ខេត្តឧត្ដរមានជ័យ ៖ នៅថ្ងៃទី២៦ខែមិថុនាឆ្នាំ២០១៩ នេះមានការបែកធ្លាយមកថាលោកអាន់ សំអាត ប្រធានការិយាល័យច្រកចេញចូលតែមួយសាលាខេត្តឧត្ដរមានជ័យ បានប្រព្រឹត្តអំពើពុករលួយយ៉ាងធ្ងន់ធ្ងរ ដោយធ្វើសកម្មភាព គៀបសង្កត់ធ្វើបាប ជញ្ជក់ឈាមពី ប្រជាពលរដ្ឋក្រីក្ររាប់ពាន់នាក់ក្នុងមួយខែៗនិងប្រម៉ូលប្រាក់បានរាប់ពាន់ដុល្លាក្នុងមួយខែ តាមរយ:ការផ្ដល់សៀវភៅឆ្លងដែន ។
ប្រភព បានអោយដឹងថា លោក អាន់សំអាត់ បានរៀបចំបណ្តាញជាច្រើនកន្លែងនៅសង្កាត់អូរស្មាច់ដើម្បីទទួលប្រមូលរៀបចំធ្វើសៀវភៅឆ្លងដែនកំណត់យកប្រាក់ក្នុងម្នាក់ពី ១៤ទៅ១៥ម៉ឺនរៀល ពីពលរដ្ឋមកពីខេត្តផ្សេងៗ ដែលត្រូវការប្រើប្រាស់សៀវភៅឆ្លងដែនទៅព្យាលជម្ងឺ រឺទៅធ្វើពលករស្រុកថៃ។
ប្រភពបន្ថែមថា បង់ប្រាក់ក្នុងម្នាក់១៤ទៅ១៥ម៉ឺនរៀលគឺអ្នកប្រមូលទទួលធ្វើបណ្ណ័ព្រំដែនយកប្រាក់មកប្រគល់អោយលោកអាន់ សំអាត ប្រធានការិយាល័យច្រកចេញចូលតែមួយចំនួន១០ម៉ឺនរៀលក្នុងម្នាក់ រីឯកអ្នកប្រមូលចំណេញម្នាក់៤ទៅ៥ម៉ឺនរៀល។
ប្រភពបានបន្តថា លោកអាន់ សំអាត បានផ្គើននិង ប្រកាស របស់ក្រសួងមហាផ្ទៃ ក្នុងការផ្ដល់បណ្ណ័ព្រំដែន គឺយកថ្លៃសេវាចាប់ពី១៤ម៉ឺនរៀលនិង១៥ម៉ឺនរៀលក្នុងសៀវភៅឆ្លងដែនមួយក្បាល ដែលសៀវភៅបន្ទុកក្រសួងមហាផ្ទៃតម្រូវកំណត់ បណ្ណ័ព្រំដែនមួយក្បាលតែពីម៉ឺនរៀល។ មិនតែប៉ុណ្ណោះលោក អាន់សំអាត បានយកលំនៅដ្ឋានរបស់ខ្លួន ធ្វើជាកន្លែងច្រកចេញចូលតែមួយសំរាប់ធ្វើបណ្ណ័ឆ្លងដែន និងបំពេញបែបបទផ្សេងៗដោយមិនបានឆ្លងកាត់ការត្រួតពិនិត្យឯកសារផ្សេងៗពីរដ្ឋបាលសាលាខេត្ត។ គ្រាន់តែមានហត្ថលេខាលោក លឹម សុខតូ អភិបាលរងខេត្តម្នាក់គ្រប់គ្រាន់ ដោយមិនគោរពទៅតាមបទដ្ឋានគតិយុត្តិ របស់ក្រសួងមហាផ្ទៃ ដាក់ចេញដើម្បីអោយអនុវត្ដ។
ប្រភពបន្ថែមថាលោក អាន់ សំអាត បានជញ្ជក់ឈាមពលរដ្ឋចាប់ តាំងពីក្រសួងមហាផ្ទៃចេញប្រកាស់ផ្ទេសេវ៉ាកម្មផ្ដល់សៀវភៅឆ្លងដែនពីនគរបាលអន្តោប្រវេសន៍ មកអោយអាជ្ញាធរខេត្តជាអ្នកទទួលវិញម្ដង។
សូមបញ្ជាក់ផងដែលថារាល់ការបំពេញបែបបទសៀវភៅឆ្លងដែន របស់ច្រកចេញចូលតែមួយសាលាខេត្តឧត្ដរមានជ័យមានតែ ហត្ថលេខាលោក លឹម សុខតូ អភិបាលរងខេត្តឧត្ដរមានជ័យតែម្នាក់ ដោយមិនមានការត្រួតពិនិត្យរាល់ឯកសារផ្សេងៗឆ្លងកាត់រដ្ឋបាលខេត្តនោះទេ។
រាល់ករណីចោទប្រកាន់ខាងលើចំពោះលោក អាន់ សំអាត ប្រធានការិយាល័យច្រកចេញចូលតែមួយ អង្គភាពគេហទំព័រ www.rskynews.com មិនអាចសុំការបកស្រាយបានទេ ពីលោក អាន់ សំអាត ដោយអង្គភាពយើងមិនមានលេខទូរស័ព្ទ តែយ៉ាងណាអង្គភាពយើងនិងរងចាំការបំភ្លឺគ្រប់ពេលវេលាពីភាគីត្រូវបានចោទប្រកាន់ដើម្បីស្របតាមច្បាប់របបសារព័ត៌មាន៕
ដោយ ៖ សុភា
