ខេត្តក្រចេះ ៖ តាមការបង្ហើបពីនាយទាហាននិងពលទា ហាននៅក្នុងអង្គភាពវរការពារព្រំដែន២០៤ ក្នុងឃុំ២ធ្នូ ស្រុកស្នួល ខេត្តក្រចេះ បានឲ្យដឹងថា ព្រៃឈើនៅតំបន់ភូមិភាគឦសាន ជាពិសេសព្រៃឈើក្នុងខេត្តស្ទឹងត្រែង ខេត្តក្រចេះ និងខេត្តមណ្ឌលគិរី ជៀសមិនផុតពីវិនាសសាបសូន្យនាពេលឆាប់ៗខាងមុននោះទេ។ ដោយហេតុថា បច្ចុប្បន្នមានឈ្មួញច្រើននាក់ដឹកជញ្ជូនឈើពីខេត្តក្រចេះ ខេត្តស្ទឹងត្រែង និងខេត្តមណ្ឌលគិរី យកមកលក់ឲ្យមេឈ្មួញ គង់ ក្រឹង ដល់ទីតាំងស្តុកឈើខាងក្រោយបន្ទាយអង្គភាពយោធាវរការពារព្រំដែនលេខ២០៤ យ៉ាងពេញ បន្ទុកព្រោះគ្មានមន្ត្រីជំនាញឬសមត្ថកិច្ចពាក់ព័ន្ធណាចាត់វិធានការទប់ស្កាត់ទាល់តែសោះ។
ប្រភពបានឲ្យដឹងទៀតថា នៅពេលប្រមូលទិញឈើប្រណីតនិងឈើប្រភេទលេខ១បានច្រើន ទើបមេឈ្មួញ គង់ ក្រឹង ដឹកជញ្ជូនចេញទៅស្រុកយួនតាមច្រករបៀងជាច្រើនកន្លែងក្នុងភូមិត្រពាំងស្រែ និងភូមិវ៉េវ ឃុំ២ធ្នូ ស្រុកស្នួល ខេត្តក្រចេះ ហើយមន្ត្រីជំនាញនិងសមត្ថកិច្ចពាក់ព័ន្ធធ្វើមិនដឹងមិនឮអ្វីទាំងអស់។
ប្រភពពីសមត្ថកិច្ចពាក់ព័ន្ធក្នុងស្រុកស្នួល ខេត្តក្រចេះ បានឲ្យដឹងថា ពួកគេមិនហ៊ានប៉ះពាល់មេឈ្មួញ គង់ ក្រឹង ដែលជាឧកញ៉ានិងជាឧត្តមសេនីយ៍យោធា មានអំណាចខ្លាំងក្នុងការប្រមូលទិញឈើនិងដឹកជញ្ជូនឈើចេញទៅស្រុកយួនយ៉ាងពេញបន្ទុកនោះទេ។ ប្រភពបានឲ្យដឹងទៀតថា មន្ត្រីធំៗនិងសមត្ថកិច្ចពាក់ព័ន្ធក្នុងខេត្តក្រចេះ សុទ្ធតែជាបង្អែករបស់មេឈ្មួញ គង់ ក្រឹង ក្នុងការដឹកជញ្ជូនឈើចេញទៅស្រុកយួនក្នុងខណៈដែលព្រៃឈើនៅខេត្តស្ទឹងត្រែង ខេត្តក្រចេះ និងខេត្តមណ្ឌលគិរី កំពុងប្រឈមនឹងសេចក្ដីវិនាសសាបសូន្យនាពេលឆាប់ៗខាងមុខនេះ។
ជាក់ស្ដែងសូម្បីតែលោក វេង សាខុន រដ្ឋមន្ត្រីក្រសួងកសិកម្ម និងលោក កែវ អូម៉ាលីស្ស ប្រធានរដ្ឋបាលព្រៃឈើ នៃក្រសួងកសិកម្ម ក៏រក្សាភាពស្ងៀមស្ងាត់ផងដែរ ក្នុងខណៈដែលមេឈ្មួញ គង់ ក្រឹង បង្កើនសកម្មភាពដឹកជញ្ជូនឈើចេញទៅស្រុកយួនយ៉ាងពេញបន្ទុកដោយគ្មានញញើតអ្វីទាំងអស់។
ប្រភពពីមន្ត្រីយោធាក្នុងខេត្តក្រចេះ បានបង្ហើបឲ្យដឹងថា លោក ណៃ តឹងឡឹង មេបញ្ជាការយោធាតំបន់ប្រតិបត្តិការសឹករងខេត្តក្រចេះ និងលោក ជឿន សុវណ្ណថា មេបញ្ជាការយោធាយោធភូមិភាគ១ គឺជាបង្អែកយ៉ាងរឹងមាំរបស់មេឈ្មួញ គង់ ក្រឹង ក្នុងការដឹកជញ្ជូនឈើចេញទៅស្រុកយួនយ៉ាងរាលដាល។
