ខេត្តព្រះសីហនុ៖ ជារើយៗមានក្រុមឈ្មួញដីខិលខូចមួយចំនួនតូច តែងតែបង្កព្យុះភ្លៀង ខិតខំរិះរកគ្រប់មធ្យោបាយ លួចរំលោភដីរបស់រដ្ឋទុកលក់បន្ត។ ប្រជាពលរដ្ឋមូលដ្ឋាន បានអំពាវនាវដោយស្នើសុំ លោក គួច ចំរើន ដែលទើបតែព្រះមហាក្សត្យឡាយព្រះហត្ថលេខាជា អភិបាលខេត្តព្រះសីហនុ ជំនួសលោក យន្ត មីន សូមមេត្តា ជួយត្រួតពិនិត្យ និងទប់ស្កាត់អោយបានទាន់ពេលវេលាផង។
សេចក្ដីរាយការណ៍ពីប្រជាពលរដ្ឋមូលដ្ឋាន បានឲ្យភ្នាក់ងារគេហ ទំព័រព័ត៌មាន RSKYNews.com ដឹងថា មួយរយៈចុងក្រោយនេះ ការរំលោភបំពានដីធ្លីរបស់រដ្ឋតំបន់ប្រើប្រាស់ច្រើនយ៉ាងព្រែកទឹកសាបក្បាលឆាយ ដែលមានទីតាំងស្ថិតនៅភូមិចំណោទរាម ឃុំបិទត្រាំង ស្រុកព្រៃនប់ ខេត្តព្រះសីហនុ ត្រូវបានឈ្មួញកំពុងឈួសឆាយយកធ្វើជាកម្មសិទ្ធិ អស់ប្រមាណ ២០ហិចតាហើយ បើអាជ្ញាធរមិនមានវិធានការទេនិងបង្កវិនាសកម្មយ៉ាងធ្ងន់ធ្ងរនៅតំបន់នេះហើយ ។ ដើម្បីបញ្ជៀសនូវការិះគន់ និងកន្ទេលធំបន្លំដេក អភិបាលខេត្តព្រះសីហនុ និងប្រធានមន្ទីរកសិកម្មខេត្ត គួរតែស៊ើបអង្កេតស្រាវជ្រាវ និងវែករកមុខជនល្មើសមកដាក់ទោសតាមច្បាប់។
សេចក្ដីរាយការណ៍បញ្ជាក់ថា ដីតំបន់ប្រើប្រាស់ច្រើនយ៉ាងព្រែកទឹកសាបក្បាលឆាយតាមអនុក្រិត្យលេខ១១៦ថ្មី ចុះថ្ងៃទី ០៥ ០៦ ២០១៦ ដោយសម្តេចនាយករដ្ឋមន្ត្រី មានផ្ទៃដីប្រមាណជាង ៥០០០ហិកតា ត្រូវស្ថិតនៅក្រោមការគ្រប់គ្រងរបស់ក្រសួងបរិស្ថាន រដ្ឋបាលព្រៃឈើ និងមន្ទីរកសិកម្មខេត្តព្រះសីហនុ។
ដោយទីតាំងស្ថិតនៅភូមិចំណោទរាម ឃុំបិទត្រាំង ស្រុកព្រៃនប់ ខេត្តព្រះសីហនុ ហើយក៏ជាដីដែលជាចំណីអារម្មណ៍យ៉ាងខ្លាំងរបស់ក្រុមជនខិលខូចមួយក្ដាប់តូចកំពុងទន្ទ្រាន់កាន់កាប់ជាឯកជន ដោយដីនៅតំបន់នោះកំពុងមានតម្លៃកើនឡើង៕
ដោយ ៖ សុភា
