើយធ្វើកំណត់ហេតុដកហូតយកសម្ភារៈកុំព្យូទ័រ ចំនួន ១៩គ្រឿង។ ទោះជាមានការដកហូតសម្ភារៈទាំងអស់ នេះហើយក៏ដោយ តែទីតាំងនេះនៅតែដំណើរការធម្មតាដោយ នៅមានបុគ្គលិកចាំទទួលលុយដាក់ចូលក្នុងអាខោនហើយអាចលេងតាមផ្ទះវិញ ឬតាមទូស័ព្ទដៃ។
បច្ចុប្បន្ននេះវត្ថុតាងត្រូវបានបញ្ជូនទៅកាន់សាលាខណ្ឌ ដើម្បីអនុវត្តតាមនីតិវិធីជាបន្តទៀត ដោយឡែកទីតាំងខាងលើត្រូវបិទចោលជាបណ្ដោះអាសន្នផងដែរ៕
ដោយ ៖ សុភា
