ខេត្តសៀមរាប ៖ ដោយហេតុថាមួយរយៈចុងក្រោយនេះលោក សុខ សុដារ៉ា ប្រធានសាខាគយខេត្តសៀមរាប និងលោក ម៉ៅ សាមឿន មេគយចល័តខេត្តសៀមរាប គាបយកលុយលើតុក្រោមតុពីពួកគេកាន់តែច្រើនឡើងៗ ហើយបែរជាឃុបឃិតឲ្យឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ពីប្រទេសសៀម និងប្រទេសយួនមកចែកចាយពេញទីផ្សារក្នុងខេត្តសៀមរាប។
ប្រភពដែលស្និទ្ធនឹងលោក សុខ សុដារ៉ា បានឲ្យដឹងថា ដោយសារអាងមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា ទើបលោក សុខ សុដារ៉ា ហ៊ានធ្វើអ្វីៗតាមអំពើចិត្ត ទោះបីរឿងអាស្រូវពុករលួយរបស់លោក សុខ សុដារ៉ា ប្រធានសាខាគយខេត្តសៀមរាប ក៏ដូចជារឿងអាស្រូវពុករលួយរបស់លោក ម៉ៅ សាមឿន មេគយចល័តខេត្តសៀមរាប ត្រូវបានលាតត្រដាងជាបន្តបន្ទាប់យ៉ាងណាក៏ដោយ ក៏លោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ធ្វើមិនដឹងមិនឮអ្វីទាំងអស់។ សូម្បីតែលោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏រក្សាភាពស្ងៀមស្ងាត់ទុកឲ្យលោក សុខ សុដារ៉ា ប្រធានសាខាគយខេត្តសៀមរាប និងលោក ម៉ៅ សាមឿន មេគយចល័តខេត្តសៀមរាប ធ្វើអ្វីៗតាមអំពើចិត្តដដែល។
ដូច្នេះហើយទើបឈ្មួញមួយចំនួនអាចដឹកជញ្ជូនទំនិញគេចពន្ធពីស្រុកសៀម និងពីស្រុកយួន ចូលមកចែកចាយតាមទីផ្សារក្នុងខេត្តសៀមរាប យ៉ាងរលូនព្រោះមានការឃុបឃិតបើកដៃពីសំណាក់លោក សុខ សុដារ៉ា និងលោក ម៉ៅ សាមឿន ដែលល្បីល្បាញខាងប្រព្រឹត្តអំពើពុករលួយ។
បើតាមការអះអាងរបស់សមត្ថកិច្ចពាក់ព័ន្ធមួយចំនួនបានឲ្យដឹងថា ឈ្មួញធំៗបាននាំចូលទំនិញគេចពន្ធនិងទំនិញបង់ពន្ធមិនគ្រប់ពីច្រកព្រំដែនក្នុងខេត្តបន្ទាយមានជ័យ និងច្រកព្រំដែនក្នុងខេត្តឧត្ដរ មានជ័យ ចូលមកចែកចាយតាមទីផ្សារក្នុងខេត្តសៀមរាប យ៉ាងពេញបន្ទុក។ ទំនិញគេចពន្ធ និងទំនិញបង់ពន្ធមិនគ្រប់ ដែលឈ្មួញដឹកជញ្ជូនពីច្រកព្រំដែនខេត្តបន្ទាយមានជ័យ និងខេត្តឧត្ដរមានជ័យ ចូលមកចែកចាយយ៉ាងរាលដាលក្នុងខេត្តសៀមរាប មានដូចជាគ្រឿងសំណង់ គ្រឿងកំប៉ុង ទំនិញចាប់ហួយ និងគ្រឿងសំអាង ជាដើមធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ។
មន្ត្រីគយក្នុងខេត្តសៀមរាប មួយចំនួនដែលស្និទ្ធនឹងលោក ម៉ៅ សាមឿន មេគយចល័តខេត្តសៀមរាប បានឲ្យដឹងថា ប្រសិនបើគ្មានការឃុបឃិតពីសំណាក់លោក សុខ សុដារ៉ា ទេនោះគឺលោក ម៉ៅ សាមឿន មិនហ៊ានធ្វើអ្វីៗតាមអំពើចិត្តឡើយ។ ប្រភពបានឲ្យដឹងទៀតថា ឈ្មួញមួយចំនួនបាននាំចូលទំនិញគេចពន្ធ ទំនិញបង់ពន្ធមិនគ្រប់ មកចែកចាយពេញទីផ្សារក្នុងខេត្តសៀមរាប ហើយលោក សុខ សុដារ៉ា និងលោក ម៉ៅ សាមឿន ប្រមូលលុយលើតុក្រោមតុចែកគ្នាធ្វើមានធ្វើបានយ៉ាងសុខស្រួលមិនខ្វល់ពីការរិះគន់អ្វីទាំងអស់។ ជាងនេះទៅទៀតទាំងលោក សុខ សុដារ៉ា ប្រធានសាខាគយខេត្តសៀមរាប និងលោក ម៉ៅ សាមឿន មេគយចល័តខេត្តសៀមរាប តែងយកឈ្មោះលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ទន្ទេញជាប់មាត់ដើម្បីការពារទង្វើមិនប្រក្រតីនិងអំពើពុករលួយរបស់ខ្លួន។
ដូច្នេះមានតែលោកឧបនាយករដ្ឋមន្ត្រី អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរបណ្ដែតបណ្ដោយតទៅទៀតទេ ព្រោះមួយរយៈចុងក្រោយនេះលោក សុខ សុដារ៉ា និងលោក ម៉ៅ សាមឿន ឃុបឃិតគ្នាប្រព្រឹត្តអំពើពុករលួយខ្លាំងក្លាជាងមុនទៅទៀត៕
ដោយ ៖ កូឡាប
