ភ្នំពេញ ៖ នៅម៉ោង៩៖០០នាទីព្រឹកថ្ងៃទី១២ ខែមករា ឆ្នាំ២០១៨ នេះរដ្ឋសភា នឹងបើកកិច្ចប្រជុំគណៈកម្មាធិការអចិន្ត្រៃយ៍ ដើម្បីពិនិត្យសេចក្តីព្រាងច្បាប់ ស្តីពីការអនុម័តយល់ព្រម លើកិច្ចព្រមព្រៀងពាណិជ្ជកម្មសេវាកម្មក្រោមកិច្ចព្រមព្រៀង ក្របខណ្ឌស្តីពីកិច្ចសហប្រតិបត្តិការសេដ្ឋកិច្ចគ្រប់ជ្រុងជ្រោយរវាងអាស៊ាន និងសាធារណរដ្ឋឥណ្ឌា មុននឹងដាក់ចូលកិច្ចប្រជុំពេញអង្គអនុម័ត។
កិច្ចប្រជុំគណៈកម្មាធិការអចិន្ត្រៃយ៍នេះ ធ្វើឡើងក្រោមអធិបតីភាព សម្តេច ហេង សំរិន ប្រធានរដ្ឋសភា ដោយមានការចូលរួមពីតំណាងគណៈកម្មាធិការជំនាញនានាផងដែរ។
លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា បានបញ្ជាក់ប្រាប់បណ្តាញព័ត៌មានយើងឱ្យដឹងថា កិច្ចប្រជុំគណៈកម្មាធិការអចិន្ត្រៃយ៍ នៅថ្ងៃនេះមានរបៀបវារៈខាងលើតែមួយគត់ដែលត្រូវបានពិនិត្យ ក្រោយពេលរដ្ឋសភាបានប្រគល់សេចក្តីព្រាងច្បាប់នេះទៅឱ្យគណៈកម្មការទី៩ត្រួតពិនិត្យ និងសិក្សាឱ្យច្បាស់លាស់មុននិងបញ្ចូនទៅអង្គសភាអនុម័ត។
លោកបានបន្ថែមថា រដ្ឋសភានឹងបើកកិច្ចប្រជុំពេញអង្គ នៅថ្ងៃទី១៥ខែមករា ឆ្នាំ២០១៨ ដើម្បីអនុម័តលើសេចក្តីព្រាងច្បាប់នេះ និងបិទសម័យប្រជុំលើកទី៩ នីតិកាលទី៥ នៅថ្ងៃនោះតែម្តង៕
