រាជធានីភ្នំពេញ ៖ នៅថ្ងៃសុក្រ ០៤ កើត ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៥ ខែកក្កដា ឆ្នាំ២០១៩ វេលាម៉ោង ២០ និង ៣០ នាទី លោក ជា ពិសី អភិបាលនៃគណៈអភិបាលខណ្ឌប្ញស្សីកែវ និងជាប្រធានគណៈបញ្ជាការឯកភាពខណ្ឌ បានដឹកនាំគណៈបញ្ជាការឯកភាពខណ្ឌរួមមាន ៖លោក លីន ញ៉ក់ អភិបាលរងខណ្ឌ លោកវីរៈសេនីយ៍ទោ គល់ យី អធិការនគរបាលខណ្ឌ លោកអធិការរងនគរបាលខណ្ឌ លោកមេបញ្ជាការរងកងរាជអាវុធហត្ថខណ្ឌ កម្លាំងនគរបាល មន្ត្រីសាលាខណ្ឌ អាជ្ញាធរភូមិ – សង្កាត់ និងប្រជាការពារខណ្ឌ-សង្កាត់ ចុះបង្ក្រាបជាក់ស្ដែង ទីតាំងបើកល្បែងស៉ីសងតាមប្រព័ន្ធអ៉ីនធើណែត (ភ្នាល់បាល់តាមអ៉ីនធើណែត) ស្ថិតនៅផ្ទះលេខ៧៣ ផ្លូវជាតិលេខ៥ ភូមិ២ សង្កាត់ច្រាំងចំរេះទី១ ខណ្ឌប្ញស្សីកែវ រាជធានីភ្នំពេញ។
ជាលទ្ធផលក្នុងប្រតិបត្តិការខាងលើនេះ គណៈបញ្ជាការឯកភាព បានឃាត់ខ្លួន ៖
១/ បុគ្គលិក ចំនួន ០១ នាក់ (ស្រី ០០ នាក់) និងអ្នកលេងចំនួន ១១ នាក់ ( ស្រី ០៣ នាក់) សរុបចំនួន ១២ នាក់ ។
២/ ដោយឡែកចំពោះ វត្ថុតាង គណៈបញ្ជាការឯកភាពខណ្ឌ បានដកហូត កុំព្យូទ័រ ចំនួន ២១ គ្រឿង , វិក័យប័ត្រកត់ប៉ុងបាល់មួយចំនួន , ប្រាក់ភ្នាល់បាល់មួយចំនួន , និងម៉ាស៉ីនព្រីនធើ ០១ គ្រឿង។
បច្ចុប្បន្ននេះ មនុស្ស និងវត្ថុតាង ត្រូវបានបញ្ជូនទៅកាន់អធិការដ្ឋាននគរបាលខណ្ឌ ដើម្បីអនុវត្តតាមនីតិវិធីជាបន្តទៀត ដោយឡែក ទីតាំងខាងលើ ត្រូវបិទចោលជាបណ្ដោះអាសន្នផងដែរ៕
ដោយ ៖ សុភា