ដូច្នេះហើយទើបលោក វ៉ា ថន អភិបាលខេត្តក្រចេះ ក៏ដូចជាលោក លន់ សុផាត ស្នងការនគរបាលខេត្តក្រចេះ និងលោកឧត្តមសេនីយ៍ត្រី សាន្ត ប៊ុនថាន មេបញ្ជាការកង រាជអាវុធហត្ថខេត្តក្រចេះ រក្សាភាពស្ងៀមស្ងាត់ទុកឲ្យមេឈ្មួញ គង់ ក្រឹង ប្រមូលទិញឈើនិងដឹកជញ្ជូនឈើចេញ ទៅស្រុកយួនយ៉ាងសុខស្រួល។ បច្ចុប្បន្ននេះមានឈ្មួញតូចធំជាច្រើននាក់ដឹកជញ្ជូនឈើទៅលក់ឲ្យមេឈ្មួញ គង់ ក្រឹង ដល់តំបន់ព្រំដែនក្នុងស្រុកស្នួល ខេត្តក្រចេះ តែម្តងព្រោះឈ្មួញទាំងធំទាំងតូចដែលដឹកជញ្ជូនឈើទៅលក់ឲ្យមេឈ្មួញ គង់ ក្រឹង គឺគ្មានមន្ត្រីជំនាញឬសមត្ថកិច្ចពាក់ព័ន្ធណាហ៊ានបង្ក្រាបឡើយ។
ថ្មីៗនេះប្រភពព័ត៌មានពីនាយទាហាននិងពលទាហានក្នុងអង្គភាពវរការពារព្រំដែនលេខ២០៤ បានឲ្យដឹងថា លោកឧត្តមសេនីយ៍ គង់ ក្រឹង ដែលមានតួនាទីជាមេបញ្ជាការរងវរការពារព្រំដែនលេខ២០៤ និងមានងារជាឧកញ៉ាផងនោះ កំពុងបង្កើនសកម្មភាពប្រមូលទិញឈើនិងដឹកជញ្ជូនឈើចេញទៅស្រុកយួនយ៉ាងរលូន។ ប្រភពបានឲ្យដឹងទៀតថា ការដែលមេឈ្មួញ គង់ ក្រឹង អាចបន្តសកម្មភាពប្រព្រឹត្តបទល្មើសព្រៃឈើដោយគ្មានមន្ត្រីជំនាញឬសមត្ថកិច្ចណាហ៊ានប៉ះពាល់ គឺដោយសារមេឈ្មួញ គង់ ក្រឹង មានខ្នង បង្អែករឹងមាំនៅក្នុងក្រសួងការពារជាតិនិងនៅក្នុងក្រសួង មហាផ្ទៃ។ សូម្បីតែមន្ត្រីគណៈកម្មការបង្ក្រាបនិងទប់ស្កាត់បទល្មើសព្រៃឈើដែលចុះទៅបំពេញបេសកកម្មក្នុងខេត្តក្រចេះ ក៏មិនហ៊ានប៉ះពាល់មេឈ្មួញ គង់ ក្រឹង នោះឡើយព្រោះដឹងថាឈ្មួញម្នាក់នេះមានឥទ្ធិពលខ្លាំងក្លា។ មិនតែប៉ុណ្ណោះមេឈ្មួញ គង់ ក្រឹង តែងតែអួតអាងប្រាប់គេឯងថា ក្រៅពីលោកនាយករដ្ឋមន្ត្រី ហ៊ុន សែន ដែលជាប្រមុខរាជរដ្ឋាភិបាល គឺគ្មាននរណាហ៊ានប៉ះពាល់ខ្លួននោះទេ ព្រោះខ្លួនមានខ្នងបង្អែករឹងមាំចាំការពារពីក្រោយខ្នង៕
រាល់ប្រភពចោទប្រកាន់ខាងលើនេះអង្គភាពគេហទំព័រ www.rskynews.com យើងមិនអាចសុំការបំភ្លឺពីភាគីពាក់ព័ន្ធបានឡើយ តែយ៉ាងណាក៏ដោយអង្គភាពយើងនិងរងចាំការបំភ្លឺគ្រប់ពេលវេលា ដើម្បីស្របតាមច្បាប់នៃរបបសារព័ត៌មាន៕
ដោយ ៖ សុភា
