ខេត្តត្បូងឃ្មុំ ៖ ក្រោយពីបញ្ចប់ព្រះរាជពិធីរុក្ខទិវា នារសៀលថ្ងៃដដែល ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងារថ្នាក់កណ្តាលចុះជួយស្រុកតំបែរ ខេត្តត្បូងឃ្មុំ ស្រុកកំពង់សៀម និង០៣ឃុំ នៃស្រុកជើងព្រៃ ខេត្តកំពង់ចាម និងសហការីបានបន្តដំណើរទៅកាន់វត្តពោធិសាលព្រឹក្ស ហៅវត្តតំបែរ ស្ថិតនៅឃុំតំបែរស្រុកតំបែរ ខេត្តត្បូងឃ្មុំដើម្បីវេរប្រគេនទេយ្យទាន និងគ្រឿងឧបភោគបរិភោគជូនចំពោះព្រះសង្ឃសម្រាប់គង់ចាំព្រះវស្សាចំនួន ២វត្តអារាម គឺវត្តពោធិសាលព្រឹក្ស និងវត្តសុវណ្ណមុនីជោតិ ហៅវត្តស្វាយតាមែក និងឧទ្ទិសមគ្គផលជូនចំពោះដួងវិញ្ញាណក្ខន្ធបុព្វការីជនទាំងឡាយ មានមាតា បិតា ជីដូនជីតា ញាតិកាទាំងប្រាំពីរសណ្តាន ដែលបានបែកកាយរំលាយក្ខន្ធ ហើយមួយចំណែកទៀត ឧទ្ទិសជូនចំពោះដួងវិញ្ញាណក្ខន្ធវីរៈយុទ្ធជន វីរៈយុទ្ធនារី ដែលបានបូជាជីវិតក្នុងបុព្វហេតុការពារជាតិមាតុភូមិ សូមអំណាចផល្លានិសង្ឃ ដែលកើតឡើងអំពីពិធីបុណ្យនេះ ជួយយិតយោងដួងវិញ្ញាណក្ខន្ធអស់លោកទាំងអស់នោះ ឲ្យបានសោយសុខក្នុងសុគតិភពជាភិយ្យោភាពតរៀងទៅ។
នាឱកាសដ៏ថ្លៃថ្លា ឯកឧត្តមរដ្ឋមន្ត្រីបានសម្តែងនូវសេចក្តីសោម នស្សរីករាយយ៉ាងក្រៃលែងចំពោះឱកាសដែលបានមកគោរពបូជាចំពោះព្រះពុទ្ធសាសនាហើយឯកឧត្តមក៏បាននាំមកនូវសេចក្តីនឹករលឹកនិងសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាជូនចំពោះព្រះសង្ឃ លោកយាយ លោកតា និងបងប្អូនជនរួមជាតិទាំងអស់ដែលបានចូលរួមនាពេលនេះ។
ឯកឧត្តមរដ្ឋមន្ត្រីក៏បានប្រគេនថវិកាចំនួនជាង១២លានរៀលដែលជាអំណោយដ៏ថ្លៃថ្លារបស់សម្តេចទាំងទ្វេដើម្បីចូលរួមកសាងហេដ្ឋារចនាសម្ព័ន្ធនៅក្នុងវត្តឲ្យកាន់តែមានភាពរីកចម្រើន សម្រាប់ពុទ្ធបរិស័ទធ្វើការគោរពបូជាផងដែរ៕
ដោយ ៖ សុភា
