រាជធានីភ្នំពេញ ៖ លោក ឃឹម ស៊ុនសូដា អភិបាលខណ្ឌកំបូល បានលើកឡើងដូច្នេះបន្ទាប់ពីមើលឃើញថា នៅក្នុងមូលដ្ឋានខណ្ឌកំបូល ដែលជាខណ្ឌទើបបង្កើតថ្មី មានក្រុមឆក់ឱកាសបានប្រព្រឹត្តនូវល្បែងស៊ីសង ដែលច្បាប់ហាមឃាត់ ដូចជាបើកន្លែងជល់មាន់ ភ្នាល់មាន់ជល់តាមទូរទស្សន៍ កន្ទុយលេខ ភ្នាល់បាល់ បៀរ អាប៉ោង គ្រឿងញៀន និងអបាយមុខផ្សេងៗ ដែលអាចបង្ករឱ្យមានអំពើចោរកម្ម អំពើហឹង្សាក្នុងគ្រួសារ និងការព្រួយបារម្មណ៍នានា ហេតុនេះអភិបាលខណ្ឌកំបូល បានព្រមានចាត់វិធានការណ៍តាមផ្លូវច្បាប់ ដោយគ្មានការលើកលែង និងសុំឱ្យបញ្ឈប់ជាបន្ទាន់។
ការលើកឡើងនេះធ្វើនៅក្នុងវេទិកាសាធារណៈ ជាលើកដំបូង នៅក្នុងសង្កាត់កំបូល នៅព្រឹកថ្ងៃទី៦ ខែកក្កដា ឆ្នាំ២០១៩ ដោយមានការចូលរួមពី លោក នៅ សារឿន ប្រធានក្រុមប្រឹក្សា អភិបាលរង មន្រ្តីជំនាញក្រោមឱវាទនិងប្រជាពលរដ្ឋជាច្រើនរយនាក់។
នៅក្នុងវេទិកាសាធារណៈនេះ គឺមានបងប្អូនប្រជាពលរដ្ឋ បានលើកឡើង នូវបញ្ហាប្រឈមនានា ដែលបាននិងកំពុងជួបប្រទះ នូវការលំបាក ក្នុងភូមិ សង្កាត់ របស់ពួកគាត់ ក្នុងនោះក៏បានលើកឡើងនូវ សំណើ សំនួរ និងសំណូមពរ រហូតដល់ទៅ៣៨ ដើម្បីសុំឱ្យរដ្ឋបាលខណ្ឌ ពិនិត្យ និងជួយដោះស្រាយ ទៅតាមលទ្ធភាពជាក់ស្តែង។
សំណើ និងសំណូមពររបស់ប្រជាពលរដ្ឋភាគច្រើន គឺស្នើសុំឲអាជ្ញាធរជួយអភិវឌ្ឍន៏ហេដ្ឋារចនាសម្ព័ន្ធ ក្នុងមូលដ្ឋាន ដូចជា ៖ កសាង ជួសជុល ផ្លូវ តូចធំជាច្រើនខ្សែ ដាក់លូ កាយប្រឡាយ រំដោះជំនន់ទឹកភ្លៀង ដែលបានលិចលង់ផ្លូវនិងភូមិដ្ឋានមួយចំនួនក្នុងសង្កាត់កំបូល។
ជាការឆ្លើយតប លោក ឃឹម ស៊ុនសូដា បានទទួលយករាល់សំណូមពរ និងសំណើ មកដោះស្រាយជាក់ស្តែង គឺរាល់ផ្លូវតូចធំទាំងឡាយដែលរងការខូចខាត មានសំបុកមាន់ រងការលិចលង់ ដោយជំនន់ទឹកភ្លៀង នារដូវវស្សានេះអាជ្ញាធរនឹងចុះទៅពិនិត្យ និងជួយជួសជុល ឈូសឆាយ ចាក់កំទេចថ្ម ជាបន្តបន្ទាប់ ដើម្បីសម្រួលការធ្វើដំណើររបស់ប្រជាពលរដ្ឋ។ មួយវិញទៀត ក៏នឹងបើកយុទ្ធនាការ ប្តូរសៀវភៅគ្រួសារ តាមភូមិទៅតាមពេលវេលាជាក់ស្តែង ហើយក៏បន្តសហការជាមួយភាគីពាក់ព័ន្ធ ដោះស្រាយបញ្ហា សំរាម បរិស្ថាន អនាម័យ ចរាចរណ៏ គ្រឿងញៀន សន្តិសុខ សណ្តាប់ធ្នាប់សាធារណៈ ដើម្បីឱ្យភូមិសង្កាត់មានសុវត្ថិភាព តាមគោលនយោបាយរបស់រាជរដ្ឋាភិបាល និងគោលការណ៍ណែនាំរបស់រដ្ឋបាលរាជធានីភ្នំពេញ។
លោកអភិបាលក៏សុំការយោគយល់ផងដែរ ចំពោះសំណើ និងសំណូមពរ ដែលមានទំហំទឹកប្រាក់ច្រើនៗ ពាក់ព័ន្ធនឹងគម្រោងអភិវឌ្ឍន៍របស់សាលារាជធានីភ្នំពេញ រដ្ឋបាលខណ្ឌនឹងធ្វើរបាយការណ៍ដាក់ជូន អភិបាលនៃគណៈអភិបាលរាជធានីភ្នំពេញ ដើម្បីស្នើសុំពិនិត្យ និងដោះស្រាយជូន ទៅតាមឋានុក្រម និងផែនការអភិវឌ្ឍន៍រាជធានីភ្នំពេញ៕
ដោយ ៖ វិបុល
