ខេត្តសៀមរាប ៖ កម្លាំងនគរបាលអន្តោប្រវេសន៍ប្រចាំនៅព្រលានយន្តហោះអន្តរជាតិខេត្តសៀមរាប បានឃាត់ខ្លួនជនជាតិកូរ៉េខាងត្បូង ចំនួន២នាក់ នៅថ្ងៃទី៧ ខែកក្កដា ឆ្នាំ២០១៩ ដោយរឹបអូសយកដុល្លារ បានជាង២លានដុល្លារ។
យោងតាមរបាយការណ៍នគរបាលអន្តោប្រវេសន៍នៅច្រក អាកាសយានដ្ឋានអន្តរជាតិសៀមរាប បានរាយការណ៍ជូនលោកឧត្តមសេនីយ៍ឯកប្រធាននាយកដ្ឋានច្រកទ្វារទី១ ឲ្យដឹងថា នៅថ្ងៃអាទិត្យ ៦កើត ខែអាសាឍ ឆ្នាំកុរ ឯកស័ក ពស.២៥៦៣ ត្រូវនឹងថ្ងៃទី៧ ខែកក្កដា ឆ្នាំ២០១៩ តាមជើងហោះហើរលេខ UO-706 (HKG-REP) មកពីទីក្រុងហុងកុង ប្រទេសចិន ប៉ូលិសប៉ុស្តិ៍បានសហការជាមួយកម្លាំងការិយាលយ័គយ និងរដ្ឋករប្រចាំអាកាសយានដ្ឋានអន្តរជាតិសៀមរាប ឃាត់ជនជាតិកូរ៉េខាងត្បូង ចំនួន២នាក់ ដែលមានឈ្មោះ ដូចខាងក្រោម៖ទី១-ឈ្មោះ YOON WONGI, M, DOB: 07/10/1986, PN: M54310302។ទី២-ឈ្មោះ SONG HYUNHOO, M, DOB: 24/09/1975, PN: M41060548។សមត្ថកិច្ចបានបញ្ជាក់ក្នុងរបាយការណ៍បន្តថា មូលហេតុ៖ គឺនាំចូលប្រាក់ដុល្លាខុសច្បាប់ ចំនួន២,២០០,០០០ដុល្លារ (ពីរលានពីរសែនដុល្លារអាមេរិក) ដែលជនជាតិកូរ៉េខាងត្បូងទាំង២នាក់ខាងលើ នាំយកមកពីទីក្រុងហុងកុង ប្រទេសចិន។ ក្នុងនោះមាន៖ ក្រដាស់ប្រាក់ ១០០$ ចំនួន២១,៩០០សន្លឹក, ក្រដាស់ប្រាក់៥០$ ចំនួន២០០សន្លឹក។
យោងតាមបញ្ជារបស់នាយឧត្តមសេនីយ៍ អគ្គនាយកអន្តោប្រវេសន៍ សាមីខ្លួនជនជាតិកូរ៉េទាំង២នាក់ខាងលើ ត្រូវបានប្រគល់ជូនក្រុមប្រតិបត្តិការទី១ (សៀមរាប) នាយកដ្ឋានស៊ើបអង្កេត និងអនុវត្តនីតិវិធី ចំណែកឯប្រាក់ដុល្លារ ចំនួន២,២០០,០០០$ រក្សាទុកបណ្តោះអាសន្ន នៅការិយាល័យគយ និងរដ្ឋករប្រចាំការក្នុងអាកាសយានដ្ឋានអន្តរជាតិសៀមរាប ដើម្បីបន្តនីតិវិធីច្បាប់៕
ដោយ ៖ កូឡាប
